Study
- Anukramaṇī
- Source
5 gotamo rāhūgaṇaḥ| agniḥ| triṣṭup|
kā ta̱ upe̍ti̱rmana̍so̱ varā̍ya̱ bhuva̍dagne̱ śaṃta̍mā̱ kā ma̍nī̱ṣā |
ko vā̍ ya̱jñaiḥ pari̱ dakṣa̍ṃ ta āpa̱ kena̍ vā te̱ mana̍sā dāśema
||1||का त॒ उपे॑ति॒र्मन॑सो॒ वरा॑य॒ भुव॑दग्ने॒ शंत॑मा॒ का म॑नी॒षा ।
को वा॑ य॒ज्ञैः परि॒ दक्षं॑ त आप॒ केन॑ वा ते॒ मन॑सा दाशेम
ehya̍gna i̱ha hotā̱ ni ṣī̱dāda̍bdha̱: su pu̍rae̱tā bha̍vā naḥ |
ava̍tāṃ tvā̱ roda̍sī viśvami̱nve yajā̍ ma̱he sau̍mana̱sāya̍ de̱vān
||2||एह्य॑ग्न इ॒ह होता॒ नि षी॒दाद॑ब्ध॒: सु पु॑रए॒ता भ॑वा नः ।
अव॑तां त्वा॒ रोद॑सी विश्वमि॒न्वे यजा॑ म॒हे सौ॑मन॒साय॑ दे॒वान्
pra su viśvā̍n ra̱kṣaso̱ dhakṣya̍gne̱ bhavā̍ ya̱jñānā̍mabhiśasti̱pāvā̍ |
athā va̍ha̱ soma̍pati̱ṃ hari̍bhyāmāti̱thyama̍smai cakṛmā su̱dāvne̍
||3||प्र सु विश्वा॑न् र॒क्षसो॒ धक्ष्य॑ग्ने॒ भवा॑ य॒ज्ञाना॑मभिशस्ति॒पावा॑ ।
अथा व॑ह॒ सोम॑पतिं॒ हरि॑भ्यामाति॒थ्यम॑स्मै चकृमा सु॒दाव्ने॑
pra̱jāva̍tā̱ vaca̍sā̱ vahni̍rā̱sā '' ca̍ hu̱ve ni ca̍ satsī̱ha de̱vaiḥ |
veṣi̍ ho̱tramu̱ta po̱traṃ ya̍jatra bo̱dhi pra̍yantarjanita̱rvasū̍nām
||4||प्र॒जाव॑ता॒ वच॑सा॒ वह्नि॑रा॒सा ऽऽ च॑ हु॒वे नि च॑ सत्सी॒ह दे॒वैः ।
वेषि॑ हो॒त्रमु॒त पो॒त्रं य॑जत्र बो॒धि प्र॑यन्तर्जनित॒र्वसू॑नाम्
yathā̱ vipra̍sya̱ manu̍ṣo ha̱virbhi̍rde̱vām̐ aya̍jaḥ ka̱vibhi̍: ka̱viḥ san |
e̱vā ho̍taḥ satyatara̱ tvama̱dyāgne̍ ma̱ndrayā̍ ju̱hvā̍ yajasva
||5||यथा॒ विप्र॑स्य॒ मनु॑षो ह॒विर्भि॑र्दे॒वाँ अय॑जः क॒विभि॑: क॒विः सन् ।
ए॒वा हो॑तः सत्यतर॒ त्वम॒द्याग्ने॑ म॒न्द्रया॑ जु॒ह्वा॑ यजस्व