Study
- Anukramaṇī
- Source
9 agastyo maitrāvaruṇiḥ | aśvinau| triṣṭup|
kadu̱ preṣṭā̍vi̱ṣāṃ ra̍yī̱ṇāma̍dhva̱ryantā̱ yadu̍nninī̱tho a̱pām |
a̱yaṃ vā̍ṃ ya̱jño a̍kṛta̱ praśa̍sti̱ṃ vasu̍dhitī̱ avi̍tārā janānām
||1||कदु॒ प्रेष्टा॑वि॒षां र॑यी॒णाम॑ध्व॒र्यन्ता॒ यदु॑न्निनी॒थो अ॒पाम् ।
अ॒यं वां॑ य॒ज्ञो अ॑कृत॒ प्रश॑स्तिं॒ वसु॑धिती॒ अवि॑तारा जनानाम्
ā vā̱maśvā̍sa̱: śuca̍yaḥ paya̱spā vāta̍raṃhaso di̱vyāso̱ atyā̍: |
ma̱no̱juvo̱ vṛṣa̍ṇo vī̱tapṛ̍ṣṭhā̱ eha sva̱rājo̍ a̱śvinā̍ vahantu
||2||आ वा॒मश्वा॑स॒: शुच॑यः पय॒स्पा वात॑रंहसो दि॒व्यासो॒ अत्या॑: ।
म॒नो॒जुवो॒ वृष॑णो वी॒तपृ॑ष्ठा॒ एह स्व॒राजो॑ अ॒श्विना॑ वहन्तु
ā vā̱ṃ ratho̱'vani̱rna pra̱vatvā̍n tsṛ̱prava̍ndhuraḥ suvi̱tāya̍ gamyāḥ |
vṛṣṇa̍: sthātārā̱ mana̍so̱ javī̍yānahampū̱rvo ya̍ja̱to dhi̍ṣṇyā̱ yaḥ
||3||आ वां॒ रथो॒ऽवनि॒र्न प्र॒वत्वा॑न् त्सृ॒प्रव॑न्धुरः सुवि॒ताय॑ गम्याः ।
वृष्ण॑: स्थातारा॒ मन॑सो॒ जवी॑यानहम्पू॒र्वो य॑ज॒तो धि॑ष्ण्या॒ यः
i̱heha̍ jā̱tā sama̍vāvaśītāmare̱pasā̍ ta̱nvā̱3 nāma̍bhi̱: svaiḥ |
ji̱ṣṇurvā̍ma̱nyaḥ suma̍khasya sū̱rirdi̱vo a̱nyaḥ su̱bhaga̍: pu̱tra ū̍he
||4||इ॒हेह॑ जा॒ता सम॑वावशीतामरे॒पसा॑ त॒न्वा॒३ नाम॑भि॒: स्वैः ।
जि॒ष्णुर्वा॑म॒न्यः सुम॑खस्य सू॒रिर्दि॒वो अ॒न्यः सु॒भग॑: पु॒त्र ऊ॑हे
pra vā̍ṃ nice̱ruḥ ka̍ku̱ho vaśā̱m̐ anu̍ pi̱śaṅga̍rūpa̱: sada̍nāni gamyāḥ |
harī̍ a̱nyasya̍ pī̱paya̍nta̱ vājai̍rma̱thrā rajā̍ṃsyaśvinā̱ vi ghoṣai̍: 5pra vā̍ṃ śa̱radvā̍n vṛṣa̱bho na ni̱ṣṣāṭ pū̱rvīriṣa̍ścarati̱ madhva̍ i̱ṣṇan |
evai̍ra̱nyasya̍ pī̱paya̍nta̱ vājai̱rveṣa̍ntīrū̱rdhvā na̱dyo̍ na̱ āgu̍:
||6||प्र वां॑ निचे॒रुः क॑कु॒हो वशाँ॒ अनु॑ पि॒शङ्ग॑रूप॒: सद॑नानि गम्याः ।
हरी॑ अ॒न्यस्य॑ पी॒पय॑न्त॒ वाजै॑र्म॒थ्रा रजां॑स्यश्विना॒ वि घोषै॑: ॥
५प्र वां॑ श॒रद्वा॑न् वृष॒भो न नि॒ष्षाट् पू॒र्वीरिष॑श्चरति॒ मध्व॑ इ॒ष्णन् ।
एवै॑र॒न्यस्य॑ पी॒पय॑न्त॒ वाजै॒र्वेष॑न्तीरू॒र्ध्वा न॒द्यो॑ न॒ आगु॑:
asa̍rji vā̱ṃ sthavi̍rā vedhasā̱ gīrbā̱l̤ahe a̍śvinā tre̱dhā kṣara̍ntī |
upa̍stutāvavata̱ṃ nādha̍māna̱ṃ yāma̱nnayā̍mañchṛṇuta̱ṃ hava̍ṃ me
||7||अस॑र्जि वां॒ स्थवि॑रा वेधसा॒ गीर्बा॒ळहे अ॑श्विना त्रे॒धा क्षर॑न्ती ।
उप॑स्तुताववतं॒ नाध॑मानं॒ याम॒न्नया॑मञ्छृणुतं॒ हवं॑ मे
u̱ta syā vā̱ṃ ruśa̍to̱ vapsa̍so̱ gīstri̍ba̱rhiṣi̱ sada̍si pinvate̱ nṝn |
vṛṣā̍ vāṃ me̱gho vṛ̍ṣaṇā pīpāya̱ gorna seke̱ manu̍ṣo daśa̱syan
||8||उ॒त स्या वां॒ रुश॑तो॒ वप्स॑सो॒ गीस्त्रि॑ब॒र्हिषि॒ सद॑सि पिन्वते॒ नॄन् ।
वृषा॑ वां मे॒घो वृ॑षणा पीपाय॒ गोर्न सेके॒ मनु॑षो दश॒स्यन्
yu̱vāṃ pū̱ṣevā̍śvinā̱ pura̍ṃdhira̱gnimu̱ṣāṃ na ja̍rate ha̱viṣmā̍n |
hu̱ve yad vā̍ṃ variva̱syā gṛ̍ṇā̱no vi̱dyāme̱ṣaṃ vṛ̱jana̍ṃ jī̱radā̍num
||9||यु॒वां पू॒षेवा॑श्विना॒ पुरं॑धिर॒ग्निमु॒षां न ज॑रते ह॒विष्मा॑न् ।
हु॒वे यद् वां॑ वरिव॒स्या गृ॑णा॒नो वि॒द्यामे॒षं वृ॒जनं॑ जी॒रदा॑नुम्