Study
- Anukramaṇī
- Source
13 agastyo maitrāvaruṇiḥ | indraḥ| triṣṭup, 4 virāṭ sthānā, viṣamapadā vā|
gāya̱t sāma̍ nabha̱nyaṃ1 yathā̱ verarcā̍ma̱ tad vā̍vṛdhā̱naṃ sva̍rvat |
gāvo̍ dhe̱navo̍ ba̱rhiṣyada̍bdhā̱ ā yat sa̱dmāna̍ṃ di̱vyaṃ vivā̍sān
||1||गाय॒त् साम॑ नभ॒न्यं१ यथा॒ वेरर्चा॑म॒ तद् वा॑वृधा॒नं स्व॑र्वत् ।
गावो॑ धे॒नवो॑ ब॒र्हिष्यद॑ब्धा॒ आ यत् स॒द्मानं॑ दि॒व्यं विवा॑सान्
arca̱d vṛṣā̱ vṛṣa̍bhi̱: svedu̍havyairmṛ̱go nāśno̱ ati̱ yajju̍gu̱ryāt |
pra ma̍nda̱yurma̱nāṃ gū̍rta̱ hotā̱ bhara̍te̱ maryo̍ mithu̱nā yaja̍traḥ
||2||अर्च॒द् वृषा॒ वृष॑भि॒: स्वेदु॑हव्यैर्मृ॒गो नाश्नो॒ अति॒ यज्जु॑गु॒र्यात् ।
प्र म॑न्द॒युर्म॒नां गू॑र्त॒ होता॒ भर॑ते॒ मर्यो॑ मिथु॒ना यज॑त्रः
nakṣa̱ddhotā̱ pari̱ sadma̍ mi̱tā yan bhara̱d garbha̱mā śa̱rada̍: pṛthi̱vyāḥ |
kranda̱daśvo̱ naya̍māno ru̱vad gaura̱ntardū̱to na roda̍sī cara̱d vāk
||3||नक्ष॒द्धोता॒ परि॒ सद्म॑ मि॒ता यन् भर॒द् गर्भ॒मा श॒रद॑: पृथि॒व्याः ।
क्रन्द॒दश्वो॒ नय॑मानो रु॒वद् गौर॒न्तर्दू॒तो न रोद॑सी चर॒द् वाक्
tā ka̱rmāṣa̍tarāsmai̱ pra cyau̱tnāni̍ deva̱yanto̍ bharante |
jujo̍ṣa̱dindro̍ da̱smava̍rcā̱ nāsa̍tyeva̱ sugmyo̍ rathe̱ṣṭhāḥ
||4||ता क॒र्माष॑तरास्मै॒ प्र च्यौ॒त्नानि॑ देव॒यन्तो॑ भरन्ते ।
जुजो॑ष॒दिन्द्रो॑ द॒स्मव॑र्चा॒ नास॑त्येव॒ सुग्म्यो॑ रथे॒ष्ठाः
tamu̍ ṣṭu̱hīndra̱ṃ yo ha̱ satvā̱ yaḥ śūro̍ ma̱ghavā̱ yo ra̍the̱ṣṭhāḥ |
pra̱tī̱caści̱d yodhī̍yā̱n vṛṣa̍ṇvān vava̱vruṣa̍ści̱ttama̍so viha̱ntā
||5||तमु॑ ष्टु॒हीन्द्रं॒ यो ह॒ सत्वा॒ यः शूरो॑ म॒घवा॒ यो र॑थे॒ष्ठाः ।
प्र॒ती॒चश्चि॒द् योधी॑या॒न् वृष॑ण्वान् वव॒व्रुष॑श्चि॒त्तम॑सो विह॒न्ता
pra yadi̱tthā ma̍hi̱nā nṛbhyo̱ astyara̱ṃ roda̍sī ka̱kṣye̱3 nāsmai̍ |
saṃ vi̍vya̱ indro̍ vṛ̱jana̱ṃ na bhūmā̱ bharti̍ sva̱dhāvā̍m̐ opa̱śami̍va̱ dyām
||6||प्र यदि॒त्था म॑हि॒ना नृभ्यो॒ अस्त्यरं॒ रोद॑सी क॒क्ष्ये॒३ नास्मै॑ ।
सं वि॑व्य॒ इन्द्रो॑ वृ॒जनं॒ न भूमा॒ भर्ति॑ स्व॒धावाँ॑ ओप॒शमि॑व॒ द्याम्
sa̱matsu̍ tvā śūra sa̱tāmu̍rā̱ṇaṃ pra̍pa̱thinta̍maṃ paritaṃsa̱yadhyai̍ |
sa̱joṣa̍sa̱ indra̱ṃ made̍ kṣo̱ṇīḥ sū̱riṃ ci̱dye a̍nu̱mada̍nti̱ vājai̍:
||7||स॒मत्सु॑ त्वा शूर स॒तामु॑रा॒णं प्र॑प॒थिन्त॑मं परितंस॒यध्यै॑ ।
स॒जोष॑स॒ इन्द्रं॒ मदे॑ क्षो॒णीः सू॒रिं चि॒द्ये अ॑नु॒मद॑न्ति॒ वाजै॑:
e̱vā hi te̱ śaṃ sava̍nā samu̱dra āpo̱ yat ta̍ ā̱su mada̍nti de̱vīḥ |
viśvā̍ te̱ anu̱ joṣyā̍ bhū̱d gauḥ sū̱rīm̐ści̱d yadi̍ dhi̱ṣā veṣi̱ janā̍n
||8||ए॒वा हि ते॒ शं सव॑ना समु॒द्र आपो॒ यत् त॑ आ॒सु मद॑न्ति दे॒वीः ।
विश्वा॑ ते॒ अनु॒ जोष्या॑ भू॒द् गौः सू॒रीँश्चि॒द् यदि॑ धि॒षा वेषि॒ जना॑न्
asā̍ma̱ yathā̍ suṣa̱khāya̍ ena svabhi̱ṣṭayo̍ na̱rāṃ na śaṃsai̍: |
asa̱d yathā̍ na̱ indro̍ vandane̱ṣṭhāstu̱ro na karma̱ naya̍māna u̱kthā
||9||असा॑म॒ यथा॑ सुष॒खाय॑ एन स्वभि॒ष्टयो॑ न॒रां न शंसै॑: ।
अस॒द् यथा॑ न॒ इन्द्रो॑ वन्दने॒ष्ठास्तु॒रो न कर्म॒ नय॑मान उ॒क्था
viṣpa̍rdhaso na̱rāṃ na śaṃsai̍ra̱smākā̍sa̱dindro̱ vajra̍hastaḥ |
mi̱trā̱yuvo̱ na pūrpa̍ti̱ṃ suśi̍ṣṭau madhyā̱yuva̱ upa̍ śikṣanti ya̱jñaiḥ
||10||विष्प॑र्धसो न॒रां न शंसै॑र॒स्माका॑स॒दिन्द्रो॒ वज्र॑हस्तः ।
मि॒त्रा॒युवो॒ न पूर्प॑तिं॒ सुशि॑ष्टौ मध्या॒युव॒ उप॑ शिक्षन्ति य॒ज्ञैः
ya̱jño hi ṣmendra̱ṃ kaści̍dṛ̱ndhañju̍hurā̱ṇaści̱nmana̍sā pari̱yan |
tī̱rthe nācchā̍ tātṛṣā̱ṇamoko̍ dī̱rgho na si̱dhramā kṛ̍ṇo̱tyadhvā̍
||11||य॒ज्ञो हि ष्मेन्द्रं॒ कश्चि॑दृ॒न्धञ्जु॑हुरा॒णश्चि॒न्मन॑सा परि॒यन् ।
ती॒र्थे नाच्छा॑ तातृषा॒णमोको॑ दी॒र्घो न सि॒ध्रमा कृ॑णो॒त्यध्वा॑
mo ṣū ṇa̍ i̱ndrātra̍ pṛ̱tsu de̱vairasti̱ hi ṣmā̍ te śuṣminnava̱yāḥ |
ma̱haści̱d yasya̍ mī̱l̤ahuṣo̍ ya̱vyā ha̱viṣma̍to ma̱ruto̱ vanda̍te̱ gīḥ
||12||मो षू ण॑ इ॒न्द्रात्र॑ पृ॒त्सु दे॒वैरस्ति॒ हि ष्मा॑ ते शुष्मिन्नव॒याः ।
म॒हश्चि॒द् यस्य॑ मी॒ळहुषो॑ य॒व्या ह॒विष्म॑तो म॒रुतो॒ वन्द॑ते॒ गीः
e̱ṣa stoma̍ indra̱ tubhya̍ma̱sme e̱tena̍ gā̱tuṃ ha̍rivo vido naḥ |
ā no̍ vavṛtyāḥ suvi̱tāya̍ deva vi̱dyāme̱ṣaṃ vṛ̱jana̍ṃ jī̱radā̍num
||13||ए॒ष स्तोम॑ इन्द्र॒ तुभ्य॑म॒स्मे ए॒तेन॑ गा॒तुं ह॑रिवो विदो नः ।
आ नो॑ ववृत्याः सुवि॒ताय॑ देव वि॒द्यामे॒षं वृ॒जनं॑ जी॒रदा॑नुम्