Study
- Anukramaṇī
- Source
10 parucchepo daivodāsiḥ | indraḥ| atyaṣṭiḥ, 10 triṣṭup|
endra̍ yā̱hyupa̍ naḥ parā̱vato̱ nāyamacchā̍ vi̱dathā̍nīva̱ satpa̍ti̱rasta̱ṃ rāje̍va̱ satpa̍tiḥ |
havā̍mahe tvā va̱yaṃ praya̍svantaḥ su̱te sacā̍ |
pu̱trāso̱ na pi̱tara̱ṃ vāja̍sātaye̱ maṃhi̍ṣṭha̱ṃ vāja̍sātaye
||1||एन्द्र॑ या॒ह्युप॑ नः परा॒वतो॒ नायमच्छा॑ वि॒दथा॑नीव॒ सत्प॑ति॒रस्तं॒ राजे॑व॒ सत्प॑तिः ।
हवा॑महे त्वा व॒यं प्रय॑स्वन्तः सु॒ते सचा॑ ।
पु॒त्रासो॒ न पि॒तरं॒ वाज॑सातये॒ मंहि॑ष्ठं॒ वाज॑सातये
pibā̱ soma̍mindra suvā̱namadri̍bhi̱: kośe̍na si̱ktama̍va̱taṃ na vaṃsa̍gastātṛṣā̱ṇo na vaṃsa̍gaḥ |
madā̍ya harya̱tāya̍ te tu̱viṣṭa̍māya̱ dhāya̍se |
ā tvā̍ yacchantu ha̱rito̱ na sūrya̱mahā̱ viśve̍va̱ sūrya̍m
||2||पिबा॒ सोम॑मिन्द्र सुवा॒नमद्रि॑भि॒: कोशे॑न सि॒क्तम॑व॒तं न वंस॑गस्तातृषा॒णो न वंस॑गः ।
मदा॑य हर्य॒ताय॑ ते तु॒विष्ट॑माय॒ धाय॑से ।
आ त्वा॑ यच्छन्तु ह॒रितो॒ न सूर्य॒महा॒ विश्वे॑व॒ सूर्य॑म्
avi̍ndad di̱vo nihi̍ta̱ṃ guhā̍ ni̱dhiṃ verna garbha̱ṃ pari̍vīta̱maśma̍nyana̱nte a̱ntaraśma̍ni |
vra̱jaṃ va̱jrī gavā̍miva̱ siṣā̍sa̱nnaṅgi̍rastamaḥ |
apā̍vṛṇo̱diṣa̱ indra̱: parī̍vṛtā̱ dvāra̱ iṣa̱: parī̍vṛtāḥ
||3||अवि॑न्दद् दि॒वो निहि॑तं॒ गुहा॑ नि॒धिं वेर्न गर्भं॒ परि॑वीत॒मश्म॑न्यन॒न्ते अ॒न्तरश्म॑नि ।
व्र॒जं व॒ज्री गवा॑मिव॒ सिषा॑स॒न्नङ्गि॑रस्तमः ।
अपा॑वृणो॒दिष॒ इन्द्र॒: परी॑वृता॒ द्वार॒ इष॒: परी॑वृताः
dā̱dṛ̱hā̱ṇo vajra̱mindro̱ gabha̍styo̱: kṣadme̍va ti̱gmamasa̍nāya̱ saṃ śya̍dahi̱hatyā̍ya̱ saṃ śya̍t |
sa̱ṃvi̱vyā̱na oja̍sā̱ śavo̍bhirindra ma̱jmanā̍ |
taṣṭe̍va vṛ̱kṣaṃ va̱nino̱ ni vṛ̍ścasi para̱śveva̱ ni vṛ̍ścasi
||4||दा॒दृ॒हा॒णो वज्र॒मिन्द्रो॒ गभ॑स्त्यो॒: क्षद्मे॑व ति॒ग्ममस॑नाय॒ सं श्य॑दहि॒हत्या॑य॒ सं श्य॑त् ।
सं॒वि॒व्या॒न ओज॑सा॒ शवो॑भिरिन्द्र म॒ज्मना॑ ।
तष्टे॑व वृ॒क्षं व॒निनो॒ नि वृ॑श्चसि पर॒श्वेव॒ नि वृ॑श्चसि
tvaṃ vṛthā̍ na̱dya̍ indra̱ sarta̱ve 'cchā̍ samu̱drama̍sṛjo̱ rathā̍m̐ iva vājaya̱to rathā̍m̐ iva |
i̱ta ū̱tīra̍yuñjata samā̱namartha̱makṣi̍tam |
dhe̱nūri̍va̱ mana̍ve vi̱śvado̍haso̱ janā̍ya vi̱śvado̍hasaḥ
||5||त्वं वृथा॑ न॒द्य॑ इन्द्र॒ सर्त॒वे ऽच्छा॑ समु॒द्रम॑सृजो॒ रथाँ॑ इव वाजय॒तो रथाँ॑ इव ।
इ॒त ऊ॒तीर॑युञ्जत समा॒नमर्थ॒मक्षि॑तम् ।
धे॒नूरि॑व॒ मन॑वे वि॒श्वदो॑हसो॒ जना॑य वि॒श्वदो॑हसः
i̱māṃ te̱ vāca̍ṃ vasū̱yanta̍ ā̱yavo̱ ratha̱ṃ na dhīra̱: svapā̍ atakṣiṣuḥ su̱mnāya̱ tvāma̍takṣiṣuḥ |
śu̱mbhanto̱ jenya̍ṃ yathā̱ vāje̍ṣu vipra vā̱jina̍m |
atya̍miva̱ śava̍se sā̱taye̱ dhanā̱ viśvā̱ dhanā̍ni sā̱taye̍
||6||इ॒मां ते॒ वाचं॑ वसू॒यन्त॑ आ॒यवो॒ रथं॒ न धीर॒: स्वपा॑ अतक्षिषुः सु॒म्नाय॒ त्वाम॑तक्षिषुः ।
शु॒म्भन्तो॒ जेन्यं॑ यथा॒ वाजे॑षु विप्र वा॒जिन॑म् ।
अत्य॑मिव॒ शव॑से सा॒तये॒ धना॒ विश्वा॒ धना॑नि सा॒तये॑
bhi̱nat puro̍ nava̱timi̍ndra pū̱rave̱ divo̍dāsāya̱ mahi̍ dā̱śuṣe̍ nṛto̱ vajre̍ṇa dā̱śuṣe̍ nṛto |
a̱ti̱thi̱gvāya̱ śamba̍raṃ gi̱reru̱gro avā̍bharat |
ma̱ho dhanā̍ni̱ daya̍māna̱ oja̍sā̱ viśvā̱ dhanā̱nyoja̍sā
||7||भि॒नत् पुरो॑ नव॒तिमि॑न्द्र पू॒रवे॒ दिवो॑दासाय॒ महि॑ दा॒शुषे॑ नृतो॒ वज्रे॑ण दा॒शुषे॑ नृतो ।
अ॒ति॒थि॒ग्वाय॒ शम्ब॑रं गि॒रेरु॒ग्रो अवा॑भरत् ।
म॒हो धना॑नि॒ दय॑मान॒ ओज॑सा॒ विश्वा॒ धना॒न्योज॑सा
indra̍: sa̱matsu̱ yaja̍māna̱mārya̱ṃ prāva̱d viśve̍ṣu śa̱tamū̍tirā̱jiṣu̱ sva̍rmīhleṣvā̱jiṣu̍ |
mana̍ve̱ śāsa̍davra̱tān tvaca̍ṃ kṛ̱ṣṇāma̍randhayat |
dakṣa̱nna viśva̍ṃ tatṛṣā̱ṇamo̍ṣati̱ nya̍rśasā̱namo̍ṣati
||8||इन्द्र॑: स॒मत्सु॒ यज॑मान॒मार्यं॒ प्राव॒द् विश्वे॑षु श॒तमू॑तिरा॒जिषु॒ स्व॑र्मीह्लेष्वा॒जिषु॑ ।
मन॑वे॒ शास॑दव्र॒तान् त्वचं॑ कृ॒ष्णाम॑रन्धयत् ।
दक्ष॒न्न विश्वं॑ ततृषा॒णमो॑षति॒ न्य॑र्शसा॒नमो॑षति
sūra̍śca̱kraṃ pra vṛ̍hajjā̱ta oja̍sā prapi̱tve vāca̍maru̱ṇo mu̍ṣāyatīśā̱na ā mu̍ṣāyati |
u̱śanā̱ yat pa̍rā̱vato 'ja̍gannū̱taye̍ kave |
su̱mnāni̱ viśvā̱ manu̍ṣeva tu̱rvaṇi̱rahā̱ viśve̍va tu̱rvaṇi̍:
||9||सूर॑श्च॒क्रं प्र वृ॑हज्जा॒त ओज॑सा प्रपि॒त्वे वाच॑मरु॒णो मु॑षायतीशा॒न आ मु॑षायति ।
उ॒शना॒ यत् प॑रा॒वतो ऽज॑गन्नू॒तये॑ कवे ।
सु॒म्नानि॒ विश्वा॒ मनु॑षेव तु॒र्वणि॒रहा॒ विश्वे॑व तु॒र्वणि॑:
sa no̱ navye̍bhirvṛṣakarmannu̱kthaiḥ purā̍ṃ dartaḥ pā̱yubhi̍: pāhi śa̱gmaiḥ |
di̱vo̱dā̱sebhi̍rindra̱ stavā̍no vāvṛdhī̱thā aho̍bhiriva̱ dyauḥ
||10||स नो॒ नव्ये॑भिर्वृषकर्मन्नु॒क्थैः पुरां॑ दर्तः पा॒युभि॑: पाहि श॒ग्मैः ।
दि॒वो॒दा॒सेभि॑रिन्द्र॒ स्तवा॑नो वावृधी॒था अहो॑भिरिव॒ द्यौः