Study
- Anukramaṇī
- Source
7 kakṣīvān dairghatamasa auśijaḥ| (6) svanayo bhāvayavyaḥ, (7) romaśā| 1-5 svanayo bhāvayavyaḥ, 6 romaśā, 7 svanayo bhāvayavyaḥ| triṣṭup, 6-7 anuṣṭup|
ama̍ndā̱n tstomā̱n pra bha̍re manī̱ṣā sindhā̱vadhi̍ kṣiya̱to bhā̱vyasya̍ |
yo me̍ sa̱hasra̱mami̍mīta sa̱vāna̱tūrto̱ rājā̱ śrava̍ i̱cchamā̍naḥ
||1||अम॑न्दा॒न् त्स्तोमा॒न् प्र भ॑रे मनी॒षा सिन्धा॒वधि॑ क्षिय॒तो भा॒व्यस्य॑ ।
यो मे॑ स॒हस्र॒ममि॑मीत स॒वान॒तूर्तो॒ राजा॒ श्रव॑ इ॒च्छमा॑नः
śa̱taṃ rājño̱ nādha̍mānasya ni̱ṣkāñ cha̱tamaśvā̱n praya̍tān tsa̱dya āda̍m |
śa̱taṃ ka̱kṣīvā̱m̐ asu̍rasya̱ gonā̍ṃ di̱vi śravo̱'jara̱mā ta̍tāna
||2||श॒तं राज्ञो॒ नाध॑मानस्य नि॒ष्काञ् छ॒तमश्वा॒न् प्रय॑तान् त्स॒द्य आद॑म् ।
श॒तं क॒क्षीवाँ॒ असु॑रस्य॒ गोनां॑ दि॒वि श्रवो॒ऽजर॒मा त॑तान
upa̍ mā śyā̱vāḥ sva̱naye̍na da̱ttā va̱dhūma̍nto̱ daśa̱ rathā̍so asthuḥ |
ṣa̱ṣṭiḥ sa̱hasra̱manu̱ gavya̱māgā̱t sana̍t ka̱kṣīvā̍m̐ abhipi̱tve ahnā̍m
||3||उप॑ मा श्या॒वाः स्व॒नये॑न द॒त्ता व॒धूम॑न्तो॒ दश॒ रथा॑सो अस्थुः ।
ष॒ष्टिः स॒हस्र॒मनु॒ गव्य॒मागा॒त् सन॑त् क॒क्षीवाँ॑ अभिपि॒त्वे अह्ना॑म्
ca̱tvā̱ri̱ṃśad daśa̍rathasya̱ śoṇā̍: sa̱hasra̱syāgre̱ śreṇi̍ṃ nayanti |
ma̱da̱cyuta̍: kṛśa̱nāva̍to̱ atyā̍n ka̱kṣīva̍nta̱ uda̍mṛkṣanta pa̱jrāḥ
||4||च॒त्वा॒रिं॒शद् दश॑रथस्य॒ शोणा॑: स॒हस्र॒स्याग्रे॒ श्रेणिं॑ नयन्ति ।
म॒द॒च्युत॑: कृश॒नाव॑तो॒ अत्या॑न् क॒क्षीव॑न्त॒ उद॑मृक्षन्त प॒ज्राः
pūrvā̱manu̱ praya̍ti̱mā da̍de va̱strīn yu̱ktām̐ a̱ṣṭāva̱ridhā̍yaso̱ gāḥ |
su̱bandha̍vo̱ ye vi̱śyā̍ iva̱ vrā ana̍svanta̱: śrava̱ aiṣa̍nta pa̱jrāḥ
||5||पूर्वा॒मनु॒ प्रय॑ति॒मा द॑दे व॒स्त्रीन् यु॒क्ताँ अ॒ष्टाव॒रिधा॑यसो॒ गाः ।
सु॒बन्ध॑वो॒ ये वि॒श्या॑ इव॒ व्रा अन॑स्वन्त॒: श्रव॒ ऐष॑न्त प॒ज्राः
āga̍dhitā̱ pari̍gadhitā̱ yā ka̍śī̱keva̱ jaṅga̍he |
dadā̍ti̱ mahya̱ṃ yādu̍rī̱ yāśū̍nāṃ bho̱jyā̍ śa̱tā
||6||आग॑धिता॒ परि॑गधिता॒ या क॑शी॒केव॒ जङ्ग॑हे ।
ददा॑ति॒ मह्यं॒ यादु॑री॒ याशू॑नां भो॒ज्या॑ श॒ता
upo̍pa me̱ parā̍ mṛśa̱ mā me̍ da̱bhrāṇi̍ manyathāḥ |
sarvā̱hama̍smi roma̱śā ga̱ndhārī̍ṇāmivāvi̱kā
||7||उपो॑प मे॒ परा॑ मृश॒ मा मे॑ द॒भ्राणि॑ मन्यथाः ।
सर्वा॒हम॑स्मि रोम॒शा ग॒न्धारी॑णामिवावि॒का