अध्ययनम्
- अनुक्रमणिका
- मूलम्
१० कण्वौ घौरः। मरुतः। प्रगाथः – विषमा बृहत्यः, समाः सतोबृहत्यः।
प्र यदि॒त्था प॑रा॒वत॑: शो॒चिर्न मान॒मस्य॑थ ।
कस्य॒ क्रत्वा॑ मरुत॒: कस्य॒ वर्प॑सा॒ कं या॑थ॒ कं ह॑ धूतयः
॥१॥pra yadi̱tthā pa̍rā̱vata̍: śo̱cirna māna̱masya̍tha |
kasya̱ kratvā̍ maruta̱: kasya̱ varpa̍sā̱ kaṃ yā̍tha̱ kaṃ ha̍ dhūtayaḥ
स्थि॒रा व॑: स॒न्त्वायु॑धा परा॒णुदे॑ वी॒ळू उ॒त प्र॑ति॒ष्कभे॑ ।
यु॒ष्माक॑मस्तु॒ तवि॑षी॒ पनी॑यसी॒ मा मर्त्य॑स्य मा॒यिन॑:
॥२॥sthi̱rā va̍: sa̱ntvāyu̍dhā parā̱ṇude̍ vī̱l̤ū u̱ta pra̍ti̱ṣkabhe̍ |
yu̱ṣmāka̍mastu̱ tavi̍ṣī̱ panī̍yasī̱ mā martya̍sya mā̱yina̍:
परा॑ ह॒ यत् स्थि॒रं ह॒थ नरो॑ व॒र्तय॑था गु॒रु ।
वि या॑थन व॒निन॑: पृथि॒व्या व्याशा॒: पर्व॑तानाम्
॥३॥parā̍ ha̱ yat sthi̱raṃ ha̱tha naro̍ va̱rtaya̍thā gu̱ru |
vi yā̍thana va̱nina̍: pṛthi̱vyā vyāśā̱: parva̍tānām
न॒हि व॒: शत्रु॑र्विवि॒दे अधि॒ द्यवि॒ न भूम्यां॑ रिशादसः ।
यु॒ष्माक॑मस्तु॒ तवि॑षी॒ तना॑ यु॒जा रुद्रा॑सो॒ नू चि॑दा॒धृषे॑
॥४॥na̱hi va̱: śatru̍rvivi̱de adhi̱ dyavi̱ na bhūmyā̍ṃ riśādasaḥ |
yu̱ṣmāka̍mastu̱ tavi̍ṣī̱ tanā̍ yu̱jā rudrā̍so̱ nū ci̍dā̱dhṛṣe̍
प्र वे॑पयन्ति॒ पर्व॑ता॒न्वि वि॑ञ्चन्ति॒ वन॒स्पती॑न् ।
प्रो आ॑रत मरुतो दु॒र्मदा॑ इव॒ देवा॑स॒: सर्व॑या वि॒शा
॥५॥pra ve̍payanti̱ parva̍tā̱nvi vi̍ñcanti̱ vana̱spatī̍n |
pro ā̍rata maruto du̱rmadā̍ iva̱ devā̍sa̱: sarva̍yā vi̱śā
उपो॒ रथे॑षु॒ पृष॑तीरयुग्ध्वं॒ प्रष्टि॑र्वहति॒ रोहि॑तः ।
आ वो॒ यामा॑य पृथि॒वी चि॑दश्रो॒दबी॑भयन्त॒ मानु॑षाः
॥६॥upo̱ rathe̍ṣu̱ pṛṣa̍tīrayugdhva̱ṃ praṣṭi̍rvahati̱ rohi̍taḥ |
ā vo̱ yāmā̍ya pṛthi̱vī ci̍daśro̱dabī̍bhayanta̱ mānu̍ṣāḥ
आ वो॑ म॒क्षू तना॑य॒ कं रुद्रा॒ अवो॑ वृणीमहे ।
गन्ता॑ नू॒नं नोऽव॑सा॒ यथा॑ पु॒रेत्था कण्वा॑य बि॒भ्युषे॑
॥७॥ā vo̍ ma̱kṣū tanā̍ya̱ kaṃ rudrā̱ avo̍ vṛṇīmahe |
gantā̍ nū̱naṃ no'va̍sā̱ yathā̍ pu̱retthā kaṇvā̍ya bi̱bhyuṣe̍
यु॒ष्मेषि॑तो मरुतो॒ मर्त्ये॑षित॒ आ यो नो॒ अभ्व॒ ईष॑ते ।
वि तं यु॑योत॒ शव॑सा॒ व्योज॑सा॒ वि यु॒ष्माका॑भिरू॒तिभि॑:
॥८॥yu̱ṣmeṣi̍to maruto̱ martye̍ṣita̱ ā yo no̱ abhva̱ īṣa̍te |
vi taṃ yu̍yota̱ śava̍sā̱ vyoja̍sā̱ vi yu̱ṣmākā̍bhirū̱tibhi̍:
असा॑मि॒ हि प्र॑यज्यव॒: कण्वं॑ द॒द प्र॑चेतसः ।
असा॑मिभिर्मरुत॒ आ न॑ ऊ॒तिभि॒र्गन्ता॑ वृ॒ष्टिं न वि॒द्युत॑:
॥९॥asā̍mi̱ hi pra̍yajyava̱: kaṇva̍ṃ da̱da pra̍cetasaḥ |
asā̍mibhirmaruta̱ ā na̍ ū̱tibhi̱rgantā̍ vṛ̱ṣṭiṃ na vi̱dyuta̍:
असा॒म्योजो॑ बिभृथा सुदान॒वो ऽसा॑मि धूतय॒: शव॑: ।
ऋ॒षि॒द्विषे॑ मरुतः परिम॒न्यव॒ इषुं॒ न सृ॑जत॒ द्विष॑म्
॥१०॥asā̱myojo̍ bibhṛthā sudāna̱vo 'sā̍mi dhūtaya̱: śava̍: |
ṛ̱ṣi̱dviṣe̍ marutaḥ parima̱nyava̱ iṣu̱ṃ na sṛ̍jata̱ dviṣa̍m