Sūktam 10 — gāyanti (12 mantras) — Śākala Saṃhitā (Ṛgveda)

Study

Anukramaṇī
Source

gāya̍nti tvā gāya̱triṇo'rca̍ntya̱rkama̱rkiṇa̍:|

bra̱hmāṇa̍stvā śatakrata̱ ud va̱ṃśami̍va yemire

||1||

गाय॑न्ति त्वा गाय॒त्रिणोऽर्च॑न्त्य॒र्कम॒र्किण॑:।

ब्र॒ह्माण॑स्त्वा शतक्रत॒ उद् वं॒शमि॑व येमिरे

yat sāno̱: sānu̱māru̍ha̱d bhūryaspa̍ṣṭa̱ kartva̍m|

tadindro̱ artha̍ṃ cetati yū̱thena̍ vṛ̱ṣṇire̍jati

||2||

यत् सानो॒: सानु॒मारु॑ह॒द् भूर्यस्प॑ष्ट॒ कर्त्व॑म्।

तदिन्द्रो॒ अर्थं॑ चेतति यू॒थेन॑ वृ॒ष्णिरे॑जति

yu̱kṣvā hi ke̱śinā̱ harī̱ vṛṣa̍ṇā kakṣya̱prā|

athā̍ na indra somapā gi̱rāmupa̍śrutiṃ cara

||3||

यु॒क्ष्वा हि के॒शिना॒ हरी॒ वृष॑णा कक्ष्य॒प्रा।

अथा॑ न इन्द्र सोमपा गि॒रामुप॑श्रुतिं चर

ehi̱ stomā̍m̐ a̱bhi sva̍rā̱ 'bhi gṛ̍ṇī̱hyā ru̍va|

brahma̍ ca no vaso̱ sacendra̍ ya̱jñaṃ ca̍ vardhaya

||4||

एहि॒ स्तोमाँ॑ अ॒भि स्व॑रा॒ ऽभि गृ॑णी॒ह्या रु॑व।

ब्रह्म॑ च नो वसो॒ सचेन्द्र॑ य॒ज्ञं च॑ वर्धय

u̱kthamindrā̍ya̱ śaṃsya̱ṃ vardha̍naṃ puruni̱ṣṣidhe̍|

śa̱kro yathā̍ su̱teṣu̍ ṇo rā̱raṇa̍t sa̱khyeṣu̍ ca

||5||

उ॒क्थमिन्द्रा॑य॒ शंस्यं॒ वर्ध॑नं पुरुनि॒ष्षिधे॑।

श॒क्रो यथा॑ सु॒तेषु॑ णो रा॒रण॑त् स॒ख्येषु॑ च

tamit sa̍khi̱tva ī̍mahe̱ taṃ rā̱ye taṃ su̱vīrye̍|

sa śa̱kra u̱ta na̍: śaka̱dindro̱ vasu̱ daya̍mānaḥ

||6||

तमित् स॑खि॒त्व ई॑महे॒ तं रा॒ये तं सु॒वीर्ये॑।

स श॒क्र उ॒त न॑: शक॒दिन्द्रो॒ वसु॒ दय॑मानः

su̱vi̱vṛta̍ṃ suni̱raja̱mindra̱ tvādā̍ta̱midyaśa̍:|

gavā̱mapa̍ vra̱jaṃ vṛ̍dhi kṛṇu̱ṣva rādho̍ adrivaḥ

||7||

सु॒वि॒वृतं॑ सुनि॒रज॒मिन्द्र॒ त्वादा॑त॒मिद्यश॑:।

गवा॒मप॑ व्र॒जं वृ॑धि कृणु॒ष्व राधो॑ अद्रिवः

na̱hi tvā̱ roda̍sī u̱bhe ṛ̍ghā̱yamā̍ṇa̱minva̍taḥ|

jeṣa̱: sva̍rvatīra̱paḥ saṃ gā a̱smabhya̍ṃ dhūnuhi

||8||

न॒हि त्वा॒ रोद॑सी उ॒भे ऋ॑घा॒यमा॑ण॒मिन्व॑तः।

जेष॒: स्व॑र्वतीर॒पः सं गा अ॒स्मभ्यं॑ धूनुहि

āśru̍tkarṇa śru̱dhī hava̱ṃ nū ci̍ddadhiṣva me̱ gira̍:|

indra̱ stoma̍mi̱maṃ mama̍ kṛ̱ṣvā yu̱jaści̱danta̍ram

||9||

आश्रु॑त्कर्ण श्रु॒धी हवं॒ नू चि॑द्दधिष्व मे॒ गिर॑:।

इन्द्र॒ स्तोम॑मि॒मं मम॑ कृ॒ष्वा यु॒जश्चि॒दन्त॑रम्

vi̱dmā hi tvā̱ vṛṣa̍ntama̱ṃ vāje̍ṣu havana̱śruta̍m|

vṛṣa̍ntamasya hūmaha ū̱tiṃ sa̍hasra̱sāta̍mām

||10||

वि॒द्मा हि त्वा॒ वृष॑न्तमं॒ वाजे॑षु हवन॒श्रुत॑म्।

वृष॑न्तमस्य हूमह ऊ॒तिं स॑हस्र॒सात॑माम्

ā tū na̍ indra kauśika mandasā̱naḥ su̱taṃ pi̍ba|

navya̱māyu̱: pra sū ti̍ra kṛ̱dhī sa̍hasra̱sāmṛṣi̍m

||11||

आ तू न॑ इन्द्र कौशिक मन्दसा॒नः सु॒तं पि॑ब।

नव्य॒मायु॒: प्र सू ति॑र कृ॒धी स॑हस्र॒सामृषि॑म्

pari̍ tvā girvaṇo̱ gira̍ i̱mā bha̍vantu vi̱śvata̍: |

vṛ̱ddhāyu̱manu̱ vṛddha̍yo̱ juṣṭā̍ bhavantu̱ juṣṭa̍yaḥ

||12||

परि॑ त्वा गिर्वणो॒ गिर॑ इ॒मा भ॑वन्तु वि॒श्वत॑: ।

वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑यः