Study
- Anukramaṇī
- Source
8 jetā mādhucchandasaḥ| indraḥ| anuṣṭup|
indra̱ṃ viśvā̍ avīvṛdhant samu̱dravya̍casa̱ṃ gira̍: |
ra̱thīta̍maṃ ra̱thīnā̱ṃ vājā̍nā̱ṃ satpa̍ti̱ṃ pati̍m
||1||इन्द्रं॒ विश्वा॑ अवीवृधन्त् समु॒द्रव्य॑चसं॒ गिर॑: ।
र॒थीत॑मं र॒थीनां॒ वाजा॑नां॒ सत्प॑तिं॒ पति॑म्
sa̱khye ta̍ indra vā̱jino̱ mā bhe̍ma śavasaspate |
tvāma̱bhi pra ṇo̍numo̱ jetā̍ra̱mapa̍rā jitam
||2||स॒ख्ये त॑ इन्द्र वा॒जिनो॒ मा भे॑म शवसस्पते ।
त्वाम॒भि प्र णो॑नुमो॒ जेता॑र॒मप॑रा जितम्
pū̱rvīrindra̍sya rā̱tayo̱ na vi da̍syantyū̱taya̍: |
yadī̱ vāja̍sya̱ goma̍taḥ sto̱tṛbhyo̱ maṃha̍te ma̱gham
||3||पू॒र्वीरिन्द्र॑स्य रा॒तयो॒ न वि द॑स्यन्त्यू॒तय॑: ।
यदी॒ वाज॑स्य॒ गोम॑तः स्तो॒तृभ्यो॒ मंह॑ते म॒घम्
pu̱rāṃ bhi̱nduryuvā̍ ka̱virami̍taujā ajāyata |
indro̱ viśva̍sya̱ karma̍ṇo dha̱rtā va̱jrī pu̍ruṣṭu̱taḥ
||4||पु॒रां भि॒न्दुर्युवा॑ क॒विरमि॑तौजा अजायत ।
इन्द्रो॒ विश्व॑स्य॒ कर्म॑णो ध॒र्ता व॒ज्री पु॑रुष्टु॒तः
tvaṃ va̱lasya̱ goma̱to 'pā̍varadrivo̱ bila̍m |
tvāṃ de̱vā abi̍bhyuṣas tu̱jyamā̍nāsa āviṣuḥ
||5||त्वं व॒लस्य॒ गोम॒तो ऽपा॑वरद्रिवो॒ बिल॑म् ।
त्वां दे॒वा अबि॑भ्युषस् तु॒ज्यमा॑नास आविषुः
tavā̱haṃ śū̍ra rā̱tibhi̱: pratyā̍ya̱ṃ sindhu̍mā̱vada̍n |
upā̍tiṣṭhanta girvaṇo vi̱duṣṭe̱ tasya̍ kā̱rava̍:
||6||तवा॒हं शू॑र रा॒तिभि॒: प्रत्या॑यं॒ सिन्धु॑मा॒वद॑न् ।
उपा॑तिष्ठन्त गिर्वणो वि॒दुष्टे॒ तस्य॑ का॒रव॑:
mā̱yābhi̍rindra mā̱yina̱ṃ tvaṃ śuṣṇa̱mavā̍tiraḥ |
vi̱duṣṭe̱ tasya̱ medhi̍rā̱s teṣā̱ṃ śravā̱ṃsyutti̍ra
||7||मा॒याभि॑रिन्द्र मा॒यिनं॒ त्वं शुष्ण॒मवा॑तिरः ।
वि॒दुष्टे॒ तस्य॒ मेधि॑रा॒स् तेषां॒ श्रवां॒स्युत्ति॑र
indra̱mīśā̍na̱moja̍sā̱bhi stomā̍ anūṣata |
sa̱hasra̱ṃ yasya̍ rā̱taya̍ u̱ta vā̱ santi̱ bhūya̍sīḥ
||8||इन्द्र॒मीशा॑न॒मोज॑सा॒भि स्तोमा॑ अनूषत ।
स॒हस्रं॒ यस्य॑ रा॒तय॑ उ॒त वा॒ सन्ति॒ भूय॑सीः