Study
- Anukramaṇī
- Source
6 gotamo rāhūgaṇaḥ| indraḥ| paṃktiḥ, 6 jagatī|
upo̱ ṣu śṛ̍ṇu̱hī giro̱ magha̍va̱n māta̍thā iva |
ya̱dā na̍: sū̱nṛtā̍vata̱: kara̱ āda̱rthayā̍sa̱ id yojā̱ nvi̍ndra te̱ harī̍
||1||उपो॒ षु शृ॑णु॒ही गिरो॒ मघ॑व॒न् मात॑था इव ।
य॒दा न॑: सू॒नृता॑वत॒: कर॒ आद॒र्थया॑स॒ इद् योजा॒ न्वि॑न्द्र ते॒ हरी॑
akṣa̱nnamī̍madanta̱ hyava̍ pri̱yā a̍dhūṣata |
asto̍ṣata̱ svabhā̍navo̱ viprā̱ navi̍ṣṭhayā ma̱tī yojā̱ nvi̍ndra te̱ harī̍
||2||अक्ष॒न्नमी॑मदन्त॒ ह्यव॑ प्रि॒या अ॑धूषत ।
अस्तो॑षत॒ स्वभा॑नवो॒ विप्रा॒ नवि॑ष्ठया म॒ती योजा॒ न्वि॑न्द्र ते॒ हरी॑
su̱sa̱ṃdṛśa̍ṃ tvā va̱yaṃ magha̍van vandiṣī̱mahi̍ |
pra nū̱naṃ pū̱rṇava̍ndhuraḥ stu̱to yā̍hi̱ vaśā̱m̐ anu̱ yojā̱ nvi̍ndra te̱ harī̍
||3||सु॒सं॒दृशं॑ त्वा व॒यं मघ॑वन् वन्दिषी॒महि॑ ।
प्र नू॒नं पू॒र्णव॑न्धुरः स्तु॒तो या॑हि॒ वशाँ॒ अनु॒ योजा॒ न्वि॑न्द्र ते॒ हरी॑
sa ghā̱ taṃ vṛṣa̍ṇa̱ṃ ratha̱madhi̍ tiṣṭhāti go̱vida̍m |
yaḥ pātra̍ṃ hāriyoja̱naṃ pū̱rṇami̍ndra̱ cike̍tati̱ yojā̱ nvi̍ndra te̱ harī̍
||4||स घा॒ तं वृष॑णं॒ रथ॒मधि॑ तिष्ठाति गो॒विद॑म् ।
यः पात्रं॑ हारियोज॒नं पू॒र्णमि॑न्द्र॒ चिके॑तति॒ योजा॒ न्वि॑न्द्र ते॒ हरी॑
yu̱ktaste̍ astu̱ dakṣi̍ṇa u̱ta sa̱vyaḥ śa̍takrato |
tena̍ jā̱yāmupa̍ pri̱yāṃ ma̍ndā̱no yā̱hyandha̍so̱ yojā̱ nvi̍ndra te̱ harī̍
||5||यु॒क्तस्ते॑ अस्तु॒ दक्षि॑ण उ॒त स॒व्यः श॑तक्रतो ।
तेन॑ जा॒यामुप॑ प्रि॒यां म॑न्दा॒नो या॒ह्यन्ध॑सो॒ योजा॒ न्वि॑न्द्र ते॒ हरी॑
yu̱najmi̍ te̱ brahma̍ṇā ke̱śinā̱ harī̱ upa̱ pra yā̍hi dadhi̱ṣe gabha̍styoḥ |
ut tvā̍ su̱tāso̍ rabha̱sā a̍mandiṣuḥ pūṣa̱ṇvān va̍jri̱ntsamu̱ patnyā̍madaḥ
||6||यु॒नज्मि॑ ते॒ ब्रह्म॑णा के॒शिना॒ हरी॒ उप॒ प्र या॑हि दधि॒षे गभ॑स्त्योः ।
उत् त्वा॑ सु॒तासो॑ रभ॒सा अ॑मन्दिषुः पूष॒ण्वान् व॑ज्रि॒न्त्समु॒ पत्न्या॑मदः