Study
- Anukramaṇī
- Source
5 dīrghatamā aucathyaḥ| agniḥ| jagatī, 5 triṣṭup |
taṃ pṛ̍cchatā̱ sa ja̍gāmā̱ sa ve̍da̱ sa ci̍ki̱tvām̐ ī̍yate̱ sā nvī̍yate |
tasmi̍n tsanti pra̱śiṣa̱stasmi̍nni̱ṣṭaya̱: sa vāja̍sya̱ śava̍saḥ śu̱ṣmiṇa̱spati̍:
||1||तं पृ॑च्छता॒ स ज॑गामा॒ स वे॑द॒ स चि॑कि॒त्वाँ ई॑यते॒ सा न्वी॑यते ।
तस्मि॑न् त्सन्ति प्र॒शिष॒स्तस्मि॑न्नि॒ष्टय॒: स वाज॑स्य॒ शव॑सः शु॒ष्मिण॒स्पति॑:
tamit pṛ̍cchanti̱ na si̱mo vi pṛ̍cchati̱ svene̍va̱ dhīro̱ mana̍sā̱ yadagra̍bhīt |
na mṛ̍ṣyate pratha̱maṃ nāpa̍ra̱ṃ vaco̱ 'sya kratvā̍ sacate̱ apra̍dṛpitaḥ
||2||तमित् पृ॑च्छन्ति॒ न सि॒मो वि पृ॑च्छति॒ स्वेने॑व॒ धीरो॒ मन॑सा॒ यदग्र॑भीत् ।
न मृ॑ष्यते प्रथ॒मं नाप॑रं॒ वचो॒ ऽस्य क्रत्वा॑ सचते॒ अप्र॑दृपितः
tamid ga̍cchanti ju̱hva 1stamarva̍tī̱rviśvā̱nyeka̍: śṛṇava̱d vacā̍ṃsi me |
pu̱ru̱prai̱ṣastatu̍riryajña̱sādha̱no 'cchi̍droti̱: śiśu̱rāda̍tta̱ saṃ rabha̍:
||3||तमिद् ग॑च्छन्ति जु॒ह्व १स्तमर्व॑ती॒र्विश्वा॒न्येक॑: शृणव॒द् वचां॑सि मे ।
पु॒रु॒प्रै॒षस्ततु॑रिर्यज्ञ॒साध॒नो ऽच्छि॑द्रोति॒: शिशु॒राद॑त्त॒ सं रभ॑:
u̱pa̱sthāya̍ṃ carati̱ yat sa̱māra̍ta sa̱dyo jā̱tasta̍tsāra̱ yujye̍bhiḥ |
a̱bhi śvā̱ntaṃ mṛ̍śate nā̱ndye̍ mu̱de yadī̱ṃ gaccha̍ntyuśa̱tīra̍piṣṭhi̱tam
||4||उ॒प॒स्थायं॑ चरति॒ यत् स॒मार॑त स॒द्यो जा॒तस्त॑त्सार॒ युज्ये॑भिः ।
अ॒भि श्वा॒न्तं मृ॑शते ना॒न्द्ये॑ मु॒दे यदीं॒ गच्छ॑न्त्युश॒तीर॑पिष्ठि॒तम्
sa ī̍ṃ mṛ̱go apyo̍ vana̱rgurupa̍ tva̱cyu̍pa̱masyā̱ṃ ni dhā̍yi |
vya̍bravīd va̱yunā̱ martye̍bhyo̱ 'gnirvi̱dvām̐ ṛ̍ta̱ciddhi sa̱tyaḥ
||5||स ईं॑ मृ॒गो अप्यो॑ वन॒र्गुरुप॑ त्व॒च्यु॑प॒मस्यां॒ नि धा॑यि ।
व्य॑ब्रवीद् व॒युना॒ मर्त्ये॑भ्यो॒ ऽग्निर्वि॒द्वाँ ऋ॑त॒चिद्धि स॒त्यः