Study
- Anukramaṇī
- Source
10 ājīgartiḥ śunaḥśepa sa kṛtrimo vaiśvāmitro devarātaḥ| agniḥ,| gāyatrī|
vasi̍ṣvā̱ hi mi̍yedhya̱ vastrā̍ṇyūrjāṃ pate | semaṃ no̍ adhva̱raṃ ya̍ja
||1||वसि॑ष्वा॒ हि मि॑येध्य॒ वस्त्रा॑ण्यूर्जां पते । सेमं नो॑ अध्व॒रं य॑ज
ni no̱ hotā̱ vare̍ṇya̱: sadā̍ yaviṣṭha̱ manma̍bhiḥ | agne̍ di̱vitma̍tā̱ vaca̍:
||2||नि नो॒ होता॒ वरे॑ण्य॒: सदा॑ यविष्ठ॒ मन्म॑भिः । अग्ने॑ दि॒वित्म॑ता॒ वच॑:
ā hi ṣmā̍ sū̱nave̍ pi̱tāpiryaja̍tyā̱paye̍ | sakhā̱ sakhye̱ vare̍ṇyaḥ
||3||आ हि ष्मा॑ सू॒नवे॑ पि॒तापिर्यज॑त्या॒पये॑ । सखा॒ सख्ये॒ वरे॑ण्यः
ā no̍ ba̱rhī ri̱śāda̍so̱ varu̍ṇo mi̱tro a̍rya̱mā | sīda̍ntu̱ manu̍ṣo yathā
||4||आ नो॑ ब॒र्ही रि॒शाद॑सो॒ वरु॑णो मि॒त्रो अ॑र्य॒मा । सीद॑न्तु॒ मनु॑षो यथा
pūrvya̍ hotara̱sya no̱ manda̍sva sa̱khyasya̍ ca | i̱mā u̱ ṣu śru̍dhī̱ gira̍:
||5||पूर्व्य॑ होतर॒स्य नो॒ मन्द॑स्व स॒ख्यस्य॑ च । इ॒मा उ॒ षु श्रु॑धी॒ गिर॑:
yacci̱ddhi śaśva̍tā̱ tanā̍ de̱vaṃde̍va̱ṃ yajā̍mahe | tve iddhū̍yate ha̱viḥ
||6||यच्चि॒द्धि शश्व॑ता॒ तना॑ दे॒वंदे॑वं॒ यजा॑महे । त्वे इद्धू॑यते ह॒विः
pri̱yo no̍ astu vi̱śpati̱rhotā̍ ma̱ndro vare̍ṇyaḥ | pri̱yāḥ sva̱gnayo̍ va̱yam
||7||प्रि॒यो नो॑ अस्तु वि॒श्पति॒र्होता॑ म॒न्द्रो वरे॑ण्यः । प्रि॒याः स्व॒ग्नयो॑ व॒यम्
sva̱gnayo̱ hi vārya̍ṃ de̱vāso̍ dadhi̱re ca̍ naḥ | sva̱gnayo̍ manāmahe
||8||स्व॒ग्नयो॒ हि वार्यं॑ दे॒वासो॑ दधि॒रे च॑ नः । स्व॒ग्नयो॑ मनामहे
athā̍ na u̱bhaye̍ṣā̱mamṛ̍ta̱ martyā̍nām | mi̱thaḥ sa̍ntu̱ praśa̍stayaḥ
||9||अथा॑ न उ॒भये॑षा॒ममृ॑त॒ मर्त्या॑नाम् । मि॒थः स॑न्तु॒ प्रश॑स्तयः
viśve̍bhiragne a̱gnibhi̍ri̱maṃ ya̱jñami̱daṃ vaca̍: | cano̍ dhāḥ sahaso yaho
||10||विश्वे॑भिरग्ने अ॒ग्निभि॑रि॒मं य॒ज्ञमि॒दं वच॑: । चनो॑ धाः सहसो यहो