Study
- Anukramaṇī
- Source
9 medhātithiḥkāṇvaḥ| 1-3 brahmaṇaspatiḥ, 4 indro brahmaṇaspatiḥ somaśca, 5 brahmaṇaspatiḥ soma iṃdro, dakṣiṇā ca, 6-8 sadasaspatiḥ, 9 sadasaspatirnarāśaṃso vā| gāyatrī|
so̱māna̱ṃ svara̍ṇaṃ kṛṇu̱hi bra̍hmaṇaspate | ka̱kṣīva̍nta̱ṃ ya au̍śi̱jaḥ
||1||सो॒मानं॒ स्वर॑णं कृणु॒हि ब्र॑ह्मणस्पते । क॒क्षीव॑न्तं॒ य औ॑शि॒जः
yo re̱vān yo a̍mīva̱hā va̍su̱vit pu̍ṣṭi̱vardha̍naḥ | sa na̍: siṣaktu̱ yastu̱raḥ
||2||यो रे॒वान् यो अ॑मीव॒हा व॑सु॒वित् पु॑ष्टि॒वर्ध॑नः । स न॑: सिषक्तु॒ यस्तु॒रः
mā na̱: śaṃso̱ ara̍ruṣo dhū̱rtiḥ praṇa̱ṅ martya̍sya | rakṣā̍ ṇo brahmaṇaspate
||3||मा न॒: शंसो॒ अर॑रुषो धू॒र्तिः प्रण॒ङ् मर्त्य॑स्य । रक्षा॑ णो ब्रह्मणस्पते
sa ghā̍ vī̱ro na ri̍ṣyati̱ yamindro̱ brahma̍ṇa̱spati̍: | somo̍ hi̱noti̱ martya̍m
||4||स घा॑ वी॒रो न रि॑ष्यति॒ यमिन्द्रो॒ ब्रह्म॑ण॒स्पति॑: । सोमो॑ हि॒नोति॒ मर्त्य॑म्
tvaṃ taṃ bra̍hmaṇaspate̱ soma̱ indra̍śca̱ martya̍m | dakṣi̍ṇā pā̱tvaṃha̍saḥ
||5||त्वं तं ब्र॑ह्मणस्पते॒ सोम॒ इन्द्र॑श्च॒ मर्त्य॑म् । दक्षि॑णा पा॒त्वंह॑सः
sada̍sa̱spati̱madbhu̍taṃ pri̱yamindra̍sya̱ kāmya̍m | sa̱niṃ me̱dhāma̍yāsiṣam
||6||सद॑स॒स्पति॒मद्भु॑तं प्रि॒यमिन्द्र॑स्य॒ काम्य॑म् । स॒निं मे॒धाम॑यासिषम्
yasmā̍dṛ̱te na sidhya̍ti ya̱jño vi̍pa̱ścita̍śca̱na | sa dhī̱nāṃ yoga̍minvati
||7||यस्मा॑दृ॒ते न सिध्य॑ति य॒ज्ञो वि॑प॒श्चित॑श्च॒न । स धी॒नां योग॑मिन्वति
ādṛ̍dhnoti ha̱viṣkṛ̍ti̱ṃ prāñca̍ṃ kṛṇotyadhva̱ram | hotrā̍ de̱veṣu̍ gacchati
||8||आदृ॑ध्नोति ह॒विष्कृ॑तिं॒ प्राञ्चं॑ कृणोत्यध्व॒रम् । होत्रा॑ दे॒वेषु॑ गच्छति
narā̱śaṃsa̍ṃ su̱dhṛṣṭa̍ma̱mapa̍śyaṃ sa̱pratha̍stamam | di̱vo na sadma̍makhasam
||9||नरा॒शंसं॑ सु॒धृष्ट॑म॒मप॑श्यं स॒प्रथ॑स्तमम् । दि॒वो न सद्म॑मखसम्