Study
- Anukramaṇī
- Source
8 kutsa āṅgirasaḥ| indrāgnī| triṣṭup|
vi hyakhya̱ṃ mana̍sā̱ vasya̍ i̱cchannindrā̍gnī jñā̱sa u̱ta vā̍ sajā̱tān |
nānyā yu̱vat prama̍tirasti̱ mahya̱ṃ sa vā̱ṃ dhiya̍ṃ vāja̱yantī̍matakṣam
||1||वि ह्यख्यं॒ मन॑सा॒ वस्य॑ इ॒च्छन्निन्द्रा॑ग्नी ज्ञा॒स उ॒त वा॑ सजा॒तान् ।
नान्या यु॒वत् प्रम॑तिरस्ति॒ मह्यं॒ स वां॒ धियं॑ वाज॒यन्ती॑मतक्षम्
aśra̍va̱ṃ hi bhū̍ri̱dāva̍ttarā vā̱ṃ vijā̍māturu̱ta vā̍ ghā syā̱lāt |
athā̱ soma̍sya̱ praya̍tī yu̱vabhyā̱mindrā̍gnī̱ stoma̍ṃ janayāmi̱ navya̍m
||2||अश्र॑वं॒ हि भू॑रि॒दाव॑त्तरा वां॒ विजा॑मातुरु॒त वा॑ घा स्या॒लात् ।
अथा॒ सोम॑स्य॒ प्रय॑ती यु॒वभ्या॒मिन्द्रा॑ग्नी॒ स्तोमं॑ जनयामि॒ नव्य॑म्
mā cche̍dma ra̱śmīm̐riti̱ nādha̍mānāḥ pitṝ̱ṇāṃ śa̱ktīra̍nu̱yaccha̍mānāḥ |
i̱ndrā̱gnibhyā̱ṃ kaṃ vṛṣa̍ṇo madanti̱ tā hyadrī̍ dhi̱ṣaṇā̍yā u̱pasthe̍
||3||मा च्छे॑द्म र॒श्मीँरिति॒ नाध॑मानाः पितॄ॒णां श॒क्तीर॑नु॒यच्छ॑मानाः ।
इ॒न्द्रा॒ग्निभ्यां॒ कं वृष॑णो मदन्ति॒ ता ह्यद्री॑ धि॒षणा॑या उ॒पस्थे॑
yu̱vābhyā̍ṃ de̱vī dhi̱ṣaṇā̱ madā̱yendrā̍gnī̱ soma̍muśa̱tī su̍noti |
tāva̍śvinā bhadrahastā supāṇī̱ ā dhā̍vata̱ṃ madhu̍nā pṛ̱ṅktama̱psu
||4||यु॒वाभ्यां॑ दे॒वी धि॒षणा॒ मदा॒येन्द्रा॑ग्नी॒ सोम॑मुश॒ती सु॑नोति ।
ताव॑श्विना भद्रहस्ता सुपाणी॒ आ धा॑वतं॒ मधु॑ना पृ॒ङ्क्तम॒प्सु
yu̱vāmi̍ndrāgnī̱ vasu̍no vibhā̱ge ta̱vasta̍mā śuśrava vṛtra̱hatye̍ |
tāvā̱sadyā̍ ba̱rhiṣi̍ ya̱jñe a̱smin pra ca̍rṣaṇī mādayethāṃ su̱tasya̍
||5||यु॒वामि॑न्द्राग्नी॒ वसु॑नो विभा॒गे त॒वस्त॑मा शुश्रव वृत्र॒हत्ये॑ ।
तावा॒सद्या॑ ब॒र्हिषि॑ य॒ज्ञे अ॒स्मिन् प्र च॑र्षणी मादयेथां सु॒तस्य॑
pra ca̍rṣa̱ṇibhya̍: pṛtanā̱have̍ṣu̱ pra pṛ̍thi̱vyā ri̍ricāthe di̱vaśca̍ |
pra sindhu̍bhya̱: pra gi̱ribhyo̍ mahi̱tvā prendrā̍gnī̱ viśvā̱ bhuva̱nātya̱nyā
||6||प्र च॑र्ष॒णिभ्य॑: पृतना॒हवे॑षु॒ प्र पृ॑थि॒व्या रि॑रिचाथे दि॒वश्च॑ ।
प्र सिन्धु॑भ्य॒: प्र गि॒रिभ्यो॑ महि॒त्वा प्रेन्द्रा॑ग्नी॒ विश्वा॒ भुव॒नात्य॒न्या
ā bha̍rata̱ṃ śikṣa̍taṃ vajrabāhū a̱smām̐ i̍ndrāgnī avata̱ṃ śacī̍bhiḥ |
i̱me nu te ra̱śmaya̱: sūrya̍sya̱ yebhi̍: sapi̱tvaṃ pi̱taro̍ na̱ āsa̍n
||7||आ भ॑रतं॒ शिक्ष॑तं वज्रबाहू अ॒स्माँ इ॑न्द्राग्नी अवतं॒ शची॑भिः ।
इ॒मे नु ते र॒श्मय॒: सूर्य॑स्य॒ येभि॑: सपि॒त्वं पि॒तरो॑ न॒ आस॑न्
pura̍ṃdarā̱ śikṣa̍taṃ vajrahastā̱smām̐ i̍ndrāgnī avata̱ṃ bhare̍ṣu |
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ
||8||पुरं॑दरा॒ शिक्ष॑तं वज्रहस्ता॒स्माँ इ॑न्द्राग्नी अवतं॒ भरे॑षु ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः