Study
- Anukramaṇī
- Source
1-10 agastyo maitrāvaruṇiḥ| aśvinau| triṣṭup|
yu̱vo rajā̍ṃsi su̱yamā̍so̱ aśvā̱ ratho̱ yadvā̱ṃ paryarṇā̍ṃsi̱ dīya̍t |
hi̱ra̱ṇyayā̍ vāṃ pa̱vaya̍: pruṣāya̱n madhva̱: piba̍ntā u̱ṣasa̍: sacethe
||1||यु॒वो रजां॑सि सु॒यमा॑सो॒ अश्वा॒ रथो॒ यद्वां॒ पर्यर्णां॑सि॒ दीय॑त् ।
हि॒र॒ण्यया॑ वां प॒वय॑: प्रुषाय॒न् मध्व॒: पिब॑न्ता उ॒षस॑: सचेथे
yu̱vamatya̱syāva̍ nakṣatho̱ yad vipa̍tmano̱ narya̍sya̱ praya̍jyoḥ |
svasā̱ yad vāṃ viśvagūrtī̱ bharā̍ti̱ vājā̱yeṭṭe̍ madhupāvi̱ṣe ca̍
||2||यु॒वमत्य॒स्याव॑ नक्षथो॒ यद् विप॑त्मनो॒ नर्य॑स्य॒ प्रय॑ज्योः ।
स्वसा॒ यद् वां विश्वगूर्ती॒ भरा॑ति॒ वाजा॒येट्टे॑ मधुपावि॒षे च॑
yu̱vaṃ paya̍ u̱sriyā̍yāmadhattaṃ pa̱kvamā̱māyā̱mava̱ pūrvya̱ṃ goḥ |
a̱ntaryad va̱nino̍ vāmṛtapsū hvā̱ro na śuci̱ryaja̍te ha̱viṣmā̍n
||3||यु॒वं पय॑ उ॒स्रिया॑यामधत्तं प॒क्वमा॒माया॒मव॒ पूर्व्यं॒ गोः ।
अ॒न्तर्यद् व॒निनो॑ वामृतप्सू ह्वा॒रो न शुचि॒र्यज॑ते ह॒विष्मा॑न्
yu̱vaṃ ha̍ gha̱rmaṃ madhu̍manta̱matra̍ye̱ 'po na kṣodo̍'vṛṇītame̱ṣe |
tad vā̍ṃ narāvaśvinā̱ paśva̍iṣṭī̱ rathye̍va ca̱krā prati̍ yanti̱ madhva̍:
||4||यु॒वं ह॑ घ॒र्मं मधु॑मन्त॒मत्र॑ये॒ ऽपो न क्षोदो॑ऽवृणीतमे॒षे ।
तद् वां॑ नरावश्विना॒ पश्व॑इष्टी॒ रथ्ये॑व च॒क्रा प्रति॑ यन्ति॒ मध्व॑:
ā vā̍ṃ dā̱nāya̍ vavṛtīya dasrā̱ gorohe̍ṇa tau̱gryo na jivri̍: |
a̱paḥ kṣo̱ṇī sa̍cate̱ māhi̍nā vāṃ jū̱rṇo vā̱makṣu̱raṃha̍so yajatrā
||5||आ वां॑ दा॒नाय॑ ववृतीय दस्रा॒ गोरोहे॑ण तौ॒ग्र्यो न जिव्रि॑: ।
अ॒पः क्षो॒णी स॑चते॒ माहि॑ना वां जू॒र्णो वा॒मक्षु॒रंह॑सो यजत्रा
ni yad yu̱vethe̍ ni̱yuta̍: sudānū̱ upa̍ sva̱dhābhi̍: sṛjatha̱: pura̍ṃdhim |
preṣa̱d veṣa̱d vāto̱ na sū̱rirā ma̱he da̍de suvra̱to na vāja̍m
||6||नि यद् यु॒वेथे॑ नि॒युत॑: सुदानू॒ उप॑ स्व॒धाभि॑: सृजथ॒: पुरं॑धिम् ।
प्रेष॒द् वेष॒द् वातो॒ न सू॒रिरा म॒हे द॑दे सुव्र॒तो न वाज॑म्
va̱yaṃ ci̱ddhi vā̍ṃ jari̱tāra̍: sa̱tyā vi̍pa̱nyāma̍he̱ vi pa̱ṇirhi̱tāvā̍n |
adhā̍ ci̱ddhi ṣmā̍śvināvanindyā pā̱tho hi ṣmā̍ vṛṣaṇā̱vanti̍devam
||7||व॒यं चि॒द्धि वां॑ जरि॒तार॑: स॒त्या वि॑प॒न्याम॑हे॒ वि प॒णिर्हि॒तावा॑न् ।
अधा॑ चि॒द्धि ष्मा॑श्विनावनिन्द्या पा॒थो हि ष्मा॑ वृषणा॒वन्ति॑देवम्
yu̱vāṃ ci̱ddhi ṣmā̍śvinā̱vanu̱ dyūn viru̍drasya pra̱srava̍ṇasya sā̱tau |
a̱gastyo̍ na̱rāṃ nṛṣu̱ praśa̍sta̱: kārā̍dhunīva citayat sa̱hasrai̍:
||8||यु॒वां चि॒द्धि ष्मा॑श्विना॒वनु॒ द्यून् विरु॑द्रस्य प्र॒स्रव॑णस्य सा॒तौ ।
अ॒गस्त्यो॑ न॒रां नृषु॒ प्रश॑स्त॒: कारा॑धुनीव चितयत् स॒हस्रै॑:
pra yad vahe̍the mahi̱nā ratha̍sya̱ pra sya̍ndrā yātho̱ manu̍ṣo̱ na hotā̍ |
dha̱ttaṃ sū̱ribhya̍ u̱ta vā̱ svaśvya̱ṃ nāsa̍tyā rayi̱ṣāca̍: syāma
||9||प्र यद् वहे॑थे महि॒ना रथ॑स्य॒ प्र स्य॑न्द्रा याथो॒ मनु॑षो॒ न होता॑ ।
ध॒त्तं सू॒रिभ्य॑ उ॒त वा॒ स्वश्व्यं॒ नास॑त्या रयि॒षाच॑: स्याम
taṃ vā̱ṃ ratha̍ṃ va̱yama̱dyā hu̍vema̱ stomai̍raśvinā suvi̱tāya̱ navya̍m |
ari̍ṣṭanemi̱ṃ pari̱ dyāmi̍yā̱naṃ vi̱dyāme̱ṣaṃ vṛ̱jana̍ṃ jī̱radā̍num
||10||तं वां॒ रथं॑ व॒यम॒द्या हु॑वेम॒ स्तोमै॑रश्विना सुवि॒ताय॒ नव्य॑म् ।
अरि॑ष्टनेमिं॒ परि॒ द्यामि॑या॒नं वि॒द्यामे॒षं वृ॒जनं॑ जी॒रदा॑नुम्