Study
- Anukramaṇī
- Source
6 agastyo maitrāvaruṇiḥ | indraḥ| anuṣṭup, 6 triṣṭup|
matsi̍ no̱ vasya̍ iṣṭaya̱ indra̍mindo̱ vṛṣā vi̍śa |
ṛ̱ghā̱yamā̍ṇa invasi̱ śatru̱manti̱ na vi̍ndasi
||1||मत्सि॑ नो॒ वस्य॑ इष्टय॒ इन्द्र॑मिन्दो॒ वृषा वि॑श ।
ऋ॒घा॒यमा॑ण इन्वसि॒ शत्रु॒मन्ति॒ न वि॑न्दसि
tasmi̱nnā ve̍śayā̱ giro̱ ya eka̍ścarṣaṇī̱nām |
anu̍ sva̱dhā yamu̱pyate̱ yava̱ṃ na carkṛ̍ṣa̱d vṛṣā̍
||2||तस्मि॒न्ना वे॑शया॒ गिरो॒ य एक॑श्चर्षणी॒नाम् ।
अनु॑ स्व॒धा यमु॒प्यते॒ यवं॒ न चर्कृ॑ष॒द् वृषा॑
yasya̱ viśvā̍ni̱ hasta̍yo̱: pañca̍ kṣitī̱nāṃ vasu̍ |
spā̱śaya̍sva̱ yo a̍sma̱dhrugdi̱vyevā̱śani̍rjahi
||3||यस्य॒ विश्वा॑नि॒ हस्त॑यो॒: पञ्च॑ क्षिती॒नां वसु॑ ।
स्पा॒शय॑स्व॒ यो अ॑स्म॒ध्रुग्दि॒व्येवा॒शनि॑र्जहि
asu̍nvantaṃ samaṃ jahi dū̱ṇāśa̱ṃ yo na te̱ maya̍: |
a̱smabhya̍masya̱ veda̍naṃ da̱ddhi sū̱riści̍dohate
||4||असु॑न्वन्तं समं जहि दू॒णाशं॒ यो न ते॒ मय॑: ।
अ॒स्मभ्य॑मस्य॒ वेद॑नं द॒द्धि सू॒रिश्चि॑दोहते
āvo̱ yasya̍ dvi̱barha̍so̱'rkeṣu̍ sānu̱ṣagasa̍t |
ā̱jāvindra̍syendo̱ prāvo̱ vāje̍ṣu vā̱jina̍m
||5||आवो॒ यस्य॑ द्वि॒बर्ह॑सो॒ऽर्केषु॑ सानु॒षगस॑त् ।
आ॒जाविन्द्र॑स्येन्दो॒ प्रावो॒ वाजे॑षु वा॒जिन॑म्
yathā̱ pūrve̍bhyo jari̱tṛbhya̍ indra̱ maya̍ i̱vāpo̱ na tṛṣya̍te ba̱bhūtha̍ |
tāmanu̍ tvā ni̱vida̍ṃ johavīmi vi̱dyāme̱ṣaṃ vṛ̱jana̍ṃ jī̱radā̍num
||6||यथा॒ पूर्वे॑भ्यो जरि॒तृभ्य॑ इन्द्र॒ मय॑ इ॒वापो॒ न तृष्य॑ते ब॒भूथ॑ ।
तामनु॑ त्वा नि॒विदं॑ जोहवीमि वि॒द्यामे॒षं वृ॒जनं॑ जी॒रदा॑नुम्