Study
- Anukramaṇī
- Source
(15) 1,2,4,6,8,10-12 indraḥ, 3,5,7,9 marutaḥ, 13-15 agastyo maitrāvaruṇiḥ| marutvānindraḥ|triṣṭup|
kayā̍ śu̱bhā sava̍yasa̱: sanī̍l̤āḥ samā̱nyā ma̱ruta̱: saṃ mi̍mikṣuḥ |
kayā̍ ma̱tī kuta̱ etā̍sa e̱te 'rca̍nti̱ śuṣma̱ṃ vṛṣa̍ṇo vasū̱yā
||1||कया॑ शु॒भा सव॑यस॒: सनी॑ळाः समा॒न्या म॒रुत॒: सं मि॑मिक्षुः ।
कया॑ म॒ती कुत॒ एता॑स ए॒ते ऽर्च॑न्ति॒ शुष्मं॒ वृष॑णो वसू॒या
kasya̱ brahmā̍ṇi jujuṣu̱ryuvā̍na̱: ko a̍dhva̱re ma̱ruta̱ ā va̍varta |
śye̱nām̐ i̍va̱ dhraja̍to a̱ntari̍kṣe̱ kena̍ ma̱hā mana̍sā rīramāma
||2||कस्य॒ ब्रह्मा॑णि जुजुषु॒र्युवा॑न॒: को अ॑ध्व॒रे म॒रुत॒ आ व॑वर्त ।
श्ये॒नाँ इ॑व॒ ध्रज॑तो अ॒न्तरि॑क्षे॒ केन॑ म॒हा मन॑सा रीरमाम
kuta̱stvami̍ndra̱ māhi̍na̱: sanneko̍ yāsi satpate̱ kiṃ ta̍ i̱tthā |
saṃ pṛ̍cchase samarā̱ṇaḥ śu̍bhā̱nairvo̱cestanno̍ harivo̱ yatte̍ a̱sme
||3||कुत॒स्त्वमि॑न्द्र॒ माहि॑न॒: सन्नेको॑ यासि सत्पते॒ किं त॑ इ॒त्था ।
सं पृ॑च्छसे समरा॒णः शु॑भा॒नैर्वो॒चेस्तन्नो॑ हरिवो॒ यत्ते॑ अ॒स्मे
brahmā̍ṇi me ma̱taya̱: śaṃ su̱tāsa̱: śuṣma̍ iyarti̱ prabhṛ̍to me̱ adri̍: |
ā śā̍sate̱ prati̍ haryantyu̱kthemā harī̍ vahata̱stā no̱ accha̍
||4||ब्रह्मा॑णि मे म॒तय॒: शं सु॒तास॒: शुष्म॑ इयर्ति॒ प्रभृ॑तो मे॒ अद्रि॑: ।
आ शा॑सते॒ प्रति॑ हर्यन्त्यु॒क्थेमा हरी॑ वहत॒स्ता नो॒ अच्छ॑
ato̍ va̱yama̍nta̱mebhi̍ryujā̱nāḥ svakṣa̍trebhista̱nva1 śumbha̍mānāḥ |
maho̍bhi̱retā̱m̐ upa̍ yujmahe̱ nvindra̍ sva̱dhāmanu̱ hi no̍ ba̱bhūtha̍
||5||अतो॑ व॒यम॑न्त॒मेभि॑र्युजा॒नाः स्वक्ष॑त्रेभिस्त॒न्व१ शुम्भ॑मानाः ।
महो॑भि॒रेताँ॒ उप॑ युज्महे॒ न्विन्द्र॑ स्व॒धामनु॒ हि नो॑ ब॒भूथ॑
kva1 syā vo̍ marutaḥ sva̱dhāsī̱d yanmāmeka̍ṃ sa̱madha̍ttāhi̱hatye̍ |
a̱haṃ hyu1grasta̍vi̱ṣastuvi̍ṣmā̱n viśva̍sya̱ śatro̱rana̍maṃ vadha̱snaiḥ
||6||क्व१ स्या वो॑ मरुतः स्व॒धासी॒द् यन्मामेकं॑ स॒मध॑त्ताहि॒हत्ये॑ ।
अ॒हं ह्यु१ग्रस्त॑वि॒षस्तुवि॑ष्मा॒न् विश्व॑स्य॒ शत्रो॒रन॑मं वध॒स्नैः
bhūri̍ cakartha̱ yujye̍bhira̱sme sa̍mā̱nebhi̍rvṛṣabha̱ pauṃsye̍bhiḥ |
bhūrī̍ṇi̱ hi kṛ̱ṇavā̍mā śavi̱ṣṭhendra̱ kratvā̍ maruto̱ yad vaśā̍ma
||7||भूरि॑ चकर्थ॒ युज्ये॑भिर॒स्मे स॑मा॒नेभि॑र्वृषभ॒ पौंस्ये॑भिः ।
भूरी॑णि॒ हि कृ॒णवा॑मा शवि॒ष्ठेन्द्र॒ क्रत्वा॑ मरुतो॒ यद् वशा॑म
vadhī̍ṃ vṛ̱traṃ ma̍ruta indri̱yeṇa̱ svena̱ bhāme̍na tavi̱ṣo ba̍bhū̱vān |
a̱hame̱tā mana̍ve vi̱śvaśca̍ndrāḥ su̱gā a̱paśca̍kara̱ vajra̍bāhuḥ
||8||वधीं॑ वृ॒त्रं म॑रुत इन्द्रि॒येण॒ स्वेन॒ भामे॑न तवि॒षो ब॑भू॒वान् ।
अ॒हमे॒ता मन॑वे वि॒श्वश्च॑न्द्राः सु॒गा अ॒पश्च॑कर॒ वज्र॑बाहुः
anu̍tta̱mā te̍ maghava̱nnaki̱rnu na tvāvā̍m̐ asti de̱vatā̱ vidā̍naḥ |
na jāya̍māno̱ naśa̍te̱ na jā̱to yāni̍ kari̱ṣyā kṛ̍ṇu̱hi pra̍vṛddha
||9||अनु॑त्त॒मा ते॑ मघव॒न्नकि॒र्नु न त्वावाँ॑ अस्ति दे॒वता॒ विदा॑नः ।
न जाय॑मानो॒ नश॑ते॒ न जा॒तो यानि॑ करि॒ष्या कृ॑णु॒हि प्र॑वृद्ध
eka̍sya cinme vi̱bhva1stvojo̱ yā nu da̍dhṛ̱ṣvān kṛ̱ṇavai̍ manī̱ṣā |
a̱haṃ hyu1gro ma̍ruto̱ vidā̍no̱ yāni̱ cyava̱mindra̱ idī̍śa eṣām
||10||एक॑स्य चिन्मे वि॒भ्व१स्त्वोजो॒ या नु द॑धृ॒ष्वान् कृ॒णवै॑ मनी॒षा ।
अ॒हं ह्यु१ग्रो म॑रुतो॒ विदा॑नो॒ यानि॒ च्यव॒मिन्द्र॒ इदी॑श एषाम्
ama̍ndanmā maruta̱: stomo̱ atra̱ yanme̍ nara̱: śrutya̱ṃ brahma̍ ca̱kra |
indrā̍ya̱ vṛṣṇe̱ suma̍khāya̱ mahya̱ṃ sakhye̱ sakhā̍yasta̱nve̍ ta̱nūbhi̍:
||11||अम॑न्दन्मा मरुत॒: स्तोमो॒ अत्र॒ यन्मे॑ नर॒: श्रुत्यं॒ ब्रह्म॑ च॒क्र ।
इन्द्रा॑य॒ वृष्णे॒ सुम॑खाय॒ मह्यं॒ सख्ये॒ सखा॑यस्त॒न्वे॑ त॒नूभि॑:
e̱vede̱te prati̍ mā̱ roca̍mānā̱ ane̍dya̱: śrava̱ eṣo̱ dadhā̍nāḥ |
sa̱ṃcakṣyā̍ marutaśca̱ndrava̍rṇā̱ acchā̍nta me cha̱dayā̍thā ca nū̱nam
||12||ए॒वेदे॒ते प्रति॑ मा॒ रोच॑माना॒ अने॑द्य॒: श्रव॒ एषो॒ दधा॑नाः ।
सं॒चक्ष्या॑ मरुतश्च॒न्द्रव॑र्णा॒ अच्छा॑न्त मे छ॒दया॑था च नू॒नम्
ko nvatra̍ maruto māmahe va̱: pra yā̍tana̱ sakhī̱m̐racchā̍ sakhāyaḥ |
manmā̍ni citrā apivā̱taya̍nta e̱ṣāṃ bhū̍ta̱ nave̍dā ma ṛ̱tānā̍m
||13||को न्वत्र॑ मरुतो मामहे व॒: प्र या॑तन॒ सखीँ॒रच्छा॑ सखायः ।
मन्मा॑नि चित्रा अपिवा॒तय॑न्त ए॒षां भू॑त॒ नवे॑दा म ऋ॒ताना॑म्
ā yad du̍va̱syād du̱vase̱ na kā̱rura̱smāñca̱kre mā̱nyasya̍ me̱dhā |
o ṣu va̍rtta maruto̱ vipra̱macche̱mā brahmā̍ṇi jari̱tā vo̍ arcat
||14||आ यद् दु॑व॒स्याद् दु॒वसे॒ न का॒रुर॒स्माञ्च॒क्रे मा॒न्यस्य॑ मे॒धा ।
ओ षु व॑र्त्त मरुतो॒ विप्र॒मच्छे॒मा ब्रह्मा॑णि जरि॒ता वो॑ अर्चत्
e̱ṣa va̱: stomo̍ maruta i̱yaṃ gīrmā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṃ vi̱dyāme̱ṣaṃ vṛ̱jana̍ṃ jī̱radā̍num
||15||ए॒ष व॒: स्तोमो॑ मरुत इ॒यं गीर्मा॑न्दा॒र्यस्य॑ मा॒न्यस्य॑ का॒रोः ।
एषा या॑सीष्ट त॒न्वे॑ व॒यां वि॒द्यामे॒षं वृ॒जनं॑ जी॒रदा॑नुम्