Study
- Anukramaṇī
- Source
6 parucchepo daivodāsiḥ | indraḥ, 6 (1ardharcasya) indrāparvatau| atyaṣṭiḥ|
tvayā̍ va̱yaṃ ma̍ghava̱n pūrvye̱ dhana̱ indra̍tvotāḥ sāsahyāma pṛtanya̱to va̍nu̱yāma̍ vanuṣya̱taḥ |
nedi̍ṣṭhe a̱sminnaha̱nyadhi̍ vocā̱ nu su̍nva̱te |
a̱smin ya̱jñe vi ca̍yemā̱ bhare̍ kṛ̱taṃ vā̍ja̱yanto̱ bhare̍ kṛ̱tam
||1||त्वया॑ व॒यं म॑घव॒न् पूर्व्ये॒ धन॒ इन्द्र॑त्वोताः सासह्याम पृतन्य॒तो व॑नु॒याम॑ वनुष्य॒तः ।
नेदि॑ष्ठे अ॒स्मिन्नह॒न्यधि॑ वोचा॒ नु सु॑न्व॒ते ।
अ॒स्मिन् य॒ज्ञे वि च॑येमा॒ भरे॑ कृ॒तं वा॑ज॒यन्तो॒ भरे॑ कृ॒तम्
sva̱rje̱ṣe bhara̍ ā̱prasya̱ vakma̍nyuṣa̱rbudha̱: svasmi̱nnañja̍si krā̱ṇasya̱ svasmi̱nnañja̍si |
aha̱nnindro̱ yathā̍ vi̱de śī̱rṣṇāśī̍rṣṇopa̱vācya̍: |
a̱sma̱trā te̍ sa̱dhrya̍k santu rā̱tayo̍ bha̱drā bha̱drasya̍ rā̱taya̍:
||2||स्व॒र्जे॒षे भर॑ आ॒प्रस्य॒ वक्म॑न्युष॒र्बुध॒: स्वस्मि॒न्नञ्ज॑सि क्रा॒णस्य॒ स्वस्मि॒न्नञ्ज॑सि ।
अह॒न्निन्द्रो॒ यथा॑ वि॒दे शी॒र्ष्णाशी॑र्ष्णोप॒वाच्य॑: ।
अ॒स्म॒त्रा ते॑ स॒ध्र्य॑क् सन्तु रा॒तयो॑ भ॒द्रा भ॒द्रस्य॑ रा॒तय॑:
tat tu praya̍: pra̱tnathā̍ te śuśukva̱naṃ yasmi̍n ya̱jñe vāra̱makṛ̍ṇvata̱ kṣaya̍mṛ̱tasya̱ vāra̍si̱ kṣaya̍m |
vi tad vo̍ce̱radha̍ dvi̱tā'ntaḥ pa̍śyanti ra̱śmibhi̍: |
sa ghā̍ vide̱ anvindro̍ ga̱veṣa̍ṇo bandhu̱kṣidbhyo̍ ga̱veṣa̍ṇaḥ
||3||तत् तु प्रय॑: प्र॒त्नथा॑ ते शुशुक्व॒नं यस्मि॑न् य॒ज्ञे वार॒मकृ॑ण्वत॒ क्षय॑मृ॒तस्य॒ वार॑सि॒ क्षय॑म् ।
वि तद् वो॑चे॒रध॑ द्वि॒ताऽन्तः प॑श्यन्ति र॒श्मिभि॑: ।
स घा॑ विदे॒ अन्विन्द्रो॑ ग॒वेष॑णो बन्धु॒क्षिद्भ्यो॑ ग॒वेष॑णः
nū i̱tthā te̍ pū̱rvathā̍ ca pra̱vācya̱ṃ yadaṅgi̍ro̱bhyo'vṛ̍ṇo̱rapa̍ vra̱jamindra̱ śikṣa̱nnapa̍ vra̱jam |
aibhya̍: samā̱nyā di̱śā 'smabhya̍ṃ jeṣi̱ yotsi̍ ca |
su̱nvadbhyo̍ randhayā̱ kaṃ ci̍davra̱taṃ hṛ̍ṇā̱yanta̍ṃ cidavra̱tam
||4||नू इ॒त्था ते॑ पू॒र्वथा॑ च प्र॒वाच्यं॒ यदङ्गि॑रो॒भ्योऽवृ॑णो॒रप॑ व्र॒जमिन्द्र॒ शिक्ष॒न्नप॑ व्र॒जम् ।
ऐभ्य॑: समा॒न्या दि॒शा ऽस्मभ्यं॑ जेषि॒ योत्सि॑ च ।
सु॒न्वद्भ्यो॑ रन्धया॒ कं चि॑दव्र॒तं हृ॑णा॒यन्तं॑ चिदव्र॒तम्
saṃ yajjanā̱n kratu̍bhi̱: śūra̍ ī̱kṣaya̱ddhane̍ hi̱te ta̍ruṣanta śrava̱syava̱: pra ya̍kṣanta śrava̱syava̍: |
tasmā̱ āyu̍: pra̱jāva̱did bādhe̍ arca̱ntyoja̍sā |
indra̍ o̱kya̍ṃ didhiṣanta dhī̱tayo̍ de̱vām̐ acchā̱ na dhī̱taya̍:
||5||सं यज्जना॒न् क्रतु॑भि॒: शूर॑ ई॒क्षय॒द्धने॑ हि॒ते त॑रुषन्त श्रव॒स्यव॒: प्र य॑क्षन्त श्रव॒स्यव॑: ।
तस्मा॒ आयु॑: प्र॒जाव॒दिद् बाधे॑ अर्च॒न्त्योज॑सा ।
इन्द्र॑ ओ॒क्यं॑ दिधिषन्त धी॒तयो॑ दे॒वाँ अच्छा॒ न धी॒तय॑:
yu̱vaṃ tami̍ndrāparvatā puro̱yudhā̱ yo na̍: pṛta̱nyādapa̱ taṃta̱middha̍ta̱ṃ vajre̍ṇa̱ taṃta̱middha̍tam |
dū̱re ca̱ttāya̍ cchantsa̱d gaha̍na̱ṃ yadina̍kṣat |
a̱smāka̱ṃ śatrū̱n pari̍ śūra vi̱śvato̍ da̱rmā da̍rṣīṣṭa vi̱śvata̍:
||6||यु॒वं तमि॑न्द्रापर्वता पुरो॒युधा॒ यो न॑: पृत॒न्यादप॒ तंत॒मिद्ध॑तं॒ वज्रे॑ण॒ तंत॒मिद्ध॑तम् ।
दू॒रे च॒त्ताय॑ च्छन्त्स॒द् गह॑नं॒ यदिन॑क्षत् ।
अ॒स्माकं॒ शत्रू॒न् परि॑ शूर वि॒श्वतो॑ द॒र्मा द॑र्षीष्ट वि॒श्वत॑: