Study
- Anukramaṇī
- Source
9 kutsa āṅgirasaḥ| ṛbhavaḥ| jagatī, 5, 9 triṣṭup|
ta̱taṃ me̱ apa̱stadu̍ tāyate̱ puna̱: svādi̍ṣṭhā dhī̱tiru̱cathā̍ya śasyate |
a̱yaṃ sa̍mu̱dra i̱ha vi̱śvade̍vya̱: svāhā̍kṛtasya̱ samu̍ tṛpṇuta ṛbhavaḥ
||1||त॒तं मे॒ अप॒स्तदु॑ तायते॒ पुन॒: स्वादि॑ष्ठा धी॒तिरु॒चथा॑य शस्यते ।
अ॒यं स॑मु॒द्र इ॒ह वि॒श्वदे॑व्य॒: स्वाहा॑कृतस्य॒ समु॑ तृप्णुत ऋभवः
ā̱bho̱gaya̱ṃ pra yadi̱cchanta̱ aita̱nāpā̍kā̱: prāñco̱ mama̱ ke ci̍dā̱paya̍: |
saudha̍nvanāsaścari̱tasya̍ bhū̱manāga̍cchata savi̱turdā̱śuṣo̍ gṛ̱ham
||2||आ॒भो॒गयं॒ प्र यदि॒च्छन्त॒ ऐत॒नापा॑का॒: प्राञ्चो॒ मम॒ के चि॑दा॒पय॑: ।
सौध॑न्वनासश्चरि॒तस्य॑ भू॒मनाग॑च्छत सवि॒तुर्दा॒शुषो॑ गृ॒हम्
tat sa̍vi̱tā vo̍'mṛta̱tvamāsu̍va̱dago̍hya̱ṃ yacchra̱vaya̍nta̱ aita̍na |
tyaṃ ci̍ccama̱samasu̍rasya̱ bhakṣa̍ṇa̱meka̱ṃ santa̍makṛṇutā̱ catu̍rvayam
||3||तत् स॑वि॒ता वो॑ऽमृत॒त्वमासु॑व॒दगो॑ह्यं॒ यच्छ्र॒वय॑न्त॒ ऐत॑न ।
त्यं चि॑च्चम॒समसु॑रस्य॒ भक्ष॑ण॒मेकं॒ सन्त॑मकृणुता॒ चतु॑र्वयम्
vi̱ṣṭvī śamī̍ taraṇi̱tvena̍ vā̱ghato̱ martā̍sa̱: santo̍ amṛta̱tvamā̍naśuḥ |
sau̱dha̱nva̱nā ṛ̱bhava̱: sūra̍cakṣasaḥ saṃvatsa̱re sama̍pṛcyanta dhī̱tibhi̍:
||4||वि॒ष्ट्वी शमी॑ तरणि॒त्वेन॑ वा॒घतो॒ मर्ता॑स॒: सन्तो॑ अमृत॒त्वमा॑नशुः ।
सौ॒ध॒न्व॒ना ऋ॒भव॒: सूर॑चक्षसः संवत्स॒रे सम॑पृच्यन्त धी॒तिभि॑:
kṣetra̍miva̱ vi ma̍mu̱steja̍nena̱m̐ eka̱ṃ pātra̍mṛ̱bhavo̱ jeha̍mānam |
upa̍stutā upa̱maṃ nādha̍mānā̱ ama̍rtyeṣu̱ śrava̍ i̱cchamā̍nāḥ
||5||क्षेत्र॑मिव॒ वि म॑मु॒स्तेज॑नेनँ॒ एकं॒ पात्र॑मृ॒भवो॒ जेह॑मानम् ।
उप॑स्तुता उप॒मं नाध॑माना॒ अम॑र्त्येषु॒ श्रव॑ इ॒च्छमा॑नाः
ā ma̍nī̱ṣāma̱ntari̍kṣasya̱ nṛbhya̍: sru̱ceva̍ ghṛ̱taṃ ju̍havāma vi̱dmanā̍ |
ta̱ra̱ṇi̱tvā ye pi̱tura̍sya saści̱ra ṛ̱bhavo̱ vāja̍maruhan di̱vo raja̍:
||6||आ म॑नी॒षाम॒न्तरि॑क्षस्य॒ नृभ्य॑: स्रु॒चेव॑ घृ॒तं जु॑हवाम वि॒द्मना॑ ।
त॒र॒णि॒त्वा ये पि॒तुर॑स्य सश्चि॒र ऋ॒भवो॒ वाज॑मरुहन् दि॒वो रज॑:
ṛ̱bhurna̱ indra̱: śava̍sā̱ navī̍yānṛ̱bhurvāje̍bhi̱rvasu̍bhi̱rvasu̍rda̱diḥ |
yu̱ṣmāka̍ṃ devā̱ ava̱sāha̍ni pri̱ye̱ 3 'bhi ti̍ṣṭhema pṛtsu̱tīrasu̍nvatām
||7||ऋ॒भुर्न॒ इन्द्र॒: शव॑सा॒ नवी॑यानृ॒भुर्वाजे॑भि॒र्वसु॑भि॒र्वसु॑र्द॒दिः ।
यु॒ष्माकं॑ देवा॒ अव॒साह॑नि प्रि॒ये॒ ३ ऽभि ति॑ष्ठेम पृत्सु॒तीरसु॑न्वताम्
niścarma̍ṇa ṛbhavo̱ gāma̍piṃśata̱ saṃ va̱tsenā̍sṛjatā mā̱tara̱ṃ puna̍: |
saudha̍nvanāsaḥ svapa̱syayā̍ naro̱ jivrī̱ yuvā̍nā pi̱tarā̍kṛṇotana
||8||निश्चर्म॑ण ऋभवो॒ गाम॑पिंशत॒ सं व॒त्सेना॑सृजता मा॒तरं॒ पुन॑: ।
सौध॑न्वनासः स्वप॒स्यया॑ नरो॒ जिव्री॒ युवा॑ना पि॒तरा॑कृणोतन
vāje̍bhirno̱ vāja̍sātāvaviḍḍhyṛbhu̱mām̐ i̍ndra ci̱tramā da̍rṣi̱ rādha̍: |
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ
||9||वाजे॑भिर्नो॒ वाज॑सातावविड्ढ्यृभु॒माँ इ॑न्द्र चि॒त्रमा द॑र्षि॒ राध॑: ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः