Study
- Anukramaṇī
- Source
9 dīrghatamā aucathyaḥ| 1 mitraḥ, 2-9 mitrāvaruṇau| jagatī|
mi̱traṃ na yaṃ śimyā̱ goṣu̍ ga̱vyava̍: svā̱dhyo̍ vi̱dathe̍ a̱psu jīja̍nan |
are̍jetā̱ṃ roda̍sī̱ pāja̍sā gi̱rā prati̍ pri̱yaṃ ya̍ja̱taṃ ja̱nuṣā̱mava̍:
||1||मि॒त्रं न यं शिम्या॒ गोषु॑ ग॒व्यव॑: स्वा॒ध्यो॑ वि॒दथे॑ अ॒प्सु जीज॑नन् ।
अरे॑जेतां॒ रोद॑सी॒ पाज॑सा गि॒रा प्रति॑ प्रि॒यं य॑ज॒तं ज॒नुषा॒मव॑:
yaddha̱ tyad vā̍ṃ purumī̱l̤ahasya̍ so̱mina̱: pra mi̱trāso̱ na da̍dhi̱re svā̱bhuva̍: |
adha̱ kratu̍ṃ vidataṃ gā̱tumarca̍ta u̱ta śru̍taṃ vṛṣaṇā pa̱styā̍vataḥ
||2||यद्ध॒ त्यद् वां॑ पुरुमी॒ळहस्य॑ सो॒मिन॒: प्र मि॒त्रासो॒ न द॑धि॒रे स्वा॒भुव॑: ।
अध॒ क्रतुं॑ विदतं गा॒तुमर्च॑त उ॒त श्रु॑तं वृषणा प॒स्त्या॑वतः
ā vā̍ṃ bhūṣan kṣi̱tayo̱ janma̱ roda̍syoḥ pra̱vācya̍ṃ vṛṣaṇā̱ dakṣa̍se ma̱he |
yadī̍mṛ̱tāya̱ bhara̍tho̱ yadarva̍te̱ pra hotra̍yā̱ śimyā̍ vītho adhva̱ram
||3||आ वां॑ भूषन् क्षि॒तयो॒ जन्म॒ रोद॑स्योः प्र॒वाच्यं॑ वृषणा॒ दक्ष॑से म॒हे ।
यदी॑मृ॒ताय॒ भर॑थो॒ यदर्व॑ते॒ प्र होत्र॑या॒ शिम्या॑ वीथो अध्व॒रम्
pra sā kṣi̱tira̍sura̱ yā mahi̍ pri̱ya ṛtā̍vānāvṛ̱tamā gho̍ṣatho bṛ̱hat |
yu̱vaṃ di̱vo bṛ̍ha̱to dakṣa̍mā̱bhuva̱ṃ gāṃ na dhu̱ryupa̍ yuñjāthe a̱paḥ
||4||प्र सा क्षि॒तिर॑सुर॒ या महि॑ प्रि॒य ऋता॑वानावृ॒तमा घो॑षथो बृ॒हत् ।
यु॒वं दि॒वो बृ॑ह॒तो दक्ष॑मा॒भुवं॒ गां न धु॒र्युप॑ युञ्जाथे अ॒पः
ma̱hī atra̍ mahi̱nā vāra̍mṛṇvatho 're̱ṇava̱stuja̱ ā sadma̍n dhe̱nava̍: |
svara̍nti̱ tā u̍pa̱ratā̍ti̱ sūrya̱mā ni̱mruca̍ u̱ṣasa̍stakva̱vīri̍va
||5||म॒ही अत्र॑ महि॒ना वार॑मृण्वथो ऽरे॒णव॒स्तुज॒ आ सद्म॑न् धे॒नव॑: ।
स्वर॑न्ति॒ ता उ॑प॒रता॑ति॒ सूर्य॒मा नि॒म्रुच॑ उ॒षस॑स्तक्व॒वीरि॑व
ā vā̍mṛ̱tāya̍ ke̱śinī̍ranūṣata̱ mitra̱ yatra̱ varu̍ṇa gā̱tumarca̍thaḥ |
ava̱ tmanā̍ sṛ̱jata̱ṃ pinva̍ta̱ṃ dhiyo̍ yu̱vaṃ vipra̍sya̱ manma̍nāmirajyathaḥ
||6||आ वा॑मृ॒ताय॑ के॒शिनी॑रनूषत॒ मित्र॒ यत्र॒ वरु॑ण गा॒तुमर्च॑थः ।
अव॒ त्मना॑ सृ॒जतं॒ पिन्व॑तं॒ धियो॑ यु॒वं विप्र॑स्य॒ मन्म॑नामिरज्यथः
yo vā̍ṃ ya̱jñaiḥ śa̍śamā̱no ha̱ dāśa̍ti ka̱virhotā̱ yaja̍ti manma̱sādha̍naḥ |
upāha̱ taṃ gaccha̍tho vī̱tho a̍dhva̱ramacchā̱ gira̍: suma̱tiṃ ga̍ntamasma̱yū
||7||यो वां॑ य॒ज्ञैः श॑शमा॒नो ह॒ दाश॑ति क॒विर्होता॒ यज॑ति मन्म॒साध॑नः ।
उपाह॒ तं गच्छ॑थो वी॒थो अ॑ध्व॒रमच्छा॒ गिर॑: सुम॒तिं ग॑न्तमस्म॒यू
yu̱vāṃ ya̱jñaiḥ pra̍tha̱mā gobhi̍rañjata̱ ṛtā̍vānā̱ mana̍so̱ na prayu̍ktiṣu |
bhara̍nti vā̱ṃ manma̍nā sa̱ṃyatā̱ giro 'dṛ̍pyatā̱ mana̍sā re̱vadā̍śāthe
||8||यु॒वां य॒ज्ञैः प्र॑थ॒मा गोभि॑रञ्जत॒ ऋता॑वाना॒ मन॑सो॒ न प्रयु॑क्तिषु ।
भर॑न्ति वां॒ मन्म॑ना सं॒यता॒ गिरो ऽदृ॑प्यता॒ मन॑सा रे॒वदा॑शाथे
re̱vad vayo̍ dadhāthe re̱vadā̍śāthe̱ narā̍ mā̱yābhi̍ri̱taū̍ti̱ māhi̍nam |
na vā̱ṃ dyāvo'ha̍bhi̱rnota sindha̍vo̱ na de̍va̱tvaṃ pa̱ṇayo̱ nāna̍śurma̱gham
||9||रे॒वद् वयो॑ दधाथे रे॒वदा॑शाथे॒ नरा॑ मा॒याभि॑रि॒तऊ॑ति॒ माहि॑नम् ।
न वां॒ द्यावोऽह॑भि॒र्नोत सिन्ध॑वो॒ न दे॑व॒त्वं प॒णयो॒ नान॑शुर्म॒घम्