Sūktam 39 — kasya (10 mantras) — Śākala Saṃhitā (Ṛgveda)

Study

Anukramaṇī
Source

pra yadi̱tthā pa̍rā̱vata̍: śo̱cirna māna̱masya̍tha |

kasya̱ kratvā̍ maruta̱: kasya̱ varpa̍sā̱ kaṃ yā̍tha̱ kaṃ ha̍ dhūtayaḥ

||1||

प्र यदि॒त्था प॑रा॒वत॑: शो॒चिर्न मान॒मस्य॑थ ।

कस्य॒ क्रत्वा॑ मरुत॒: कस्य॒ वर्प॑सा॒ कं या॑थ॒ कं ह॑ धूतयः

sthi̱rā va̍: sa̱ntvāyu̍dhā parā̱ṇude̍ vī̱l̤ū u̱ta pra̍ti̱ṣkabhe̍ |

yu̱ṣmāka̍mastu̱ tavi̍ṣī̱ panī̍yasī̱ mā martya̍sya mā̱yina̍:

||2||

स्थि॒रा व॑: स॒न्त्वायु॑धा परा॒णुदे॑ वी॒ळू उ॒त प्र॑ति॒ष्कभे॑ ।

यु॒ष्माक॑मस्तु॒ तवि॑षी॒ पनी॑यसी॒ मा मर्त्य॑स्य मा॒यिन॑:

parā̍ ha̱ yat sthi̱raṃ ha̱tha naro̍ va̱rtaya̍thā gu̱ru |

vi yā̍thana va̱nina̍: pṛthi̱vyā vyāśā̱: parva̍tānām

||3||

परा॑ ह॒ यत् स्थि॒रं ह॒थ नरो॑ व॒र्तय॑था गु॒रु ।

वि या॑थन व॒निन॑: पृथि॒व्या व्याशा॒: पर्व॑तानाम्

na̱hi va̱: śatru̍rvivi̱de adhi̱ dyavi̱ na bhūmyā̍ṃ riśādasaḥ |

yu̱ṣmāka̍mastu̱ tavi̍ṣī̱ tanā̍ yu̱jā rudrā̍so̱ nū ci̍dā̱dhṛṣe̍

||4||

न॒हि व॒: शत्रु॑र्विवि॒दे अधि॒ द्यवि॒ न भूम्यां॑ रिशादसः ।

यु॒ष्माक॑मस्तु॒ तवि॑षी॒ तना॑ यु॒जा रुद्रा॑सो॒ नू चि॑दा॒धृषे॑

pra ve̍payanti̱ parva̍tā̱nvi vi̍ñcanti̱ vana̱spatī̍n |

pro ā̍rata maruto du̱rmadā̍ iva̱ devā̍sa̱: sarva̍yā vi̱śā

||5||

प्र वे॑पयन्ति॒ पर्व॑ता॒न्वि वि॑ञ्चन्ति॒ वन॒स्पती॑न् ।

प्रो आ॑रत मरुतो दु॒र्मदा॑ इव॒ देवा॑स॒: सर्व॑या वि॒शा

upo̱ rathe̍ṣu̱ pṛṣa̍tīrayugdhva̱ṃ praṣṭi̍rvahati̱ rohi̍taḥ |

ā vo̱ yāmā̍ya pṛthi̱vī ci̍daśro̱dabī̍bhayanta̱ mānu̍ṣāḥ

||6||

उपो॒ रथे॑षु॒ पृष॑तीरयुग्ध्वं॒ प्रष्टि॑र्वहति॒ रोहि॑तः ।

आ वो॒ यामा॑य पृथि॒वी चि॑दश्रो॒दबी॑भयन्त॒ मानु॑षाः

ā vo̍ ma̱kṣū tanā̍ya̱ kaṃ rudrā̱ avo̍ vṛṇīmahe |

gantā̍ nū̱naṃ no'va̍sā̱ yathā̍ pu̱retthā kaṇvā̍ya bi̱bhyuṣe̍

||7||

आ वो॑ म॒क्षू तना॑य॒ कं रुद्रा॒ अवो॑ वृणीमहे ।

गन्ता॑ नू॒नं नोऽव॑सा॒ यथा॑ पु॒रेत्था कण्वा॑य बि॒भ्युषे॑

yu̱ṣmeṣi̍to maruto̱ martye̍ṣita̱ ā yo no̱ abhva̱ īṣa̍te |

vi taṃ yu̍yota̱ śava̍sā̱ vyoja̍sā̱ vi yu̱ṣmākā̍bhirū̱tibhi̍:

||8||

यु॒ष्मेषि॑तो मरुतो॒ मर्त्ये॑षित॒ आ यो नो॒ अभ्व॒ ईष॑ते ।

वि तं यु॑योत॒ शव॑सा॒ व्योज॑सा॒ वि यु॒ष्माका॑भिरू॒तिभि॑:

asā̍mi̱ hi pra̍yajyava̱: kaṇva̍ṃ da̱da pra̍cetasaḥ |

asā̍mibhirmaruta̱ ā na̍ ū̱tibhi̱rgantā̍ vṛ̱ṣṭiṃ na vi̱dyuta̍:

||9||

असा॑मि॒ हि प्र॑यज्यव॒: कण्वं॑ द॒द प्र॑चेतसः ।

असा॑मिभिर्मरुत॒ आ न॑ ऊ॒तिभि॒र्गन्ता॑ वृ॒ष्टिं न वि॒द्युत॑:

asā̱myojo̍ bibhṛthā sudāna̱vo 'sā̍mi dhūtaya̱: śava̍: |

ṛ̱ṣi̱dviṣe̍ marutaḥ parima̱nyava̱ iṣu̱ṃ na sṛ̍jata̱ dviṣa̍m

||10||

असा॒म्योजो॑ बिभृथा सुदान॒वो ऽसा॑मि धूतय॒: शव॑: ।

ऋ॒षि॒द्विषे॑ मरुतः परिम॒न्यव॒ इषुं॒ न सृ॑जत॒ द्विष॑म्