Study
- Anukramaṇī
- Source
9 medhātithiḥkāṇvaḥ| agnirmarutaśca|gāyatrī|
prati̱ tyaṃ cāru̍madhva̱raṃ go̍pī̱thāya̱ pra hū̍yase | ma̱rudbhi̍ragna̱ ā ga̍hi
||1||प्रति॒ त्यं चारु॑मध्व॒रं गो॑पी॒थाय॒ प्र हू॑यसे । म॒रुद्भि॑रग्न॒ आ ग॑हि
na̱hi de̱vo na martyo̍ ma̱hastava̱ kratu̍ṃ pa̱raḥ | ma̱rudbhi̍ragna̱ ā ga̍hi
||2||न॒हि दे॒वो न मर्त्यो॑ म॒हस्तव॒ क्रतुं॑ प॒रः । म॒रुद्भि॑रग्न॒ आ ग॑हि
ye ma̱ho raja̍so vi̱durviśve̍ de̱vāso̍ a̱druha̍: | ma̱rudbhi̍ragna̱ ā ga̍hi
||3||ये म॒हो रज॑सो वि॒दुर्विश्वे॑ दे॒वासो॑ अ॒द्रुह॑: । म॒रुद्भि॑रग्न॒ आ ग॑हि
ya u̱grā a̱rkamā̍nṛ̱curanā̍dhṛṣṭāsa̱ oja̍sā | ma̱rudbhi̍ragna̱ ā ga̍hi
||4||य उ॒ग्रा अ॒र्कमा॑नृ॒चुरना॑धृष्टास॒ ओज॑सा । म॒रुद्भि॑रग्न॒ आ ग॑हि
ye śu̱bhrā gho̱rava̍rpasaḥ sukṣa̱trāso̍ ri̱śāda̍saḥ | ma̱rudbhi̍ragna̱ ā ga̍hi
||5||ये शु॒भ्रा घो॒रव॑र्पसः सुक्ष॒त्रासो॑ रि॒शाद॑सः । म॒रुद्भि॑रग्न॒ आ ग॑हि
ye nāka̱syādhi̍ roca̱ne di̱vi de̱vāsa̱ āsa̍te | ma̱rudbhi̍ragna̱ ā ga̍hi
||6||ये नाक॒स्याधि॑ रोच॒ने दि॒वि दे॒वास॒ आस॑ते । म॒रुद्भि॑रग्न॒ आ ग॑हि
ya ī̱ṅkhaya̍nti̱ parva̍tān ti̱raḥ sa̍mu̱drama̍rṇa̱vam | ma̱rudbhi̍ragna̱ ā ga̍hi
||7||य ई॒ङ्खय॑न्ति॒ पर्व॑तान् ति॒रः स॑मु॒द्रम॑र्ण॒वम् । म॒रुद्भि॑रग्न॒ आ ग॑हि
ā ye ta̱nvanti̍ ra̱śmibhi̍s ti̱raḥ sa̍mu̱dramoja̍sā | ma̱rudbhi̍ragna̱ ā ga̍hi
||8||आ ये त॒न्वन्ति॑ र॒श्मिभि॑स् ति॒रः स॑मु॒द्रमोज॑सा । म॒रुद्भि॑रग्न॒ आ ग॑हि
a̱bhi tvā̍ pū̱rvapī̍taye sṛ̱jāmi̍ so̱myaṃ madhu̍ | ma̱rudbhi̍ragna̱ ā ga̍hi
||9||अ॒भि त्वा॑ पू॒र्वपी॑तये सृ॒जामि॑ सो॒म्यं मधु॑ । म॒रुद्भि॑रग्न॒ आ ग॑हि