Study
- Anukramaṇī
- Source
10 madhucchandā vaiśvāmitraḥ| indraḥ| gāyatrī|
su̱rū̱pa̱kṛ̱tnumū̱taye̍ su̱dughā̍miva go̱duhe̍| ju̱hū̱masi̱ dyavi̍dyavi
||1||सु॒रू॒प॒कृ॒त्नुमू॒तये॑ सु॒दुघा॑मिव गो॒दुहे॑। जु॒हू॒मसि॒ द्यवि॑द्यवि
upa̍ na̱: sava̱nā ga̍hi̱ soma̍sya somapāḥ piba| go̱dā id re̱vato̱ mada̍:
||2||उप॑ न॒: सव॒ना ग॑हि॒ सोम॑स्य सोमपाः पिब। गो॒दा इद् रे॒वतो॒ मद॑:
athā̍ te̱ anta̍mānāṃ vi̱dyāma̍ sumatī̱nām| mā no̱ ati̍ khya̱ ā ga̍hi
||3||अथा॑ ते॒ अन्त॑मानां वि॒द्याम॑ सुमती॒नाम्। मा नो॒ अति॑ ख्य॒ आ ग॑हि
pare̍hi̱ vigra̱mastṛ̍ta̱mindra̍ṃ pṛcchā vipa̱ścita̍m| yaste̱ sakhi̍bhya̱ ā vara̍m
||4||परे॑हि॒ विग्र॒मस्तृ॑त॒मिन्द्रं॑ पृच्छा विप॒श्चित॑म्। यस्ते॒ सखि॑भ्य॒ आ वर॑म्
u̱ta bru̍vantu no̱ nido̱ nira̱nyata̍ścidārata| dadhā̍nā̱ indra̱ id duva̍:
||5||उ॒त ब्रु॑वन्तु नो॒ निदो॒ निर॒न्यत॑श्चिदारत। दधा॑ना॒ इन्द्र॒ इद् दुव॑:
u̱ta na̍: su̱bhagā̍m̐ a̱rirvo̱ceyu̍rdasma kṛ̱ṣṭaya̍:| syāmedindra̍sya̱ śarma̍ṇi
||6||उ॒त न॑: सु॒भगाँ॑ अ॒रिर्वो॒चेयु॑र्दस्म कृ॒ष्टय॑:। स्यामेदिन्द्र॑स्य॒ शर्म॑णि
emā̱śumā̱śave̍ bhara yajña̱śriya̍ṃ nṛ̱māda̍nam| pa̱ta̱yan ma̍nda̱yatsa̍kham
||7||एमा॒शुमा॒शवे॑ भर यज्ञ॒श्रियं॑ नृ॒माद॑नम्। प॒त॒यन् म॑न्द॒यत्स॑खम्
a̱sya pī̱tvā śa̍takrato gha̱no vṛ̱trāṇā̍mabhavaḥ| prāvo̱ vāje̍ṣu vā̱jina̍m
||8||अ॒स्य पी॒त्वा श॑तक्रतो घ॒नो वृ॒त्राणा॑मभवः। प्रावो॒ वाजे॑षु वा॒जिन॑म्
taṃ tvā̱ vāje̍ṣu vā̱jina̍ṃ vā̱jayā̍maḥ śatakrato| dhanā̍nāmindra sā̱taye̍
||9||तं त्वा॒ वाजे॑षु वा॒जिनं॑ वा॒जया॑मः शतक्रतो। धना॑नामिन्द्र सा॒तये॑
yo rā̱yo̱3'vani̍rma̱hāntsu̍pā̱raḥ su̍nva̱taḥ sakhā̍| tasmā̱ indrā̍ya gāyata
||10||यो रा॒यो॒३ऽवनि॑र्म॒हान्त्सु॑पा॒रः सु॑न्व॒तः सखा॑। तस्मा॒ इन्द्रा॑य गायत