Study
- Anukramaṇī
- Source
12 kakṣīvān dairghatamasa auśijaḥ| aśvinau| (12 duḥsvapnanāśanam) |1 gāyatrī, 2 kakup, 3 kā- virāṭ, 4 naṣṭarūpī, 5 tanuśirā, 6 uṣṇik, 7 viṣṭāra-bṛhatī, 8 kṛtiḥ, 9 virāṭ, 10-12 gāyatrī|
kā rā̍dha̱ddhotrā̍śvinā vā̱ṃ ko vā̱ṃ joṣa̍ u̱bhayo̍: | ka̱thā vi̍dhā̱tyapra̍cetāḥ
||1||का रा॑ध॒द्धोत्रा॑श्विना वां॒ को वां॒ जोष॑ उ॒भयो॑: । क॒था वि॑धा॒त्यप्र॑चेताः
vi̱dvāṃsā̱vid dura̍: pṛcche̱davi̍dvāni̱tthāpa̍ro ace̱tāḥ | nū ci̱nnu marte̱ akrau̍
||2||वि॒द्वांसा॒विद् दुर॑: पृच्छे॒दवि॑द्वानि॒त्थाप॑रो अचे॒ताः । नू चि॒न्नु मर्ते॒ अक्रौ॑
tā vi̱dvāṃsā̍ havāmahe vā̱ṃ tā no̍ vi̱dvāṃsā̱ manma̍ vocetama̱dya | prārca̱d daya̍māno yu̱vāku̍:
||3||ता वि॒द्वांसा॑ हवामहे वां॒ ता नो॑ वि॒द्वांसा॒ मन्म॑ वोचेतम॒द्य । प्रार्च॒द् दय॑मानो यु॒वाकु॑:
vi pṛ̍cchāmi pā̱kyā̱ 3 na de̱vān vaṣa̍ṭkṛtasyādbhu̱tasya̍ dasrā | pā̱taṃ ca̱ sahya̍so yu̱vaṃ ca̱ rabhya̍so naḥ
||4||वि पृ॑च्छामि पा॒क्या॒ ३ न दे॒वान् वष॑ट्कृतस्याद्भु॒तस्य॑ दस्रा । पा॒तं च॒ सह्य॑सो यु॒वं च॒ रभ्य॑सो नः
pra yā ghoṣe̱ bhṛga̍vāṇe̱ na śobhe̱ yayā̍ vā̱cā yaja̍ti pajri̱yo vā̍m | praiṣa̱yurna vi̱dvān
||5||प्र या घोषे॒ भृग॑वाणे॒ न शोभे॒ यया॑ वा॒चा यज॑ति पज्रि॒यो वा॑म् । प्रैष॒युर्न वि॒द्वान्
śru̱taṃ gā̍ya̱traṃ taka̍vānasyā̱haṃ ci̱ddhi ri̱rebhā̍śvinā vām | ākṣī śu̍bhaspatī̱ dan
||6||श्रु॒तं गा॑य॒त्रं तक॑वानस्या॒हं चि॒द्धि रि॒रेभा॑श्विना वाम् । आक्षी शु॑भस्पती॒ दन्
yu̱vaṃ hyāsta̍ṃ ma̱ho ran yu̱vaṃ vā̱ yanni̱rata̍taṃsatam | tā no̍ vasū sugo̱pā syā̍taṃ pā̱taṃ no̱ vṛkā̍daghā̱yoḥ
||7||यु॒वं ह्यास्तं॑ म॒हो रन् यु॒वं वा॒ यन्नि॒रत॑तंसतम् । ता नो॑ वसू सुगो॒पा स्या॑तं पा॒तं नो॒ वृका॑दघा॒योः
mā kasmai̍ dhātama̱bhya̍mi̱triṇe̍ no̱ mākutrā̍ no gṛ̱hebhyo̍ dhe̱navo̍ guḥ | sta̱nā̱bhujo̱ aśi̍śvīḥ
||8||मा कस्मै॑ धातम॒भ्य॑मि॒त्रिणे॑ नो॒ माकुत्रा॑ नो गृ॒हेभ्यो॑ धे॒नवो॑ गुः । स्त॒ना॒भुजो॒ अशि॑श्वीः
du̱hī̱yan mi̱tradhi̍taye yu̱vāku̍ rā̱ye ca̍ no mimī̱taṃ vāja̍vatyai | i̱ṣe ca̍ no mimītaṃ dhenu̱matyai̍
||9||दु॒ही॒यन् मि॒त्रधि॑तये यु॒वाकु॑ रा॒ये च॑ नो मिमी॒तं वाज॑वत्यै । इ॒षे च॑ नो मिमीतं धेनु॒मत्यै॑
a̱śvino̍rasana̱ṃ ratha̍mana̱śvaṃ vā̱jinī̍vatoḥ | tenā̱haṃ bhūri̍ cākana
||10||अ॒श्विनो॑रसनं॒ रथ॑मन॒श्वं वा॒जिनी॑वतोः । तेना॒हं भूरि॑ चाकन
a̱yaṃ sa̍maha mā tanū̱hyāte̱ janā̱m̐ anu̍ | so̱ma̱peya̍ṃ su̱kho ratha̍:
||11||अ॒यं स॑मह मा तनू॒ह्याते॒ जनाँ॒ अनु॑ । सो॒म॒पेयं॑ सु॒खो रथ॑:
adha̱ svapna̍sya̱ nirvi̱de 'bhu̍ñjataśca re̱vata̍: | u̱bhā tā basri̍ naśyataḥ
||12||अध॒ स्वप्न॑स्य॒ निर्वि॒दे ऽभु॑ञ्जतश्च रे॒वत॑: । उ॒भा ता बस्रि॑ नश्यतः