Sūktam 3 — aśvinā (12 mantras) — Śākala Saṃhitā (Ṛgveda)

Study

aśvi̍nā̱ yajva̍rī̱riṣo̱ drava̍tpāṇī̱ śubha̍spatī| puru̍bhujā cana̱syata̍m

||1||

अश्वि॑ना॒ यज्व॑री॒रिषो॒ द्रव॑त्पाणी॒ शुभ॑स्पती। पुरु॑भुजा चन॒स्यत॑म्

aśvi̍nā̱ puru̍daṃsasā̱ narā̱ śavī̍rayā dhi̱yā| dhiṣṇyā̱ vana̍ta̱ṃ gira̍:

||2||

अश्वि॑ना॒ पुरु॑दंससा॒ नरा॒ शवी॑रया धि॒या। धिष्ण्या॒ वन॑तं॒ गिर॑:

dasrā̍ yu̱vāka̍vaḥ su̱tā nāsa̍tyā vṛ̱ktaba̍rhiṣaḥ| ā yā̍taṃ rudravartanī

||3||

दस्रा॑ यु॒वाक॑वः सु॒ता नास॑त्या वृ॒क्तब॑र्हिषः। आ या॑तं रुद्रवर्तनी

indrā yā̍hi citrabhāno su̱tā i̱me tvā̱yava̍:| aṇvī̍bhi̱stanā̍ pū̱tāsa̍:

||4||

इन्द्रा या॑हि चित्रभानो सु॒ता इ॒मे त्वा॒यव॑:। अण्वी॑भि॒स्तना॑ पू॒तास॑:

indrā yā̍hi dhi̱yeṣi̱to vipra̍jūtaḥ su̱tāva̍taḥ| upa̱ brahmā̍ṇi vā̱ghata̍:

||5||

इन्द्रा या॑हि धि॒येषि॒तो विप्र॑जूतः सु॒ताव॑तः। उप॒ ब्रह्मा॑णि वा॒घत॑:

indrā yā̍hi̱ tūtu̍jāna̱ upa̱ brahmā̍ṇi harivaḥ| su̱te da̍dhiṣva na̱ścana̍:

||6||

इन्द्रा या॑हि॒ तूतु॑जान॒ उप॒ ब्रह्मा॑णि हरिवः। सु॒ते द॑धिष्व न॒श्चन॑:

omā̍saścarṣaṇīdhṛto̱ viśve̍ devāsa̱ ā ga̍ta| dā̱śvāṃso̍ dā̱śuṣa̍: su̱tam

||7||

ओमा॑सश्चर्षणीधृतो॒ विश्वे॑ देवास॒ आ ग॑त। दा॒श्वांसो॑ दा॒शुष॑: सु॒तम्

viśve̍ de̱vāso̍ a̱ptura̍: su̱tamā ga̍nta̱ tūrṇa̍yaḥ| u̱srā i̍va̱ svasa̍rāṇi

||8||

विश्वे॑ दे॒वासो॑ अ॒प्तुर॑: सु॒तमा ग॑न्त॒ तूर्ण॑यः। उ॒स्रा इ॑व॒ स्वस॑राणि

viśve̍ de̱vāso̍ a̱sridha̱ ehi̍māyāso a̱druha̍:| medha̍ṃ juṣanta̱ vahna̍yaḥ

||9||

विश्वे॑ दे॒वासो॑ अ॒स्रिध॒ एहि॑मायासो अ॒द्रुह॑:। मेधं॑ जुषन्त॒ वह्न॑यः

pā̱va̱kā na̱: sara̍svatī̱ vāje̍bhirvā̱jinī̍vatī| ya̱jñaṃ va̍ṣṭu dhi̱yāva̍suḥ

||10||

पा॒व॒का न॒: सर॑स्वती॒ वाजे॑भिर्वा॒जिनी॑वती। य॒ज्ञं व॑ष्टु धि॒याव॑सुः

co̱da̱yi̱trī sū̱nṛtā̍nā̱ṃ ceta̍ntī sumatī̱nām| ya̱jñaṃ da̍dhe̱ sara̍svatī

||11||

चो॒द॒यि॒त्री सू॒नृता॑नां॒ चेत॑न्ती सुमती॒नाम्। य॒ज्ञं द॑धे॒ सर॑स्वती

ma̱ho arṇa̱: sara̍svatī̱ pra ce̍tayati ke̱tunā̍| dhiyo̱ viśvā̱ vi rā̍jati

||12||

म॒हो अर्ण॒: सर॑स्वती॒ प्र चे॑तयति के॒तुना॑। धियो॒ विश्वा॒ वि रा॑जति