Study
- Anukramaṇī
- Source
10 parāśaraḥ śāktyaḥ| agniḥ| triṣṭup|
ni kāvyā̍ ve̱dhasa̱: śaśva̍taska̱rhaste̱ dadhā̍no̱ naryā̍ pu̱rūṇi̍ |
a̱gnirbhu̍vad rayi̱patī̍ rayī̱ṇāṃ sa̱trā ca̍krā̱ṇo a̱mṛtā̍ni̱ viśvā̍
||1||नि काव्या॑ वे॒धस॒: शश्व॑तस्क॒र्हस्ते॒ दधा॑नो॒ नर्या॑ पु॒रूणि॑ ।
अ॒ग्निर्भु॑वद् रयि॒पती॑ रयी॒णां स॒त्रा च॑क्रा॒णो अ॒मृता॑नि॒ विश्वा॑
a̱sme va̱tsaṃ pari̱ ṣanta̱ṃ na vi̍ndanni̱cchanto̱ viśve̍ a̱mṛtā̱ amū̍rāḥ |
śra̱ma̱yuva̍: pada̱vyo̍ dhiya̱ṃdhāsta̱sthuḥ pa̱de pa̍ra̱me cārva̱gneḥ
||2||अ॒स्मे व॒त्सं परि॒ षन्तं॒ न वि॑न्दन्नि॒च्छन्तो॒ विश्वे॑ अ॒मृता॒ अमू॑राः ।
श्र॒म॒युव॑: पद॒व्यो॑ धियं॒धास्त॒स्थुः प॒दे प॑र॒मे चार्व॒ग्नेः
ti̱sro yada̍gne śa̱rada̱stvāmicchuci̍ṃ ghṛ̱tena̱ śuca̍yaḥ sapa̱ryān |
nāmā̍ni cid dadhire ya̱jñiyā̱nyasū̍dayanta ta̱nva 1: sujā̍tāḥ
||3||ति॒स्रो यद॑ग्ने श॒रद॒स्त्वामिच्छुचिं॑ घृ॒तेन॒ शुच॑यः सप॒र्यान् ।
नामा॑नि चिद् दधिरे य॒ज्ञिया॒न्यसू॑दयन्त त॒न्व १: सुजा॑ताः
ā roda̍sī bṛha̱tī vevi̍dānā̱: pra ru̱driyā̍ jabhrire ya̱jñiyā̍saḥ |
vi̱danmarto̍ ne̱madhi̍tā ciki̱tvāna̱gniṃ pa̱de pa̍ra̱me ta̍sthi̱vāṃsa̍m
||4||आ रोद॑सी बृह॒ती वेवि॑दाना॒: प्र रु॒द्रिया॑ जभ्रिरे य॒ज्ञिया॑सः ।
वि॒दन्मर्तो॑ ने॒मधि॑ता चिकि॒त्वान॒ग्निं प॒दे प॑र॒मे त॑स्थि॒वांस॑म्
sa̱ṃjā̱nā̱nā upa̍ sīdannabhi̱jñu patnī̍vanto nama̱sya̍ṃ namasyan |
ri̱ri̱kvāṃsa̍sta̱nva̍: kṛṇvata̱ svāḥ sakhā̱ sakhyu̍rni̱miṣi̱ rakṣa̍māṇāḥ
||5||सं॒जा॒ना॒ना उप॑ सीदन्नभि॒ज्ञु पत्नी॑वन्तो नम॒स्यं॑ नमस्यन् ।
रि॒रि॒क्वांस॑स्त॒न्व॑: कृण्वत॒ स्वाः सखा॒ सख्यु॑र्नि॒मिषि॒ रक्ष॑माणाः
triḥ sa̱pta yad guhyā̍ni̱ tve it pa̱dāvi̍da̱nnihi̍tā ya̱jñiyā̍saḥ |
tebhī̍ rakṣante a̱mṛta̍ṃ sa̱joṣā̍: pa̱śūñca̍ sthā̱tṝñca̱ratha̍ṃ ca pāhi
||6||त्रिः स॒प्त यद् गुह्या॑नि॒ त्वे इत् प॒दावि॑द॒न्निहि॑ता य॒ज्ञिया॑सः ।
तेभी॑ रक्षन्ते अ॒मृतं॑ स॒जोषा॑: प॒शूञ्च॑ स्था॒तॄञ्च॒रथं॑ च पाहि
vi̱dvām̐ a̍gne va̱yunā̍ni kṣitī̱nāṃ vyā̍nu̱ṣak chu̱rudho̍ jī̱vase̍ dhāḥ |
a̱nta̱rvi̱dvām̐ adhva̍no deva̱yānā̱nata̍ndro dū̱to a̍bhavo havi̱rvāṭ
||7||वि॒द्वाँ अ॑ग्ने व॒युना॑नि क्षिती॒नां व्या॑नु॒षक् छु॒रुधो॑ जी॒वसे॑ धाः ।
अ॒न्त॒र्वि॒द्वाँ अध्व॑नो देव॒याना॒नत॑न्द्रो दू॒तो अ॑भवो हवि॒र्वाट्
svā̱dhyo̍ di̱va ā sa̱pta ya̱hvī rā̱yo duro̱ vyṛ̍ta̱jñā a̍jānan |
vi̱dad gavya̍ṃ sa̱ramā̍ dṛ̱hlamū̱rvaṃ yenā̱ nu ka̱ṃ mānu̍ṣī̱ bhoja̍te̱ viṭ
||8||स्वा॒ध्यो॑ दि॒व आ स॒प्त य॒ह्वी रा॒यो दुरो॒ व्यृ॑त॒ज्ञा अ॑जानन् ।
वि॒दद् गव्यं॑ स॒रमा॑ दृ॒ह्लमू॒र्वं येना॒ नु कं॒ मानु॑षी॒ भोज॑ते॒ विट्
ā ye viśvā̍ svapa̱tyāni̍ ta̱sthuḥ kṛ̍ṇvā̱nāso̍ amṛta̱tvāya̍ gā̱tum |
ma̱hnā ma̱hadbhi̍: pṛthi̱vī vi ta̍sthe mā̱tā pu̱trairadi̍ti̱rdhāya̍se̱ veḥ
||9||आ ये विश्वा॑ स्वप॒त्यानि॑ त॒स्थुः कृ॑ण्वा॒नासो॑ अमृत॒त्वाय॑ गा॒तुम् ।
म॒ह्ना म॒हद्भि॑: पृथि॒वी वि त॑स्थे मा॒ता पु॒त्रैरदि॑ति॒र्धाय॑से॒ वेः
adhi̱ śriya̱ṃ ni da̍dhu̱ścāru̍masmin di̱vo yada̱kṣī a̱mṛtā̱ akṛ̍ṇvan |
adha̍ kṣaranti̱ sindha̍vo̱ na sṛ̱ṣṭāḥ pra nīcī̍ragne̱ aru̍ṣīrajānan
||10||अधि॒ श्रियं॒ नि द॑धु॒श्चारु॑मस्मिन् दि॒वो यद॒क्षी अ॒मृता॒ अकृ॑ण्वन् ।
अध॑ क्षरन्ति॒ सिन्ध॑वो॒ न सृ॒ष्टाः प्र नीची॑रग्ने॒ अरु॑षीरजानन्