Study
- Anukramaṇī
- Source
10 praskaṇvaḥ kāṇvaḥ| agniḥ, 10 (uttarārdhasya) devāḥ| anuṣṭup|
tvama̍gne̱ vasū̍m̐ri̱ha ru̱drām̐ ā̍di̱tyām̐ u̱ta | yajā̍ svadhva̱raṃ jana̱ṃ manu̍jātaṃ ghṛta̱pruṣa̍m
||1||त्वम॑ग्ने॒ वसूँ॑रि॒ह रु॒द्राँ आ॑दि॒त्याँ उ॒त । यजा॑ स्वध्व॒रं जनं॒ मनु॑जातं घृत॒प्रुष॑म्
śru̱ṣṭī̱vāno̱ hi dā̱śuṣe̍ de̱vā a̍gne̱ vice̍tasaḥ | tān ro̍hidaśva girvaṇa̱s traya̍striṃśata̱mā va̍ha
||2||श्रु॒ष्टी॒वानो॒ हि दा॒शुषे॑ दे॒वा अ॑ग्ने॒ विचे॑तसः । तान् रो॑हिदश्व गिर्वण॒स् त्रय॑स्त्रिंशत॒मा व॑ह
pri̱ya̱me̱dha̱vada̍tri̱vaj jāta̍vedo virūpa̱vat | a̱ṅgi̱ra̱svanma̍hivrata̱ praska̍ṇvasya śrudhī̱ hava̍m
||3||प्रि॒य॒मे॒ध॒वद॑त्रि॒वज् जात॑वेदो विरूप॒वत् । अ॒ङ्गि॒र॒स्वन्म॑हिव्रत॒ प्रस्क॑ण्वस्य श्रुधी॒ हव॑म्
mahi̍kerava ū̱taye̍ pri̱yame̍dhā ahūṣata | rāja̍ntamadhva̱rāṇā̍ma̱gniṃ śu̱kreṇa̍ śo̱ciṣā̍
||4||महि॑केरव ऊ॒तये॑ प्रि॒यमे॑धा अहूषत । राज॑न्तमध्व॒राणा॑म॒ग्निं शु॒क्रेण॑ शो॒चिषा॑
ghṛtā̍havana santye̱mā u̱ ṣu śru̍dhī̱ gira̍: | yābhi̱: kaṇva̍sya sū̱navo̱ hava̱nte'va̍se tvā
||5||घृता॑हवन सन्त्ये॒मा उ॒ षु श्रु॑धी॒ गिर॑: । याभि॒: कण्व॑स्य सू॒नवो॒ हव॒न्तेऽव॑से त्वा
tvāṃ ci̍traśravastama̱ hava̍nte vi̱kṣu ja̱ntava̍: | śo̱ciṣke̍śaṃ purupri̱yāgne̍ ha̱vyāya̱ vohl̤a̍ve
||6||त्वां चि॑त्रश्रवस्तम॒ हव॑न्ते वि॒क्षु ज॒न्तव॑: । शो॒चिष्के॑शं पुरुप्रि॒याग्ने॑ ह॒व्याय॒ वोह्ळ॑वे
ni tvā̱ hotā̍ramṛ̱tvija̍ṃ dadhi̱re va̍su̱vitta̍mam | śrutka̍rṇaṃ sa̱pratha̍stama̱ṃ viprā̍ agne̱ divi̍ṣṭiṣu
||7||नि त्वा॒ होता॑रमृ॒त्विजं॑ दधि॒रे व॑सु॒वित्त॑मम् । श्रुत्क॑र्णं स॒प्रथ॑स्तमं॒ विप्रा॑ अग्ने॒ दिवि॑ष्टिषु
ā tvā̱ viprā̍ acucyavuḥ su̱taso̍mā a̱bhi praya̍: | bṛ̱had bhā bibhra̍to ha̱viragne̱ martā̍ya dā̱śuṣe̍
||8||आ त्वा॒ विप्रा॑ अचुच्यवुः सु॒तसो॑मा अ॒भि प्रय॑: । बृ॒हद् भा बिभ्र॑तो ह॒विरग्ने॒ मर्ता॑य दा॒शुषे॑
prā̱ta̱ryāvṇa̍: sahaskṛta soma̱peyā̍ya santya | i̱hādya daivya̱ṃ jana̍ṃ ba̱rhirā sā̍dayā vaso
||9||प्रा॒त॒र्याव्ण॑: सहस्कृत सोम॒पेया॑य सन्त्य । इ॒हाद्य दैव्यं॒ जनं॑ ब॒र्हिरा सा॑दया वसो
a̱rvāñca̱ṃ daivya̱ṃ jana̱magne̱ yakṣva̱ sahū̍tibhiḥ | a̱yaṃ soma̍: sudānava̱s taṃ pā̍ta ti̱roa̍hnyam
||10||अ॒र्वाञ्चं॒ दैव्यं॒ जन॒मग्ने॒ यक्ष्व॒ सहू॑तिभिः । अ॒यं सोम॑: सुदानव॒स् तं पा॑त ति॒रोअ॑ह्न्यम्