Study
- Anukramaṇī
- Source
8 agastyo maitrāvaruṇiḥ | bṛhaspatiḥ| triṣṭup|
a̱na̱rvāṇa̍ṃ vṛṣa̱bhaṃ ma̱ndraji̍hva̱ṃ bṛha̱spati̍ṃ vardhayā̱ navya̍ma̱rkaiḥ |
gā̱thā̱nya̍: su̱ruco̱ yasya̍ de̱vā ā̍śṛ̱ṇvanti̱ nava̍mānasya̱ martā̍:
||1||अ॒न॒र्वाणं॑ वृष॒भं म॒न्द्रजि॑ह्वं॒ बृह॒स्पतिं॑ वर्धया॒ नव्य॑म॒र्कैः ।
गा॒था॒न्य॑: सु॒रुचो॒ यस्य॑ दे॒वा आ॑शृ॒ण्वन्ति॒ नव॑मानस्य॒ मर्ता॑:
tamṛ̱tviyā̱ upa̱ vāca̍: sacante̱ sargo̱ na yo de̍vaya̱tāmasa̍rji |
bṛha̱spati̱: sa hyañjo̱ varā̍ṃsi̱ vibhvābha̍va̱t samṛ̱te mā̍ta̱riśvā̍
||2||तमृ॒त्विया॒ उप॒ वाच॑: सचन्ते॒ सर्गो॒ न यो दे॑वय॒तामस॑र्जि ।
बृह॒स्पति॒: स ह्यञ्जो॒ वरां॑सि॒ विभ्वाभ॑व॒त् समृ॒ते मा॑त॒रिश्वा॑
upa̍stuti̱ṃ nama̍sa̱ udya̍tiṃ ca̱ śloka̍ṃ yaṃsat savi̱teva̱ pra bā̱hū |
a̱sya kratvā̍ha̱nyo̱3 yo asti̍ mṛ̱go na bhī̱mo a̍ra̱kṣasa̱stuvi̍ṣmān
||3||उप॑स्तुतिं॒ नम॑स॒ उद्य॑तिं च॒ श्लोकं॑ यंसत् सवि॒तेव॒ प्र बा॒हू ।
अ॒स्य क्रत्वा॑ह॒न्यो॒३ यो अस्ति॑ मृ॒गो न भी॒मो अ॑र॒क्षस॒स्तुवि॑ष्मान्
a̱sya śloko̍ di̱vīya̍te pṛthi̱vyāmatyo̱ na ya̍ṃsad yakṣa̱bhṛd vice̍tāḥ |
mṛ̱gāṇā̱ṃ na he̱tayo̱ yanti̍ ce̱mā bṛha̱spate̱rahi̍māyām̐ a̱bhi dyūn
||4||अ॒स्य श्लोको॑ दि॒वीय॑ते पृथि॒व्यामत्यो॒ न यं॑सद् यक्ष॒भृद् विचे॑ताः ।
मृ॒गाणां॒ न हे॒तयो॒ यन्ति॑ चे॒मा बृह॒स्पते॒रहि॑मायाँ अ॒भि द्यून्
ye tvā̍ devosri̱kaṃ manya̍mānāḥ pā̱pā bha̱dramu̍pa̱jīva̍nti pa̱jrāḥ |
na dū̱ḍhye̱3 anu̍ dadāsi vā̱maṃ bṛha̍spate̱ caya̍sa̱ it piyā̍rum
||5||ये त्वा॑ देवोस्रि॒कं मन्य॑मानाः पा॒पा भ॒द्रमु॑प॒जीव॑न्ति प॒ज्राः ।
न दू॒ढ्ये॒३ अनु॑ ददासि वा॒मं बृह॑स्पते॒ चय॑स॒ इत् पिया॑रुम्
su̱praitu̍: sū̱yava̍so̱ na panthā̍ durni̱yantu̱: pari̍prīto̱ na mi̱traḥ |
a̱na̱rvāṇo̍ a̱bhi ye cakṣa̍te̱ no'pī̍vṛtā aporṇu̱vanto̍ asthuḥ
||6||सु॒प्रैतु॑: सू॒यव॑सो॒ न पन्था॑ दुर्नि॒यन्तु॒: परि॑प्रीतो॒ न मि॒त्रः ।
अ॒न॒र्वाणो॑ अ॒भि ये चक्ष॑ते॒ नोऽपी॑वृता अपोर्णु॒वन्तो॑ अस्थुः
saṃ yaṃ stubho̱'vana̍yo̱ na yanti̍ samu̱draṃ na sra̱vato̱ rodha̍cakrāḥ |
sa vi̱dvām̐ u̱bhaya̍ṃ caṣṭe a̱ntarbṛha̱spati̱stara̱ āpa̍śca̱ gṛdhra̍:
||7||सं यं स्तुभो॒ऽवन॑यो॒ न यन्ति॑ समु॒द्रं न स्र॒वतो॒ रोध॑चक्राः ।
स वि॒द्वाँ उ॒भयं॑ चष्टे अ॒न्तर्बृह॒स्पति॒स्तर॒ आप॑श्च॒ गृध्र॑:
e̱vā ma̱hastu̍vijā̱tastuvi̍ṣmā̱n bṛha̱spati̍rvṛṣa̱bho dhā̍yi de̱vaḥ |
sa na̍: stu̱to vī̱rava̍d dhātu̱ goma̍d vi̱dyāme̱ṣaṃ vṛ̱jana̍ṃ jī̱radā̍num
||8||ए॒वा म॒हस्तु॑विजा॒तस्तुवि॑ष्मा॒न् बृह॒स्पति॑र्वृष॒भो धा॑यि दे॒वः ।
स न॑: स्तु॒तो वी॒रव॑द् धातु॒ गोम॑द् वि॒द्यामे॒षं वृ॒जनं॑ जी॒रदा॑नुम्