Study
- Anukramaṇī
- Source
10 agastyo maitrāvaruṇiḥ | indraḥ| triṣṭup|
tvaṃ rāje̍ndra̱ ye ca̍ de̱vā rakṣā̱ nṝn pā̱hya̍sura̱ tvama̱smān |
tvaṃ satpa̍tirma̱ghavā̍ na̱staru̍tra̱stvaṃ sa̱tyo vasa̍vānaḥ saho̱dāḥ
||1||त्वं राजे॑न्द्र॒ ये च॑ दे॒वा रक्षा॒ नॄन् पा॒ह्य॑सुर॒ त्वम॒स्मान् ।
त्वं सत्प॑तिर्म॒घवा॑ न॒स्तरु॑त्र॒स्त्वं स॒त्यो वस॑वानः सहो॒दाः
dano̱ viśa̍ indra mṛ̱dhravā̍caḥ sa̱pta yat pura̱: śarma̱ śāra̍dī̱rdart |
ṛ̱ṇora̱po a̍nava̱dyārṇā̱ yūne̍ vṛ̱traṃ pu̍ru̱kutsā̍ya randhīḥ
||2||दनो॒ विश॑ इन्द्र मृ॒ध्रवा॑चः स॒प्त यत् पुर॒: शर्म॒ शार॑दी॒र्दर्त् ।
ऋ॒णोर॒पो अ॑नव॒द्यार्णा॒ यूने॑ वृ॒त्रं पु॑रु॒कुत्सा॑य रन्धीः
ajā̱ vṛta̍ indra̱ śūra̍patnī̱rdyāṃ ca̱ yebhi̍: puruhūta nū̱nam |
rakṣo̍ a̱gnima̱śuṣa̱ṃ tūrva̍yāṇaṃ si̱ṃho na dame̱ apā̍ṃsi̱ vasto̍:
||3||अजा॒ वृत॑ इन्द्र॒ शूर॑पत्नी॒र्द्यां च॒ येभि॑: पुरुहूत नू॒नम् ।
रक्षो॑ अ॒ग्निम॒शुषं॒ तूर्व॑याणं सिं॒हो न दमे॒ अपां॑सि॒ वस्तो॑:
śeṣa̱n nu ta i̍ndra̱ sasmi̱n yonau̱ praśa̍staye̱ pavī̍ravasya ma̱hnā |
sṛ̱jadarṇā̱ṃsyava̱ yad yu̱dhāgāstiṣṭha̱ddharī̍ dhṛṣa̱tā mṛ̍ṣṭa̱ vājā̍n
||4||शेष॒न् नु त इ॑न्द्र॒ सस्मि॒न् योनौ॒ प्रश॑स्तये॒ पवी॑रवस्य म॒ह्ना ।
सृ॒जदर्णां॒स्यव॒ यद् यु॒धागास्तिष्ठ॒द्धरी॑ धृष॒ता मृ॑ष्ट॒ वाजा॑न्
vaha̱ kutsa̍mindra̱ yasmi̍ñcā̱kan tsyū̍ma̱nyū ṛ̱jrā vāta̱syāśvā̍ |
pra sūra̍śca̱kraṃ vṛ̍hatāda̱bhīke̱ 'bhi spṛdho̍ yāsiṣa̱d vajra̍bāhuḥ
||5||वह॒ कुत्स॑मिन्द्र॒ यस्मि॑ञ्चा॒कन् त्स्यू॑म॒न्यू ऋ॒ज्रा वात॒स्याश्वा॑ ।
प्र सूर॑श्च॒क्रं वृ॑हताद॒भीके॒ ऽभि स्पृधो॑ यासिष॒द् वज्र॑बाहुः
ja̱gha̱nvām̐ i̍ndra mi̱trerū̍ñco̱dapra̍vṛddho harivo̱ adā̍śūn |
pra ye paśya̍nnarya̱maṇa̱ṃ sacā̱yostvayā̍ śū̱rtā vaha̍mānā̱ apa̍tyam
||6||ज॒घ॒न्वाँ इ॑न्द्र मि॒त्रेरू॑ञ्चो॒दप्र॑वृद्धो हरिवो॒ अदा॑शून् ।
प्र ये पश्य॑न्नर्य॒मणं॒ सचा॒योस्त्वया॑ शू॒र्ता वह॑माना॒ अप॑त्यम्
rapa̍t ka̱viri̍ndrā̱rkasā̍tau̱ kṣāṃ dā̱sāyo̍pa̱barha̍ṇīṃ kaḥ |
kara̍t ti̱sro ma̱ghavā̱ dānu̍citrā̱ ni du̍ryo̱ṇe kuya̍vācaṃ mṛ̱dhi śre̍t
||7||रप॑त् क॒विरि॑न्द्रा॒र्कसा॑तौ॒ क्षां दा॒सायो॑प॒बर्ह॑णीं कः ।
कर॑त् ति॒स्रो म॒घवा॒ दानु॑चित्रा॒ नि दु॑र्यो॒णे कुय॑वाचं मृ॒धि श्रे॑त्
sanā̱ tā ta̍ indra̱ navyā̱ āgu̱: saho̱ nabho'vi̍raṇāya pū̱rvīḥ |
bhi̱nat puro̱ na bhido̱ ade̍vīrna̱namo̱ vadha̱rade̍vasya pī̱yoḥ
||8||सना॒ ता त॑ इन्द्र॒ नव्या॒ आगु॒: सहो॒ नभोऽवि॑रणाय पू॒र्वीः ।
भि॒नत् पुरो॒ न भिदो॒ अदे॑वीर्न॒नमो॒ वध॒रदे॑वस्य पी॒योः
tvaṃ dhuni̍rindra̱ dhuni̍matīrṛ̱ṇora̱paḥ sī̱rā na srava̍ntīḥ |
pra yat sa̍mu̱dramati̍ śūra̱ parṣi̍ pā̱rayā̍ tu̱rvaśa̱ṃ yadu̍ṃ sva̱sti
||9||त्वं धुनि॑रिन्द्र॒ धुनि॑मतीर्ऋ॒णोर॒पः सी॒रा न स्रव॑न्तीः ।
प्र यत् स॑मु॒द्रमति॑ शूर॒ पर्षि॑ पा॒रया॑ तु॒र्वशं॒ यदुं॑ स्व॒स्ति
tvama̱smāka̍mindra vi̱śvadha̍ syā avṛ̱kata̍mo na̱rāṃ nṛ̍pā̱tā |
sa no̱ viśvā̍sāṃ spṛ̱dhāṃ sa̍ho̱dā vi̱dyāme̱ṣaṃ vṛ̱jana̍ṃ jī̱radā̍num
||10||त्वम॒स्माक॑मिन्द्र वि॒श्वध॑ स्या अवृ॒कत॑मो न॒रां नृ॑पा॒ता ।
स नो॒ विश्वा॑सां स्पृ॒धां स॑हो॒दा वि॒द्यामे॒षं वृ॒जनं॑ जी॒रदा॑नुम्