Study
- Anukramaṇī
- Source
6 gotamo rāhūgaṇaḥ| marutaḥ| triṣṭup, 1, 6 prastārapaṃktiḥ, 5 virāḍ rupā|
ā vi̱dyunma̍dbhirmarutaḥ sva̱rkai rathe̍bhiryāta ṛṣṭi̱madbhi̱raśva̍parṇaiḥ |
ā varṣi̍ṣṭhayā na i̱ṣā vayo̱ na pa̍ptatā sumāyāḥ
||1||आ वि॒द्युन्म॑द्भिर्मरुतः स्व॒र्कै रथे॑भिर्यात ऋष्टि॒मद्भि॒रश्व॑पर्णैः ।
आ वर्षि॑ष्ठया न इ॒षा वयो॒ न प॑प्तता सुमायाः
te̍'ru̱ṇebhi̱rvara̱mā pi̱śaṅgai̍: śu̱bhe kaṃ yā̍nti ratha̱tūrbhi̱raśvai̍: |
ru̱kmo na ci̱traḥ svadhi̍tīvān pa̱vyā ratha̍sya jaṅghananta̱ bhūma̍
||2||ते॑ऽरु॒णेभि॒र्वर॒मा पि॒शङ्गै॑: शु॒भे कं या॑न्ति रथ॒तूर्भि॒रश्वै॑: ।
रु॒क्मो न चि॒त्रः स्वधि॑तीवान् प॒व्या रथ॑स्य जङ्घनन्त॒ भूम॑
śri̱ye kaṃ vo̱ adhi̍ ta̱nūṣu̱ vāśī̍rme̱dhā vanā̱ na kṛ̍ṇavanta ū̱rdhvā |
yu̱ṣmabhya̱ṃ kaṃ ma̍rutaḥ sujātāstuvidyu̱mnāso̍ dhanayante̱ adri̍m
||3||श्रि॒ये कं वो॒ अधि॑ त॒नूषु॒ वाशी॑र्मे॒धा वना॒ न कृ॑णवन्त ऊ॒र्ध्वा ।
यु॒ष्मभ्यं॒ कं म॑रुतः सुजातास्तुविद्यु॒म्नासो॑ धनयन्ते॒ अद्रि॑म्
ahā̍ni̱ gṛdhrā̱: paryā va̱ āgu̍ri̱māṃ dhiya̍ṃ vārkā̱ryāṃ ca̍ de̱vīm |
brahma̍ kṛ̱ṇvanto̱ gota̍māso a̱rkairū̱rdhvaṃ nu̍nudra utsa̱dhiṃ piba̍dhyai
||4||अहा॑नि॒ गृध्रा॒: पर्या व॒ आगु॑रि॒मां धियं॑ वार्का॒र्यां च॑ दे॒वीम् ।
ब्रह्म॑ कृ॒ण्वन्तो॒ गोत॑मासो अ॒र्कैरू॒र्ध्वं नु॑नुद्र उत्स॒धिं पिब॑ध्यै
e̱tat tyanna yoja̍namaceti sa̱svarha̱ yanma̍ruto̱ gota̍mo vaḥ |
paśya̱n hira̍ṇyacakrā̱nayo̍daṃṣṭrān vi̱dhāva̍to va̱rāhū̍n
||5||ए॒तत् त्यन्न योज॑नमचेति स॒स्वर्ह॒ यन्म॑रुतो॒ गोत॑मो वः ।
पश्य॒न् हिर॑ण्यचक्रा॒नयो॑दंष्ट्रान् वि॒धाव॑तो व॒राहू॑न्
e̱ṣā syā vo̍ maruto'nubha̱rtrī prati̍ ṣṭobhati vā̱ghato̱ na vāṇī̍ |
asto̍bhaya̱d vṛthā̍sā̱manu̍ sva̱dhāṃ gabha̍styoḥ
||6||ए॒षा स्या वो॑ मरुतोऽनुभ॒र्त्री प्रति॑ ष्टोभति वा॒घतो॒ न वाणी॑ ।
अस्तो॑भय॒द् वृथा॑सा॒मनु॑ स्व॒धां गभ॑स्त्योः