Study
- Anukramaṇī
- Source
9 medhātithiḥ kāṇvaḥ| indrāvaruṇau| gāyatrī, 4-5 pādanicṛt (5 hrasīyasī vā) gāyatrī|
indrā̱varu̍ṇayora̱haṃ sa̱mrājo̱rava̱ ā vṛ̍ṇe | tā no̍ mṛl̤āta ī̱dṛśe̍
||1||इन्द्रा॒वरु॑णयोर॒हं स॒म्राजो॒रव॒ आ वृ॑णे । ता नो॑ मृळात ई॒दृशे॑
gantā̍rā̱ hi stho'va̍se̱ hava̱ṃ vipra̍sya̱ māva̍taḥ | dha̱rtārā̍ carṣaṇī̱nām
||2||गन्ता॑रा॒ हि स्थोऽव॑से॒ हवं॒ विप्र॑स्य॒ माव॑तः । ध॒र्तारा॑ चर्षणी॒नाम्
a̱nu̱kā̱maṃ ta̍rpayethā̱mindrā̍varuṇa rā̱ya ā | tā vā̱ṃ nedi̍ṣṭhamīmahe
||3||अ॒नु॒का॒मं त॑र्पयेथा॒मिन्द्रा॑वरुण रा॒य आ । ता वां॒ नेदि॑ष्ठमीमहे
yu̱vāku̱ hi śacī̍nāṃ yu̱vāku̍ sumatī̱nām | bhū̱yāma̍ vāja̱dāvnā̍m
||4||यु॒वाकु॒ हि शची॑नां यु॒वाकु॑ सुमती॒नाम् । भू॒याम॑ वाज॒दाव्ना॑म्
indra̍: sahasra̱dāvnā̱ṃ varu̍ṇa̱: śaṃsyā̍nām | kratu̍rbhavatyu̱kthya̍:
||5||इन्द्र॑: सहस्र॒दाव्नां॒ वरु॑ण॒: शंस्या॑नाम् । क्रतु॑र्भवत्यु॒क्थ्य॑:
tayo̱ridava̍sā va̱yaṃ sa̱nema̱ ni ca̍ dhīmahi | syādu̱ta pra̱reca̍nam
||6||तयो॒रिदव॑सा व॒यं स॒नेम॒ नि च॑ धीमहि । स्यादु॒त प्र॒रेच॑नम्
indrā̍varuṇa vāma̱haṃ hu̱ve ci̱trāya̱ rādha̍se | a̱smāntsu ji̱gyuṣa̍skṛtam
||7||इन्द्रा॑वरुण वाम॒हं हु॒वे चि॒त्राय॒ राध॑से । अ॒स्मान्त्सु जि॒ग्युष॑स्कृतम्
indrā̍varuṇa̱ nū nu vā̱ṃ siṣā̍santīṣu dhī̱ṣvā | a̱smabhya̱ṃ śarma̍ yacchatam
||8||इन्द्रा॑वरुण॒ नू नु वां॒ सिषा॑सन्तीषु धी॒ष्वा । अ॒स्मभ्यं॒ शर्म॑ यच्छतम्
pra vā̍maśnotu suṣṭu̱tirindrā̍varuṇa̱ yāṃ hu̱ve | yāmṛ̱dhāthe̍ sa̱dhastu̍tim
||9||प्र वा॑मश्नोतु सुष्टु॒तिरिन्द्रा॑वरुण॒ यां हु॒वे । यामृ॒धाथे॑ स॒धस्तु॑तिम्