Study
- Anukramaṇī
- Source
6 agastyo maitrāvaruṇiḥ | marutaḥ,3-6 marutvānindraḥ| triṣṭup|
prati̍ va e̱nā nama̍sā̱hame̍mi sū̱ktena̍ bhikṣe suma̱tiṃ tu̱rāṇā̍m |
ra̱rā̱ṇatā̍ maruto ve̱dyābhi̱rni hel̤o̍ dha̱tta vi mu̍cadhva̱maśvā̍n
||1||प्रति॑ व ए॒ना नम॑सा॒हमे॑मि सू॒क्तेन॑ भिक्षे सुम॒तिं तु॒राणा॑म् ।
र॒रा॒णता॑ मरुतो वे॒द्याभि॒र्नि हेळो॑ ध॒त्त वि मु॑चध्व॒मश्वा॑न्
e̱ṣa va̱: stomo̍ maruto̱ nama̍svān hṛ̱dā ta̱ṣṭo mana̍sā dhāyi devāḥ |
upe̱mā yā̍ta̱ mana̍sā juṣā̱ṇā yū̱yaṃ hi ṣṭhā nama̍sa̱ id vṛ̱dhāsa̍:
||2||ए॒ष व॒: स्तोमो॑ मरुतो॒ नम॑स्वान् हृ॒दा त॒ष्टो मन॑सा धायि देवाः ।
उपे॒मा या॑त॒ मन॑सा जुषा॒णा यू॒यं हि ष्ठा नम॑स॒ इद् वृ॒धास॑:
stu̱tāso̍ no ma̱ruto̍ mṛl̤ayantū̱ta stu̱to ma̱ghavā̱ śambha̍viṣṭhaḥ |
ū̱rdhvā na̍: santu ko̱myā vanā̱nyahā̍ni̱ viśvā̍ maruto jigī̱ṣā
||3||स्तु॒तासो॑ नो म॒रुतो॑ मृळयन्तू॒त स्तु॒तो म॒घवा॒ शम्भ॑विष्ठः ।
ऊ॒र्ध्वा न॑: सन्तु को॒म्या वना॒न्यहा॑नि॒ विश्वा॑ मरुतो जिगी॒षा
a̱smāda̱haṃ ta̍vi̱ṣādīṣa̍māṇa̱ indrā̍d bhi̱yā ma̍ruto̱ reja̍mānaḥ |
yu̱ṣmabhya̍ṃ ha̱vyā niśi̍tānyāsa̱n tānyā̱re ca̍kṛmā mṛ̱l̤atā̍ naḥ
||4||अ॒स्माद॒हं त॑वि॒षादीष॑माण॒ इन्द्रा॑द् भि॒या म॑रुतो॒ रेज॑मानः ।
यु॒ष्मभ्यं॑ ह॒व्या निशि॑तान्यास॒न् तान्या॒रे च॑कृमा मृ॒ळता॑ नः
yena̱ mānā̍saści̱taya̍nta u̱srā vyu̍ṣṭiṣu̱ śava̍sā̱ śaśva̍tīnām |
sa no̍ ma̱rudbhi̍rvṛṣabha̱ śravo̍ dhā u̱gra u̱grebhi̱: sthavi̍raḥ saho̱dāḥ
||5||येन॒ माना॑सश्चि॒तय॑न्त उ॒स्रा व्यु॑ष्टिषु॒ शव॑सा॒ शश्व॑तीनाम् ।
स नो॑ म॒रुद्भि॑र्वृषभ॒ श्रवो॑ धा उ॒ग्र उ॒ग्रेभि॒: स्थवि॑रः सहो॒दाः
tvaṃ pā̍hīndra̱ sahī̍yaso̱ nṝn bhavā̍ ma̱rudbhi̱rava̍yātahel̤āḥ |
su̱pra̱ke̱tebhi̍: sāsa̱hirdadhā̍no vi̱dyāme̱ṣaṃ vṛ̱jana̍ṃ jī̱radā̍num
||6||त्वं पा॑हीन्द्र॒ सही॑यसो॒ नॄन् भवा॑ म॒रुद्भि॒रव॑यातहेळाः ।
सु॒प्र॒के॒तेभि॑: सास॒हिर्दधा॑नो वि॒द्यामे॒षं वृ॒जनं॑ जी॒रदा॑नुम्