Study
- Anukramaṇī
- Source
6 gotamo rāhūgaṇaḥ| indraḥ| jagatī|
aśvā̍vati pratha̱mo goṣu̍ gacchati suprā̱vīri̍ndra̱ martya̱stavo̱tibhi̍: |
tamit pṛ̍ṇakṣi̱ vasu̍nā̱ bhavī̍yasā̱ sindhu̱māpo̱ yathā̱bhito̱ vice̍tasaḥ
||1||अश्वा॑वति प्रथ॒मो गोषु॑ गच्छति सुप्रा॒वीरि॑न्द्र॒ मर्त्य॒स्तवो॒तिभि॑: ।
तमित् पृ॑णक्षि॒ वसु॑ना॒ भवी॑यसा॒ सिन्धु॒मापो॒ यथा॒भितो॒ विचे॑तसः
āpo̱ na de̱vīrupa̍ yanti ho̱triya̍ma̱vaḥ pa̍śyanti̱ vita̍ta̱ṃ yathā̱ raja̍: |
prā̱cairde̱vāsa̱: pra ṇa̍yanti deva̱yuṃ bra̍hma̱priya̍ṃ joṣayante va̱rā i̍va
||2||आपो॒ न दे॒वीरुप॑ यन्ति हो॒त्रिय॑म॒वः प॑श्यन्ति॒ वित॑तं॒ यथा॒ रज॑: ।
प्रा॒चैर्दे॒वास॒: प्र ण॑यन्ति देव॒युं ब्र॑ह्म॒प्रियं॑ जोषयन्ते व॒रा इ॑व
adhi̱ dvayo̍radadhā u̱kthyaṃ 1 vaco̍ ya̱tasru̍cā mithu̱nā yā sa̍pa̱ryata̍: |
asa̍ṃyatto vra̱te te̍ kṣeti̱ puṣya̍ti bha̱drā śa̱ktiryaja̍mānāya sunva̱te
||3||अधि॒ द्वयो॑रदधा उ॒क्थ्यं १ वचो॑ य॒तस्रु॑चा मिथु॒ना या स॑प॒र्यत॑: ।
असं॑यत्तो व्र॒ते ते॑ क्षेति॒ पुष्य॑ति भ॒द्रा श॒क्तिर्यज॑मानाय सुन्व॒ते
ādaṅgi̍rāḥ pratha̱maṃ da̍dhire̱ vaya̍ i̱ddhāgna̍ya̱: śamyā̱ ye su̍kṛ̱tyayā̍ |
sarva̍ṃ pa̱ṇeḥ sama̍vindanta̱ bhoja̍na̱maśvā̍vanta̱ṃ goma̍nta̱mā pa̱śuṃ nara̍:
||4||आदङ्गि॑राः प्रथ॒मं द॑धिरे॒ वय॑ इ॒द्धाग्न॑य॒: शम्या॒ ये सु॑कृ॒त्यया॑ ।
सर्वं॑ प॒णेः सम॑विन्दन्त॒ भोज॑न॒मश्वा॑वन्तं॒ गोम॑न्त॒मा प॒शुं नर॑:
ya̱jñairatha̍rvā pratha̱maḥ pa̱thasta̍te̱ tata̱: sūryo̍ vrata̱pā ve̱na āja̍ni |
ā gā ā̍jadu̱śanā̍ kā̱vyaḥ sacā̍ ya̱masya̍ jā̱tama̱mṛta̍ṃ yajāmahe
||5||य॒ज्ञैरथ॑र्वा प्रथ॒मः प॒थस्त॑ते॒ तत॒: सूर्यो॑ व्रत॒पा वे॒न आज॑नि ।
आ गा आ॑जदु॒शना॑ का॒व्यः सचा॑ य॒मस्य॑ जा॒तम॒मृतं॑ यजामहे
ba̱rhirvā̱ yat sva̍pa̱tyāya̍ vṛ̱jyate̱ 'rko vā̱ śloka̍mā̱ghoṣa̍te di̱vi |
grāvā̱ yatra̱ vada̍ti kā̱ruru̱kthya 1 stasyedindro̍ abhipi̱tveṣu̍ raṇyati
||6||ब॒र्हिर्वा॒ यत् स्व॑प॒त्याय॑ वृ॒ज्यते॒ ऽर्को वा॒ श्लोक॑मा॒घोष॑ते दि॒वि ।
ग्रावा॒ यत्र॒ वद॑ति का॒रुरु॒क्थ्य १ स्तस्येदिन्द्रो॑ अभिपि॒त्वेषु॑ रण्यति