Study
- Anukramaṇī
- Source
7 kakṣīvān dairghatamasa auśijaḥ| svanayasya dānastutiḥ| triṣṭup, 4-5 jagatī|
prā̱tā ratna̍ṃ prāta̱ritvā̍ dadhāti̱ taṃ ci̍ki̱tvān pra̍ti̱gṛhyā̱ ni dha̍tte |
tena̍ pra̱jāṃ va̱rdhaya̍māna̱ āyū̍ rā̱yaspoṣe̍ṇa sacate su̱vīra̍:
||1||प्रा॒ता रत्नं॑ प्रात॒रित्वा॑ दधाति॒ तं चि॑कि॒त्वान् प्र॑ति॒गृह्या॒ नि ध॑त्ते ।
तेन॑ प्र॒जां व॒र्धय॑मान॒ आयू॑ रा॒यस्पोषे॑ण सचते सु॒वीर॑:
su̱gura̍sat suhira̱ṇyaḥ svaśvo̍ bṛ̱hada̍smai̱ vaya̱ indro̍ dadhāti |
yastvā̱yanta̱ṃ vasu̍nā prātaritvo mu̱kṣīja̍yeva̱ padi̍mutsi̱nāti̍
||2||सु॒गुर॑सत् सुहिर॒ण्यः स्वश्वो॑ बृ॒हद॑स्मै॒ वय॒ इन्द्रो॑ दधाति ।
यस्त्वा॒यन्तं॒ वसु॑ना प्रातरित्वो मु॒क्षीज॑येव॒ पदि॑मुत्सि॒नाति॑
āya̍ma̱dya su̱kṛta̍ṃ prā̱tari̱cchanni̱ṣṭeḥ pu̱traṃ vasu̍matā̱ rathe̍na |
a̱ṃśoḥ su̱taṃ pā̍yaya matsa̱rasya̍ kṣa̱yadvī̍raṃ vardhaya sū̱nṛtā̍bhiḥ
||3||आय॑म॒द्य सु॒कृतं॑ प्रा॒तरि॒च्छन्नि॒ष्टेः पु॒त्रं वसु॑मता॒ रथे॑न ।
अं॒शोः सु॒तं पा॑यय मत्स॒रस्य॑ क्ष॒यद्वी॑रं वर्धय सू॒नृता॑भिः
upa̍ kṣaranti̱ sindha̍vo mayo̱bhuva̍ ījā̱naṃ ca̍ ya̱kṣyamā̍ṇaṃ ca dhe̱nava̍: |
pṛ̱ṇanta̍ṃ ca̱ papu̍riṃ ca śrava̱syavo̍ ghṛ̱tasya̱ dhārā̱ upa̍ yanti vi̱śvata̍:
||4||उप॑ क्षरन्ति॒ सिन्ध॑वो मयो॒भुव॑ ईजा॒नं च॑ य॒क्ष्यमा॑णं च धे॒नव॑: ।
पृ॒णन्तं॑ च॒ पपु॑रिं च श्रव॒स्यवो॑ घृ॒तस्य॒ धारा॒ उप॑ यन्ति वि॒श्वत॑:
nāka̍sya pṛ̱ṣṭhe adhi̍ tiṣṭhati śri̱to yaḥ pṛ̱ṇāti̱ sa ha̍ de̱veṣu̍ gacchati |
tasmā̱ āpo̍ ghṛ̱tama̍rṣanti̱ sindha̍va̱stasmā̍ i̱yaṃ dakṣi̍ṇā pinvate̱ sadā̍
||5||नाक॑स्य पृ॒ष्ठे अधि॑ तिष्ठति श्रि॒तो यः पृ॒णाति॒ स ह॑ दे॒वेषु॑ गच्छति ।
तस्मा॒ आपो॑ घृ॒तम॑र्षन्ति॒ सिन्ध॑व॒स्तस्मा॑ इ॒यं दक्षि॑णा पिन्वते॒ सदा॑
dakṣi̍ṇāvatā̱midi̱māni̍ ci̱trā dakṣi̍ṇāvatāṃ di̱vi sūryā̍saḥ |
dakṣi̍ṇāvanto a̱mṛta̍ṃ bhajante̱ dakṣi̍ṇāvanta̱: pra ti̍ranta̱ āyu̍:
||6||दक्षि॑णावता॒मिदि॒मानि॑ चि॒त्रा दक्षि॑णावतां दि॒वि सूर्या॑सः ।
दक्षि॑णावन्तो अ॒मृतं॑ भजन्ते॒ दक्षि॑णावन्त॒: प्र ति॑रन्त॒ आयु॑:
mā pṛ̱ṇanto̱ duri̍ta̱mena̱ āra̱n mā jā̍riṣuḥ sū̱raya̍: suvra̱tāsa̍: |
a̱nyasteṣā̍ṃ pari̱dhira̍stu̱ kaści̱dapṛ̍ṇantama̱bhi saṃ ya̍ntu̱ śokā̍:
||7||मा पृ॒णन्तो॒ दुरि॑त॒मेन॒ आर॒न् मा जा॑रिषुः सू॒रय॑: सुव्र॒तास॑: ।
अ॒न्यस्तेषां॑ परि॒धिर॑स्तु॒ कश्चि॒दपृ॑णन्तम॒भि सं य॑न्तु॒ शोका॑: