Study
- Anukramaṇī
- Source
7 parucchepo daivodāsiḥ | indraḥ| atyaṣṭiḥ|
indrā̍ya̱ hi dyaurasu̍ro̱ ana̍mna̱tendrā̍ya ma̱hī pṛ̍thi̱vī varī̍mabhirdyu̱mnasā̍tā̱ varī̍mabhiḥ |
indra̱ṃ viśve̍ sa̱joṣa̍so de̱vāso̍ dadhire pu̱raḥ |
indrā̍ya̱ viśvā̱ sava̍nāni̱ mānu̍ṣā rā̱tāni̍ santu̱ mānu̍ṣā
||1||इन्द्रा॑य॒ हि द्यौरसु॑रो॒ अन॑म्न॒तेन्द्रा॑य म॒ही पृ॑थि॒वी वरी॑मभिर्द्यु॒म्नसा॑ता॒ वरी॑मभिः ।
इन्द्रं॒ विश्वे॑ स॒जोष॑सो दे॒वासो॑ दधिरे पु॒रः ।
इन्द्रा॑य॒ विश्वा॒ सव॑नानि॒ मानु॑षा रा॒तानि॑ सन्तु॒ मानु॑षा
viśve̍ṣu̱ hi tvā̱ sava̍neṣu tu̱ñjate̍ samā̱nameka̱ṃ vṛṣa̍maṇyava̱: pṛtha̱k sva̍: sani̱ṣyava̱: pṛtha̍k |
taṃ tvā̱ nāva̱ṃ na pa̱rṣaṇi̍ṃ śū̱ṣasya̍ dhu̱ri dhī̍mahi |
indra̱ṃ na ya̱jñaiści̱taya̍nta ā̱yava̱: stome̍bhi̱rindra̍mā̱yava̍:
||2||विश्वे॑षु॒ हि त्वा॒ सव॑नेषु तु॒ञ्जते॑ समा॒नमेकं॒ वृष॑मण्यव॒: पृथ॒क् स्व॑: सनि॒ष्यव॒: पृथ॑क् ।
तं त्वा॒ नावं॒ न प॒र्षणिं॑ शू॒षस्य॑ धु॒रि धी॑महि ।
इन्द्रं॒ न य॒ज्ञैश्चि॒तय॑न्त आ॒यव॒: स्तोमे॑भि॒रिन्द्र॑मा॒यव॑:
vi tvā̍ tatasre mithu̱nā a̍va̱syavo̍ vra̱jasya̍ sā̱tā gavya̍sya ni̱:sṛja̱: sakṣa̍nta indra ni̱:sṛja̍: |
yad ga̱vyantā̱ dvā janā̱ sva 1ryantā̍ sa̱mūha̍si |
ā̱viṣkari̍kra̱d vṛṣa̍ṇaṃ sacā̱bhuva̱ṃ vajra̍mindra sacā̱bhuva̍m
||3||वि त्वा॑ ततस्रे मिथु॒ना अ॑व॒स्यवो॑ व्र॒जस्य॑ सा॒ता गव्य॑स्य नि॒:सृज॒: सक्ष॑न्त इन्द्र नि॒:सृज॑: ।
यद् ग॒व्यन्ता॒ द्वा जना॒ स्व १र्यन्ता॑ स॒मूह॑सि ।
आ॒विष्करि॑क्र॒द् वृष॑णं सचा॒भुवं॒ वज्र॑मिन्द्र सचा॒भुव॑म्
vi̱duṣṭe̍ a̱sya vī̱rya̍sya pū̱rava̱: puro̱ yadi̍ndra̱ śāra̍dīra̱vāti̍raḥ sāsahā̱no a̱vāti̍raḥ |
śāsa̱stami̍ndra̱ martya̱maya̍jyuṃ śavasaspate |
ma̱hīma̍muṣṇāḥ pṛthi̱vīmi̱mā a̱po ma̍ndasā̱na i̱mā a̱paḥ
||4||वि॒दुष्टे॑ अ॒स्य वी॒र्य॑स्य पू॒रव॒: पुरो॒ यदि॑न्द्र॒ शार॑दीर॒वाति॑रः सासहा॒नो अ॒वाति॑रः ।
शास॒स्तमि॑न्द्र॒ मर्त्य॒मय॑ज्युं शवसस्पते ।
म॒हीम॑मुष्णाः पृथि॒वीमि॒मा अ॒पो म॑न्दसा॒न इ॒मा अ॒पः
ādit te̱ a̱sya vī̱rya̍sya carkira̱n made̍ṣu vṛṣannu̱śijo̱ yadāvi̍tha sakhīya̱to yadāvi̍tha |
ca̱kartha̍ kā̱rame̍bhya̱: pṛta̍nāsu̱ prava̍ntave |
te a̱nyāma̍nyāṃ na̱dya̍ṃ saniṣṇata śrava̱syanta̍: saniṣṇata
||5||आदित् ते॒ अ॒स्य वी॒र्य॑स्य चर्किर॒न् मदे॑षु वृषन्नु॒शिजो॒ यदावि॑थ सखीय॒तो यदावि॑थ ।
च॒कर्थ॑ का॒रमे॑भ्य॒: पृत॑नासु॒ प्रव॑न्तवे ।
ते अ॒न्याम॑न्यां न॒द्यं॑ सनिष्णत श्रव॒स्यन्त॑: सनिष्णत
u̱to no̍ a̱syā u̱ṣaso̍ ju̱ṣeta̱ hya 1rkasya̍ bodhi ha̱viṣo̱ havī̍mabhi̱: sva̍rṣātā̱ havī̍mabhiḥ |
yadi̍ndra̱ hanta̍ve̱ mṛdho̱ vṛṣā̍ vajri̱ñcike̍tasi |
ā me̍ a̱sya ve̱dhaso̱ navī̍yaso̱ manma̍ śrudhi̱ navī̍yasaḥ
||6||उ॒तो नो॑ अ॒स्या उ॒षसो॑ जु॒षेत॒ ह्य १र्कस्य॑ बोधि ह॒विषो॒ हवी॑मभि॒: स्व॑र्षाता॒ हवी॑मभिः ।
यदि॑न्द्र॒ हन्त॑वे॒ मृधो॒ वृषा॑ वज्रि॒ञ्चिके॑तसि ।
आ मे॑ अ॒स्य वे॒धसो॒ नवी॑यसो॒ मन्म॑ श्रुधि॒ नवी॑यसः
tvaṃ tami̍ndra vāvṛdhā̱no a̍sma̱yura̍mitra̱yanta̍ṃ tuvijāta̱ martya̱ṃ vajre̍ṇa śūra̱ martya̍m |
ja̱hi yo no̍ aghā̱yati̍ śṛṇu̱ṣva su̱śrava̍stamaḥ |
ri̱ṣṭaṃ na yāma̱nnapa̍ bhūtu durma̱tirviśvāpa̍ bhūtu durma̱tiḥ
||7||त्वं तमि॑न्द्र वावृधा॒नो अ॑स्म॒युर॑मित्र॒यन्तं॑ तुविजात॒ मर्त्यं॒ वज्रे॑ण शूर॒ मर्त्य॑म् ।
ज॒हि यो नो॑ अघा॒यति॑ शृणु॒ष्व सु॒श्रव॑स्तमः ।
रि॒ष्टं न याम॒न्नप॑ भूतु दुर्म॒तिर्विश्वाप॑ भूतु दुर्म॒तिः