Study
- Anukramaṇī
- Source
10 agastyo maitrāvaruṇiḥ | marutaḥ| jagatī, 8-10 triṣṭup|
ya̱jñāya̍jñā vaḥ sama̱nā tu̍tu̱rvaṇi̱rdhiya̍ṃdhiyaṃ vo deva̱yā u̍ dadhidhve |
ā vo̱'rvāca̍: suvi̱tāya̱ roda̍syorma̱he va̍vṛtyā̱mava̍se suvṛ̱ktibhi̍:
||1||य॒ज्ञाय॑ज्ञा वः सम॒ना तु॑तु॒र्वणि॒र्धियं॑धियं वो देव॒या उ॑ दधिध्वे ।
आ वो॒ऽर्वाच॑: सुवि॒ताय॒ रोद॑स्योर्म॒हे व॑वृत्या॒मव॑से सुवृ॒क्तिभि॑:
va̱vrāso̱ na ye sva̱jāḥ svata̍vasa̱ iṣa̱ṃ sva̍rabhi̱jāya̍nta̱ dhūta̍yaḥ |
sa̱ha̱sriyā̍so a̱pāṃ normaya̍ ā̱sā gāvo̱ vandyā̍so̱ nokṣaṇa̍:
||2||व॒व्रासो॒ न ये स्व॒जाः स्वत॑वस॒ इषं॒ स्व॑रभि॒जाय॑न्त॒ धूत॑यः ।
स॒ह॒स्रिया॑सो अ॒पां नोर्मय॑ आ॒सा गावो॒ वन्द्या॑सो॒ नोक्षण॑:
somā̍so̱ na ye su̱tāstṛ̱ptāṃśa̍vo hṛ̱tsu pī̱tāso̍ du̱vaso̱ nāsa̍te |
aiṣā̱maṃse̍ṣu ra̱mbhiṇī̍va rārabhe̱ haste̍ṣu khā̱diśca̍ kṛ̱tiśca̱ saṃ da̍dhe
||3||सोमा॑सो॒ न ये सु॒तास्तृ॒प्तांश॑वो हृ॒त्सु पी॒तासो॑ दु॒वसो॒ नास॑ते ।
ऐषा॒मंसे॑षु र॒म्भिणी॑व रारभे॒ हस्ते॑षु खा॒दिश्च॑ कृ॒तिश्च॒ सं द॑धे
ava̱ svayu̍ktā di̱va ā vṛthā̍ yayu̱rama̍rtyā̱: kaśa̍yā codata̱ tmanā̍ |
a̱re̱ṇava̍stuvijā̱tā a̍cucyavurdṛ̱l̤ahāni̍ cinma̱ruto̱ bhrāja̍dṛṣṭayaḥ
||4||अव॒ स्वयु॑क्ता दि॒व आ वृथा॑ ययु॒रम॑र्त्या॒: कश॑या चोदत॒ त्मना॑ ।
अ॒रे॒णव॑स्तुविजा॒ता अ॑चुच्यवुर्दृ॒ळहानि॑ चिन्म॒रुतो॒ भ्राज॑दृष्टयः
ko vo̱'ntarma̍ruta ṛṣṭividyuto̱ reja̍ti̱ tmanā̱ hanve̍va ji̱hvayā̍ |
dha̱nva̱cyuta̍ i̱ṣāṃ na yāma̍ni puru̱praiṣā̍ aha̱nyo̱3 naita̍śaḥ
||5||को वो॒ऽन्तर्म॑रुत ऋष्टिविद्युतो॒ रेज॑ति॒ त्मना॒ हन्वे॑व जि॒ह्वया॑ ।
ध॒न्व॒च्युत॑ इ॒षां न याम॑नि पुरु॒प्रैषा॑ अह॒न्यो॒३ नैत॑शः
kva̍ svida̱sya raja̍so ma̱haspara̱ṃ kvāva̍raṃ maruto̱ yasmi̍nnāya̱ya |
yaccyā̱vaya̍tha vithu̱reva̱ saṃhi̍ta̱ṃ vyadri̍ṇā patatha tve̱ṣama̍rṇa̱vam
||6||क्व॑ स्विद॒स्य रज॑सो म॒हस्परं॒ क्वाव॑रं मरुतो॒ यस्मि॑न्नाय॒य ।
यच्च्या॒वय॑थ विथु॒रेव॒ संहि॑तं॒ व्यद्रि॑णा पतथ त्वे॒षम॑र्ण॒वम्
sā̱tirna vo'ma̍vatī̱ sva̍rvatī tve̱ṣā vipā̍kā maruta̱: pipi̍ṣvatī |
bha̱drā vo̍ rā̱tiḥ pṛ̍ṇa̱to na dakṣi̍ṇā pṛthu̱jrayī̍ asu̱rye̍va̱ jañja̍tī
||7||सा॒तिर्न वोऽम॑वती॒ स्व॑र्वती त्वे॒षा विपा॑का मरुत॒: पिपि॑ष्वती ।
भ॒द्रा वो॑ रा॒तिः पृ॑ण॒तो न दक्षि॑णा पृथु॒ज्रयी॑ असु॒र्ये॑व॒ जञ्ज॑ती
prati̍ ṣṭobhanti̱ sindha̍vaḥ pa̱vibhyo̱ yada̱bhriyā̱ṃ vāca̍mudī̱raya̍nti |
ava̍ smayanta vi̱dyuta̍: pṛthi̱vyāṃ yadī̍ ghṛ̱taṃ ma̱ruta̍: pruṣṇu̱vanti̍
||8||प्रति॑ ष्टोभन्ति॒ सिन्ध॑वः प॒विभ्यो॒ यद॒भ्रियां॒ वाच॑मुदी॒रय॑न्ति ।
अव॑ स्मयन्त वि॒द्युत॑: पृथि॒व्यां यदी॑ घृ॒तं म॒रुत॑: प्रुष्णु॒वन्ति॑
asū̍ta̱ pṛśni̍rmaha̱te raṇā̍ya tve̱ṣama̱yāsā̍ṃ ma̱rutā̱manī̍kam |
te sa̍psa̱rāso̍'janaya̱ntābhva̱mādit sva̱dhāmi̍ṣi̱rāṃ parya̍paśyan
||9||असू॑त॒ पृश्नि॑र्मह॒ते रणा॑य त्वे॒षम॒यासां॑ म॒रुता॒मनी॑कम् ।
ते स॑प्स॒रासो॑ऽजनय॒न्ताभ्व॒मादित् स्व॒धामि॑षि॒रां पर्य॑पश्यन्
e̱ṣa va̱: stomo̍ maruta i̱yaṃ gīrmā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṃ vi̱dyāme̱ṣaṃ vṛ̱jana̍ṃ jī̱radā̍num
||10||ए॒ष व॒: स्तोमो॑ मरुत इ॒यं गीर्मा॑न्दा॒र्यस्य॑ मा॒न्यस्य॑ का॒रोः ।
एषा या॑सीष्ट त॒न्वे॑ व॒यां वि॒द्यामे॒षं वृ॒जनं॑ जी॒रदा॑नुम्