Study
- Anukramaṇī
- Also in this saṅgraha
- Source
9 kusīdī kāṇva:| indra: | gāyatrī |
ā tū na̍ indra kṣu̱manta̍ṃ ci̱traṃ grā̱bhaṃ saṃ gṛ̍bhāya | ma̱hā̱ha̱stī dakṣi̍ṇena ॥8.81.1॥
आ तू न॑ इन्द्र क्षु॒मन्तं॑ चि॒त्रं ग्रा॒भं सं गृ॑भाय । म॒हा॒ह॒स्ती दक्षि॑णेन
vi̱dmā hi tvā̍ tuvikū̱rmiṃ tu̱vide̍ṣṇaṃ tu̱vīma̍gham | tu̱vi̱mā̱tramavo̍bhiḥ ॥8.81.2॥
वि॒द्मा हि त्वा॑ तुविकू॒र्मिं तु॒विदे॑ष्णं तु॒वीम॑घम् । तु॒वि॒मा॒त्रमवो॑भिः
na̱hi tvā̍ śūra de̱vā na martā̍so̱ ditsa̍ntam | bhī̱maṃ na gāṃ vā̱raya̍nte ॥8.81.3॥
न॒हि त्वा॑ शूर दे॒वा न मर्ता॑सो॒ दित्स॑न्तम् । भी॒मं न गां वा॒रय॑न्ते
eto̱ nvindra̱ṃ stavā̱meśā̍na̱ṃ vasva̍: sva̱rāja̍m | na rādha̍sā mardhiṣannaḥ ॥8.81.4॥
एतो॒ न्विन्द्रं॒ स्तवा॒मेशा॑नं॒ वस्व॑: स्व॒राज॑म् । न राध॑सा मर्धिषन्नः
pra sto̍ṣa̱dupa̍ gāsiṣa̱cchrava̱tsāma̍ gī̱yamā̍nam | a̱bhi rādha̍sā jugurat ॥8.81.5॥
प्र स्तो॑ष॒दुप॑ गासिष॒च्छ्रव॒त्साम॑ गी॒यमा॑नम् । अ॒भि राध॑सा जुगुरत्
ā no̍ bhara̱ dakṣi̍ṇenā̱'bhi sa̱vyena̱ pra mṛ̍śa | indra̱ mā no̱ vaso̱rnirbhā̍k ॥8.81.6॥
आ नो॑ भर॒ दक्षि॑णेना॒ऽभि स॒व्येन॒ प्र मृ॑श । इन्द्र॒ मा नो॒ वसो॒र्निर्भा॑क्
upa̍ krama̱svā bha̍ra dhṛṣa̱tā dhṛ̍ṣṇo̱ janā̍nām | adā̍śūṣṭarasya̱ veda̍: ॥8.81.7॥
उप॑ क्रम॒स्वा भ॑र धृष॒ता धृ॑ष्णो॒ जना॑नाम् । अदा॑शूष्टरस्य॒ वेद॑:
indra̱ ya u̱ nu te̱ asti̱ vājo̱ vipre̍bhi̱: sani̍tvaḥ | a̱smābhi̱: su taṃ sa̍nuhi ॥8.81.8॥
इन्द्र॒ य उ॒ नु ते॒ अस्ति॒ वाजो॒ विप्रे॑भि॒: सनि॑त्वः । अ॒स्माभि॒: सु तं स॑नुहि
sa̱dyo̱juva̍ste̱ vājā̍ a̱smabhya̍ṃ vi̱śvaśca̍ndrāḥ | vaśai̍śca ma̱kṣū ja̍rante ॥8.81.13॥
स॒द्यो॒जुव॑स्ते॒ वाजा॑ अ॒स्मभ्यं॑ वि॒श्वश्च॑न्द्राः । वशै॑श्च म॒क्षू ज॑रन्ते
10 vairūpo nabhaḥ prabhedanaḥ| indraḥ| triṣṭup|
ni ṣu sī̍da gaṇapate ga̱ṇeṣu̱ tvāmā̍hu̱rvipra̍tamaṃ kavī̱nām |
na ṛ̱te tvatkri̍yate̱ kiṃ ca̱nāre ma̱hāma̱rkaṃ ma̍ghavañci̱trama̍rca ॥10.112.9॥
नि षु सी॑द गणपते ग॒णेषु॒ त्वामा॑हु॒र्विप्र॑तमं कवी॒नाम् ।
न ऋ॒ते त्वत्क्रि॑यते॒ किं च॒नारे म॒हाम॒र्कं म॑घवञ्चि॒त्रम॑र्च
a̱bhi̱khyā no̍ maghava̱nnādha̍mānā̱ntsakhe̍ bo̱dhi va̍supate̱ sakhī̍nām |
raṇa̍ṃ kṛdhi raṇakṛtsatyaśu̱ṣmā'bha̍kte ci̱dā bha̍jā rā̱ye a̱smān ॥10.112.10॥
अ॒भि॒ख्या नो॑ मघव॒न्नाध॑माना॒न्त्सखे॑ बो॒धि व॑सुपते॒ सखी॑नाम् ।
रणं॑ कृधि रणकृत्सत्यशु॒ष्माऽभ॑क्ते चि॒दा भ॑जा रा॒ये अ॒स्मान्
19 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| bṛhaspatiḥ, 1, 5, 9, 11, 17, 19, brahmaṇaspatiḥ| jagatī, 15, 19 triṣṭup|
ga̱ṇānā̍ṃ tvā ga̱ṇapa̍tiṃ havāmahe ka̱viṃ ka̍vī̱nāmu̍pa̱maśra̍vastamam |
jye̱ṣṭha̱rāja̱ṃ brahma̍ṇāṃ brahmaṇaspata̱ ā na̍: śṛ̱ṇvannū̱tibhi̍: sīda̱ sāda̍nam ॥2.23.1॥
ग॒णानां॑ त्वा ग॒णप॑तिं हवामहे क॒विं क॑वी॒नामु॑प॒मश्र॑वस्तमम् ।
ज्ये॒ष्ठ॒राजं॒ ब्रह्म॑णां ब्रह्मणस्पत॒ आ न॑: शृ॒ण्वन्नू॒तिभि॑: सीद॒ साद॑नम्