Study
- Anukramaṇī
- Source
11 kutsa āṅgirasaḥ| indraḥ| jagatī, 11 triṣṭup|
i̱māṃ te̱ dhiya̱ṃ pra bha̍re ma̱ho ma̱hīma̱sya sto̱tre dhi̱ṣaṇā̱ yatta̍ āna̱je |
tamu̍tsa̱ve ca̍ prasa̱ve ca̍ sāsa̱himindra̍ṃ de̱vāsa̱: śava̍sāmada̱nnanu̍
||1||इ॒मां ते॒ धियं॒ प्र भ॑रे म॒हो म॒हीम॒स्य स्तो॒त्रे धि॒षणा॒ यत्त॑ आन॒जे ।
तमु॑त्स॒वे च॑ प्रस॒वे च॑ सास॒हिमिन्द्रं॑ दे॒वास॒: शव॑सामद॒न्ननु॑
a̱sya śravo̍ na̱dya̍: sa̱pta bi̍bhrati̱ dyāvā̱kṣāmā̍ pṛthi̱vī da̍rśa̱taṃ vapu̍: |
a̱sme sū̍ryācandra̱masā̍bhi̱cakṣe̍ śra̱ddhe kami̍ndra carato vitartu̱ram
||2||अ॒स्य श्रवो॑ न॒द्य॑: स॒प्त बि॑भ्रति॒ द्यावा॒क्षामा॑ पृथि॒वी द॑र्श॒तं वपु॑: ।
अ॒स्मे सू॑र्याचन्द्र॒मसा॑भि॒चक्षे॑ श्र॒द्धे कमि॑न्द्र चरतो वितर्तु॒रम्
taṃ smā̱ ratha̍ṃ maghava̱n prāva̍ sā̱taye̱ jaitra̱ṃ yaṃ te̍ anu̱madā̍ma saṃga̱me |
ā̱jā na̍ indra̱ mana̍sā puruṣṭuta tvā̱yadbhyo̍ maghava̱ñcharma̍ yaccha naḥ
||3||तं स्मा॒ रथं॑ मघव॒न् प्राव॑ सा॒तये॒ जैत्रं॒ यं ते॑ अनु॒मदा॑म संग॒मे ।
आ॒जा न॑ इन्द्र॒ मन॑सा पुरुष्टुत त्वा॒यद्भ्यो॑ मघव॒ञ्छर्म॑ यच्छ नः
va̱yaṃ ja̍yema̱ tvayā̍ yu̱jā vṛta̍ma̱smāka̱maṃśa̱muda̍vā̱ bhare̍bhare |
a̱smabhya̍mindra̱ vari̍vaḥ su̱gaṃ kṛ̍dhi̱ pra śatrū̍ṇāṃ maghava̱n vṛṣṇyā̍ ruja
||4||व॒यं ज॑येम॒ त्वया॑ यु॒जा वृत॑म॒स्माक॒मंश॒मुद॑वा॒ भरे॑भरे ।
अ॒स्मभ्य॑मिन्द्र॒ वरि॑वः सु॒गं कृ॑धि॒ प्र शत्रू॑णां मघव॒न् वृष्ण्या॑ रुज
nānā̱ hi tvā̱ hava̍mānā̱ janā̍ i̱me dhanā̍nāṃ dharta̱rava̍sā vipa̱nyava̍: |
a̱smāka̍ṃ smā̱ ratha̱mā ti̍ṣṭha sā̱taye̱ jaitra̱ṃ hī̍ndra̱ nibhṛ̍ta̱ṃ mana̱stava̍
||5||नाना॒ हि त्वा॒ हव॑माना॒ जना॑ इ॒मे धना॑नां धर्त॒रव॑सा विप॒न्यव॑: ।
अ॒स्माकं॑ स्मा॒ रथ॒मा ति॑ष्ठ सा॒तये॒ जैत्रं॒ ही॑न्द्र॒ निभृ॑तं॒ मन॒स्तव॑
go̱jitā̍ bā̱hū ami̍takratuḥ si̱maḥ karma̍nkarmañcha̱tamū̍tiḥ khajaṃka̱raḥ |
a̱ka̱lpa indra̍: prati̱māna̱moja̱sāthā̱ janā̱ vi hva̍yante siṣā̱sava̍:
||6||गो॒जिता॑ बा॒हू अमि॑तक्रतुः सि॒मः कर्म॑न्कर्मञ्छ॒तमू॑तिः खजंक॒रः ।
अ॒क॒ल्प इन्द्र॑: प्रति॒मान॒मोज॒साथा॒ जना॒ वि ह्व॑यन्ते सिषा॒सव॑:
utte̍ śa̱tānma̍ghava̱nnucca̱ bhūya̍sa̱ ut sa̱hasrā̍d ririce kṛ̱ṣṭiṣu̱ śrava̍: |
a̱mā̱traṃ tvā̍ dhi̱ṣaṇā̍ titviṣe ma̱hyadhā̍ vṛ̱trāṇi̍ jighnase puraṃdara
||7||उत्ते॑ श॒तान्म॑घव॒न्नुच्च॒ भूय॑स॒ उत् स॒हस्रा॑द् रिरिचे कृ॒ष्टिषु॒ श्रव॑: ।
अ॒मा॒त्रं त्वा॑ धि॒षणा॑ तित्विषे म॒ह्यधा॑ वृ॒त्राणि॑ जिघ्नसे पुरंदर
tri̱vi̱ṣṭi̱dhātu̍ prati̱māna̱moja̍sasti̱sro bhūmī̍rnṛpate̱ trīṇi̍ roca̱nā |
atī̱daṃ viśva̱ṃ bhuva̍naṃ vavakṣithāśa̱truri̍ndra ja̱nuṣā̍ sa̱nāda̍si
||8||त्रि॒वि॒ष्टि॒धातु॑ प्रति॒मान॒मोज॑सस्ति॒स्रो भूमी॑र्नृपते॒ त्रीणि॑ रोच॒ना ।
अती॒दं विश्वं॒ भुव॑नं ववक्षिथाश॒त्रुरि॑न्द्र ज॒नुषा॑ स॒नाद॑सि
tvāṃ de̱veṣu̍ pratha̱maṃ ha̍vāmahe̱ tvaṃ ba̍bhūtha̱ pṛta̍nāsu sāsa̱hiḥ |
semaṃ na̍: kā̱rumu̍pama̱nyumu̱dbhida̱mindra̍: kṛṇotu prasa̱ve ratha̍ṃ pu̱raḥ
||9||त्वां दे॒वेषु॑ प्रथ॒मं ह॑वामहे॒ त्वं ब॑भूथ॒ पृत॑नासु सास॒हिः ।
सेमं न॑: का॒रुमु॑पम॒न्युमु॒द्भिद॒मिन्द्र॑: कृणोतु प्रस॒वे रथं॑ पु॒रः
tvaṃ ji̍getha̱ na dhanā̍ rurodhi̱thārbhe̍ṣvā̱jā ma̍ghavan ma̱hatsu̍ ca |
tvāmu̱gramava̍se̱ saṃ śi̍śīma̱syathā̍ na indra̱ hava̍neṣu codaya
||10||त्वं जि॑गेथ॒ न धना॑ रुरोधि॒थार्भे॑ष्वा॒जा म॑घवन् म॒हत्सु॑ च ।
त्वामु॒ग्रमव॑से॒ सं शि॑शीम॒स्यथा॑ न इन्द्र॒ हव॑नेषु चोदय
vi̱śvāhendro̍ adhiva̱ktā no̍ a̱stvapa̍rihvṛtāḥ sanuyāma̱ vāja̍m |
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ
||11||वि॒श्वाहेन्द्रो॑ अधिव॒क्ता नो॑ अ॒स्त्वप॑रिह्वृताः सनुयाम॒ वाज॑म् ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः