Study
- Anukramaṇī
- Source
11 agastyo maitrāvaruṇiḥ | dyāvāpṛthivyau| triṣṭup|
ka̱ta̱rā pūrvā̍ kata̱rāpa̍rā̱yoḥ ka̱thā jā̱te ka̍vaya̱: ko vi ve̍da |
viśva̱ṃ tmanā̍ bibhṛto̱ yaddha̱ nāma̱ vi va̍rtete̱ aha̍nī ca̱kriye̍va
||1||क॒त॒रा पूर्वा॑ कत॒राप॑रा॒योः क॒था जा॒ते क॑वय॒: को वि वे॑द ।
विश्वं॒ त्मना॑ बिभृतो॒ यद्ध॒ नाम॒ वि व॑र्तेते॒ अह॑नी च॒क्रिये॑व
bhūri̱ṃ dve aca̍rantī̱ cara̍ntaṃ pa̱dvanta̱ṃ garbha̍ma̱padī̍ dadhāte |
nitya̱ṃ na sū̱nuṃ pi̱troru̱pasthe̱ dyāvā̱ rakṣa̍taṃ pṛthivī no̱ abhvā̍t
||2||भूरिं॒ द्वे अच॑रन्ती॒ चर॑न्तं प॒द्वन्तं॒ गर्भ॑म॒पदी॑ दधाते ।
नित्यं॒ न सू॒नुं पि॒त्रोरु॒पस्थे॒ द्यावा॒ रक्ष॑तं पृथिवी नो॒ अभ्वा॑त्
a̱ne̱ho dā̱tramadi̍terana̱rvaṃ hu̱ve sva̍rvadava̱dhaṃ nama̍svat |
tad ro̍dasī janayataṃ jari̱tre dyāvā̱ rakṣa̍taṃ pṛthivī no̱ abhvā̍t
||3||अ॒ने॒हो दा॒त्रमदि॑तेरन॒र्वं हु॒वे स्व॑र्वदव॒धं नम॑स्वत् ।
तद् रो॑दसी जनयतं जरि॒त्रे द्यावा॒ रक्ष॑तं पृथिवी नो॒ अभ्वा॑त्
ata̍pyamāne̱ ava̱sāva̍ntī̱ anu̍ ṣyāma̱ roda̍sī de̱vapu̍tre |
u̱bhe de̱vānā̍mu̱bhaye̍bhi̱rahnā̱ṃ dyāvā̱ rakṣa̍taṃ pṛthivī no̱ abhvā̍t
||4||अत॑प्यमाने॒ अव॒साव॑न्ती॒ अनु॑ ष्याम॒ रोद॑सी दे॒वपु॑त्रे ।
उ॒भे दे॒वाना॑मु॒भये॑भि॒रह्नां॒ द्यावा॒ रक्ष॑तं पृथिवी नो॒ अभ्वा॑त्
sa̱ṃgaccha̍māne yuva̱tī sama̍nte̱ svasā̍rā jā̱mī pi̱troru̱pasthe̍ |
a̱bhi̱jighra̍ntī̱ bhuva̍nasya̱ nābhi̱ṃ dyāvā̱ rakṣa̍taṃ pṛthivī no̱ abhvā̍t
||5||सं॒गच्छ॑माने युव॒ती सम॑न्ते॒ स्वसा॑रा जा॒मी पि॒त्रोरु॒पस्थे॑ ।
अ॒भि॒जिघ्र॑न्ती॒ भुव॑नस्य॒ नाभिं॒ द्यावा॒ रक्ष॑तं पृथिवी नो॒ अभ्वा॑त्
u̱rvī sadma̍nī bṛha̱tī ṛ̱tena̍ hu̱ve de̱vānā̱mava̍sā̱ jani̍trī |
da̱dhāte̱ ye a̱mṛta̍ṃ su̱pratī̍ke̱ dyāvā̱ rakṣa̍taṃ pṛthivī no̱ abhvā̍t
||6||उ॒र्वी सद्म॑नी बृह॒ती ऋ॒तेन॑ हु॒वे दे॒वाना॒मव॑सा॒ जनि॑त्री ।
द॒धाते॒ ये अ॒मृतं॑ सु॒प्रती॑के॒ द्यावा॒ रक्ष॑तं पृथिवी नो॒ अभ्वा॑त्
u̱rvī pṛ̱thvī ba̍hu̱le dū̱rea̍nte̱ upa̍ bruve̱ nama̍sā ya̱jñe a̱smin |
da̱dhāte̱ ye su̱bhage̍ su̱pratū̍rtī̱ dyāvā̱ rakṣa̍taṃ pṛthivī no̱ abhvā̍t
||7||उ॒र्वी पृ॒थ्वी ब॑हु॒ले दू॒रेअ॑न्ते॒ उप॑ ब्रुवे॒ नम॑सा य॒ज्ञे अ॒स्मिन् ।
द॒धाते॒ ये सु॒भगे॑ सु॒प्रतू॑र्ती॒ द्यावा॒ रक्ष॑तं पृथिवी नो॒ अभ्वा॑त्
de̱vān vā̱ yacca̍kṛ̱mā kacci̱dāga̱: sakhā̍yaṃ vā̱ sada̱mijjāspa̍tiṃ vā |
i̱yaṃ dhīrbhū̍yā ava̱yāna̍meṣā̱ṃ dyāvā̱ rakṣa̍taṃ pṛthivī no̱ abhvā̍t
||8||दे॒वान् वा॒ यच्च॑कृ॒मा कच्चि॒दाग॒: सखा॑यं वा॒ सद॒मिज्जास्प॑तिं वा ।
इ॒यं धीर्भू॑या अव॒यान॑मेषां॒ द्यावा॒ रक्ष॑तं पृथिवी नो॒ अभ्वा॑त्
u̱bhā śaṃsā̱ naryā̱ māma̍viṣṭāmu̱bhe māmū̱tī ava̍sā sacetām |
bhūri̍ cida̱ryaḥ su̱dāsta̍rāye̱ṣā mada̍nta iṣayema devāḥ
||9||उ॒भा शंसा॒ नर्या॒ माम॑विष्टामु॒भे मामू॒ती अव॑सा सचेताम् ।
भूरि॑ चिद॒र्यः सु॒दास्त॑राये॒षा मद॑न्त इषयेम देवाः
ṛ̱taṃ di̱ve tada̍vocaṃ pṛthi̱vyā a̍bhiśrā̱vāya̍ pratha̱maṃ su̍me̱dhāḥ |
pā̱tāma̍va̱dyād du̍ri̱tāda̱bhīke̍ pi̱tā mā̱tā ca̍ rakṣatā̱mavo̍bhiḥ
||10||ऋ॒तं दि॒वे तद॑वोचं पृथि॒व्या अ॑भिश्रा॒वाय॑ प्रथ॒मं सु॑मे॒धाः ।
पा॒ताम॑व॒द्याद् दु॑रि॒ताद॒भीके॑ पि॒ता मा॒ता च॑ रक्षता॒मवो॑भिः
i̱daṃ dyā̍vāpṛthivī sa̱tyama̍stu̱ pita̱rmāta̱ryadi̱hopa̍bru̱ve vā̍m |
bhū̱taṃ de̱vānā̍mava̱me avo̍bhirvi̱dyāme̱ṣaṃ vṛ̱jana̍ṃ jī̱radā̍num
||11||इ॒दं द्या॑वापृथिवी स॒त्यम॑स्तु॒ पित॒र्मात॒र्यदि॒होप॑ब्रु॒वे वा॑म् ।
भू॒तं दे॒वाना॑मव॒मे अवो॑भिर्वि॒द्यामे॒षं वृ॒जनं॑ जी॒रदा॑नुम्