Study
- Anukramaṇī
- Source
6 agastyo maitrāvaruṇiḥ |aśvinau| triṣṭup|
tā vā̍ma̱dya tāva̍pa̱raṃ hu̍vemo̱cchantyā̍mu̱ṣasi̱ vahni̍ru̱kthaiḥ |
nāsa̍tyā̱ kuha̍ ci̱t santā̍va̱ryo di̱vo napā̍tā su̱dāsta̍rāya
||1||ता वा॑म॒द्य ताव॑प॒रं हु॑वेमो॒च्छन्त्या॑मु॒षसि॒ वह्नि॑रु॒क्थैः ।
नास॑त्या॒ कुह॑ चि॒त् सन्ता॑व॒र्यो दि॒वो नपा॑ता सु॒दास्त॑राय
a̱sme ū̱ ṣu vṛ̍ṣaṇā mādayethā̱mut pa̱ṇīm̐rha̍tamū̱rmyā mada̍ntā |
śru̱taṃ me̱ accho̍ktibhirmatī̱nāmeṣṭā̍ narā̱ nice̍tārā ca̱ karṇai̍:
||2||अ॒स्मे ऊ॒ षु वृ॑षणा मादयेथा॒मुत् प॒णीँर्ह॑तमू॒र्म्या मद॑न्ता ।
श्रु॒तं मे॒ अच्छो॑क्तिभिर्मती॒नामेष्टा॑ नरा॒ निचे॑तारा च॒ कर्णै॑:
śri̱ye pū̍ṣanniṣu̱kṛte̍va de̱vā nāsa̍tyā vaha̱tuṃ sū̱ryāyā̍: |
va̱cyante̍ vāṃ kaku̱hā a̱psu jā̱tā yu̱gā jū̱rṇeva̱ varu̍ṇasya̱ bhūre̍:
||3||श्रि॒ये पू॑षन्निषु॒कृते॑व दे॒वा नास॑त्या वह॒तुं सू॒र्याया॑: ।
व॒च्यन्ते॑ वां ककु॒हा अ॒प्सु जा॒ता यु॒गा जू॒र्णेव॒ वरु॑णस्य॒ भूरे॑:
a̱sme sā vā̍ṃ mādhvī rā̱tira̍stu̱ stoma̍ṃ hinotaṃ mā̱nyasya̍ kā̱roḥ |
anu̱ yad vā̍ṃ śrava̱syā̍ sudānū su̱vīryā̍ya carṣa̱ṇayo̱ mada̍nti
||4||अ॒स्मे सा वां॑ माध्वी रा॒तिर॑स्तु॒ स्तोमं॑ हिनोतं मा॒न्यस्य॑ का॒रोः ।
अनु॒ यद् वां॑ श्रव॒स्या॑ सुदानू सु॒वीर्या॑य चर्ष॒णयो॒ मद॑न्ति
e̱ṣa vā̱ṃ stomo̍ aśvināvakāri̱ māne̍bhirmaghavānā suvṛ̱kti |
yā̱taṃ va̱rtistana̍yāya̱ tmane̍ cā̱gastye̍ nāsatyā̱ mada̍ntā
||5||ए॒ष वां॒ स्तोमो॑ अश्विनावकारि॒ माने॑भिर्मघवाना सुवृ॒क्ति ।
या॒तं व॒र्तिस्तन॑याय॒ त्मने॑ चा॒गस्त्ये॑ नासत्या॒ मद॑न्ता
atā̍riṣma̱ tama̍saspā̱rama̱sya prati̍ vā̱ṃ stomo̍ aśvināvadhāyi |
eha yā̍taṃ pa̱thibhi̍rdeva̱yānai̍rvi̱dyāme̱ṣaṃ vṛ̱jana̍ṃ jī̱radā̍num
||6||अता॑रिष्म॒ तम॑सस्पा॒रम॒स्य प्रति॑ वां॒ स्तोमो॑ अश्विनावधायि ।
एह या॑तं प॒थिभि॑र्देव॒यानै॑र्वि॒द्यामे॒षं वृ॒जनं॑ जी॒रदा॑नुम्