Study
- Anukramaṇī
- Source
9 gotamo rāhūgaṇaḥ| agniḥ| gāyatrī|
u̱pa̱pra̱yanto̍ adhva̱raṃ mantra̍ṃ vocemā̱gnaye̍ | ā̱re a̱sme ca̍ śṛṇva̱te
||1||उ॒प॒प्र॒यन्तो॑ अध्व॒रं मन्त्रं॑ वोचेमा॒ग्नये॑ । आ॒रे अ॒स्मे च॑ शृण्व॒ते
yaḥ snīhi̍tīṣu pū̱rvyaḥ sa̍ṃjagmā̱nāsu̍ kṛ̱ṣṭiṣu̍ | ara̍kṣad dā̱śuṣe̱ gaya̍m
||2||यः स्नीहि॑तीषु पू॒र्व्यः सं॑जग्मा॒नासु॑ कृ॒ष्टिषु॑ । अर॑क्षद् दा॒शुषे॒ गय॑म्
u̱ta bru̍vantu ja̱ntava̱ uda̱gnirvṛ̍tra̱hāja̍ni | dha̱na̱ṃja̱yo raṇe̍raṇe
||3||उ॒त ब्रु॑वन्तु ज॒न्तव॒ उद॒ग्निर्वृ॑त्र॒हाज॑नि । ध॒नं॒ज॒यो रणे॑रणे
yasya̍ dū̱to asi̱ kṣaye̱ veṣi̍ ha̱vyāni̍ vī̱taye̍ | da̱smat kṛ̱ṇoṣya̍dhva̱ram
||4||यस्य॑ दू॒तो असि॒ क्षये॒ वेषि॑ ह॒व्यानि॑ वी॒तये॑ । द॒स्मत् कृ॒णोष्य॑ध्व॒रम्
tamit su̍ha̱vyama̍ṅgiraḥ sude̱vaṃ sa̍haso yaho | janā̍ āhuḥ suba̱rhiṣa̍m
||5||तमित् सु॑ह॒व्यम॑ङ्गिरः सुदे॒वं स॑हसो यहो । जना॑ आहुः सुब॒र्हिष॑म्
ā ca̱ vahā̍si̱ tām̐ i̱ha de̱vām̐ upa̱ praśa̍staye | ha̱vyā su̍ścandra vī̱taye̍
||6||आ च॒ वहा॑सि॒ ताँ इ॒ह दे॒वाँ उप॒ प्रश॑स्तये । ह॒व्या सु॑श्चन्द्र वी॒तये॑
na yoru̍pa̱bdiraśvya̍: śṛ̱ṇve ratha̍sya̱ kacca̱na | yada̍gne̱ yāsi̍ dū̱tya̍m
||7||न योरु॑प॒ब्दिरश्व्य॑: शृ॒ण्वे रथ॑स्य॒ कच्च॒न । यद॑ग्ने॒ यासि॑ दू॒त्य॑म्
tvoto̍ vā̱jyahra̍yo̱ 'bhi pūrva̍smā̱dapa̍raḥ | pra dā̱śvām̐ a̍gne asthāt
||8||त्वोतो॑ वा॒ज्यह्र॑यो॒ ऽभि पूर्व॑स्मा॒दप॑रः । प्र दा॒श्वाँ अ॑ग्ने अस्थात्
u̱ta dyu̱mat su̱vīrya̍ṃ bṛ̱hada̍gne vivāsasi | de̱vebhyo̍ deva dā̱śuṣe̍
||9||उ॒त द्यु॒मत् सु॒वीर्यं॑ बृ॒हद॑ग्ने विवाससि । दे॒वेभ्यो॑ देव दा॒शुषे॑