Study
- Anukramaṇī
- Source
10 madhucchandā vaiśvāmitraḥ| indraḥ| gāyatrī|
endra̍ sāna̱siṃ ra̱yiṃ sa̱jitvā̍naṃ sadā̱saha̍m| varṣi̍ṣṭhamū̱taye̍ bhara
||1||एन्द्र॑ सान॒सिं र॒यिं स॒जित्वा॑नं सदा॒सह॑म्। वर्षि॑ष्ठमू॒तये॑ भर
ni yena̍ muṣṭiha̱tyayā̱ ni vṛ̱trā ru̱ṇadhā̍mahai| tvotā̍so̱ nyarva̍tā
||2||नि येन॑ मुष्टिह॒त्यया॒ नि वृ॒त्रा रु॒णधा॑महै। त्वोता॑सो॒ न्यर्व॑ता
indra̱ tvotā̍sa̱ ā va̱yaṃ vajra̍ṃ gha̱nā da̍dīmahi| jaye̍ma̱ saṃ yu̱dhi spṛdha̍:
||3||इन्द्र॒ त्वोता॑स॒ आ व॒यं वज्रं॑ घ॒ना द॑दीमहि। जये॑म॒ सं यु॒धि स्पृध॑:
va̱yaṃ śūre̍bhi̱rastṛ̍bhi̱rindra̱ tvayā̍ yu̱jā va̱yam| sā̱sa̱hyāma̍ pṛtanya̱taḥ
||4||व॒यं शूरे॑भि॒रस्तृ॑भि॒रिन्द्र॒ त्वया॑ यु॒जा व॒यम्। सा॒स॒ह्याम॑ पृतन्य॒तः
ma̱hām̐ indra̍: pa̱raśca̱ nu ma̍hi̱tvama̍stu va̱jriṇe̍| dyaurna pra̍thi̱nā śava̍:
||5||म॒हाँ इन्द्र॑: प॒रश्च॒ नु म॑हि॒त्वम॑स्तु व॒ज्रिणे॑। द्यौर्न प्र॑थि॒ना शव॑:
sa̱mo̱he vā̱ ya āśa̍ta̱ nara̍sto̱kasya̱ sani̍tau| viprā̍so vā dhiyā̱yava̍:
||6||स॒मो॒हे वा॒ य आश॑त॒ नर॑स्तो॒कस्य॒ सनि॑तौ। विप्रा॑सो वा धिया॒यव॑:
yaḥ ku̱kṣiḥ so̍ma̱pāta̍maḥ samu̱dra i̍va̱ pinva̍te| u̱rvīrāpo̱ na kā̱kuda̍:
||7||यः कु॒क्षिः सो॑म॒पात॑मः समु॒द्र इ॑व॒ पिन्व॑ते। उ॒र्वीरापो॒ न का॒कुद॑:
e̱vā hya̍sya sū̱nṛtā̍ vira̱pśī goma̍tī ma̱hī| pa̱kvā śākhā̱ na dā̱śuṣe̍
||8||ए॒वा ह्य॑स्य सू॒नृता॑ विर॒प्शी गोम॑ती म॒ही। प॒क्वा शाखा॒ न दा॒शुषे॑
e̱vā hi te̱ vibhū̍taya ū̱taya̍ indra̱ māva̍te| sa̱dyaści̱t santi̍ dā̱śuṣe̍
||9||ए॒वा हि ते॒ विभू॑तय ऊ॒तय॑ इन्द्र॒ माव॑ते। स॒द्यश्चि॒त् सन्ति॑ दा॒शुषे॑
e̱vā hya̍sya̱ kāmyā̱ stoma̍ u̱kthaṃ ca̱ śaṃsyā̍| indrā̍ya̱ soma̍pītaye
||10||ए॒वा ह्य॑स्य॒ काम्या॒ स्तोम॑ उ॒क्थं च॒ शंस्या॑। इन्द्रा॑य॒ सोम॑पीतये