Study
- Anukramaṇī
- Source
5 dīrghatamā aucathyaḥ| agniḥ| triṣṭup|
mathī̱d yadī̍ṃ vi̱ṣṭo mā̍ta̱riśvā̱ hotā̍raṃ vi̱śvāpsu̍ṃ vi̱śvade̍vyam |
ni yaṃ da̱dhurma̍nu̱ṣyā̍su vi̱kṣu sva 1 rṇa ci̱traṃ vapu̍ṣe vi̱bhāva̍m
||1||मथी॒द् यदीं॑ वि॒ष्टो मा॑त॒रिश्वा॒ होता॑रं वि॒श्वाप्सुं॑ वि॒श्वदे॑व्यम् ।
नि यं द॒धुर्म॑नु॒ष्या॑सु वि॒क्षु स्व १ र्ण चि॒त्रं वपु॑षे वि॒भाव॑म्
da̱dā̱naminna da̍dabhanta̱ manmā̱gnirvarū̍tha̱ṃ mama̱ tasya̍ cākan |
ju̱ṣanta̱ viśvā̍nyasya̱ karmopa̍stuti̱ṃ bhara̍māṇasya kā̱roḥ
||2||द॒दा॒नमिन्न द॑दभन्त॒ मन्मा॒ग्निर्वरू॑थं॒ मम॒ तस्य॑ चाकन् ।
जु॒षन्त॒ विश्वा॑न्यस्य॒ कर्मोप॑स्तुतिं॒ भर॑माणस्य का॒रोः
nitye̍ ci̱nnu yaṃ sada̍ne jagṛ̱bhre praśa̍stibhirdadhi̱re ya̱jñiyā̍saḥ |
pra sū na̍yanta gṛ̱bhaya̍nta i̱ṣṭāvaśvā̍so̱ na ra̱thyo̍ rārahā̱ṇāḥ
||3||नित्ये॑ चि॒न्नु यं सद॑ने जगृ॒भ्रे प्रश॑स्तिभिर्दधि॒रे य॒ज्ञिया॑सः ।
प्र सू न॑यन्त गृ॒भय॑न्त इ॒ष्टावश्वा॑सो॒ न र॒थ्यो॑ रारहा॒णाः
pu̱rūṇi̍ da̱smo ni ri̍ṇāti̱ jambhai̱rād ro̍cate̱ vana̱ ā vi̱bhāvā̍ |
āda̍sya̱ vāto̱ anu̍ vāti śo̱cirastu̱rna śaryā̍masa̱nāmanu̱ dyūn
||4||पु॒रूणि॑ द॒स्मो नि रि॑णाति॒ जम्भै॒राद् रो॑चते॒ वन॒ आ वि॒भावा॑ ।
आद॑स्य॒ वातो॒ अनु॑ वाति शो॒चिरस्तु॒र्न शर्या॑मस॒नामनु॒ द्यून्
na yaṃ ri̱pavo̱ na ri̍ṣa̱ṇyavo̱ garbhe̱ santa̍ṃ reṣa̱ṇā re̱ṣaya̍nti |
a̱ndhā a̍pa̱śyā na da̍bhannabhi̱khyā nityā̍sa īṃ pre̱tāro̍ arakṣan
||5||न यं रि॒पवो॒ न रि॑ष॒ण्यवो॒ गर्भे॒ सन्तं॑ रेष॒णा रे॒षय॑न्ति ।
अ॒न्धा अ॑प॒श्या न द॑भन्नभि॒ख्या नित्या॑स ईं प्रे॒तारो॑ अरक्षन्