Study
- Anukramaṇī
- Source
6 dīrghatamā aucathyaḥ| aśvinau| jagatī, 5-6 triṣṭup|
abo̍dhya̱gnirjma ude̍ti̱ sūryo̱ vyu 1ṣāśca̱ndrā ma̱hyā̍vo a̱rciṣā̍ |
āyu̍kṣātāma̱śvinā̱ yāta̍ve̱ ratha̱ṃ prāsā̍vīd de̱vaḥ sa̍vi̱tā jaga̱t pṛtha̍k
||1||अबो॑ध्य॒ग्निर्ज्म उदे॑ति॒ सूर्यो॒ व्यु १षाश्च॒न्द्रा म॒ह्या॑वो अ॒र्चिषा॑ ।
आयु॑क्षाताम॒श्विना॒ यात॑वे॒ रथं॒ प्रासा॑वीद् दे॒वः स॑वि॒ता जग॒त् पृथ॑क्
yad yu̱ñjāthe̱ vṛṣa̍ṇamaśvinā̱ ratha̍ṃ ghṛ̱tena̍ no̱ madhu̍nā kṣa̱tramu̍kṣatam |
a̱smāka̱ṃ brahma̱ pṛta̍nāsu jinvataṃ va̱yaṃ dhanā̱ śūra̍sātā bhajemahi
||2||यद् यु॒ञ्जाथे॒ वृष॑णमश्विना॒ रथं॑ घृ॒तेन॑ नो॒ मधु॑ना क्ष॒त्रमु॑क्षतम् ।
अ॒स्माकं॒ ब्रह्म॒ पृत॑नासु जिन्वतं व॒यं धना॒ शूर॑साता भजेमहि
a̱rvāṅ tri̍ca̱kro ma̍dhu̱vāha̍no̱ ratho̍ jī̱rāśvo̍ a̱śvino̍ryātu̱ suṣṭu̍taḥ |
tri̱va̱ndhu̱ro ma̱ghavā̍ vi̱śvasau̍bhaga̱: śaṃ na̱ ā va̍kṣad dvi̱pade̱ catu̍ṣpade
||3||अ॒र्वाङ् त्रि॑च॒क्रो म॑धु॒वाह॑नो॒ रथो॑ जी॒राश्वो॑ अ॒श्विनो॑र्यातु॒ सुष्टु॑तः ।
त्रि॒व॒न्धु॒रो म॒घवा॑ वि॒श्वसौ॑भग॒: शं न॒ आ व॑क्षद् द्वि॒पदे॒ चतु॑ष्पदे
ā na̱ ūrja̍ṃ vahatamaśvinā yu̱vaṃ madhu̍matyā na̱: kaśa̍yā mimikṣatam |
prāyu̱stāri̍ṣṭa̱ṃ nī rapā̍ṃsi mṛkṣata̱ṃ sedha̍ta̱ṃ dveṣo̱ bhava̍taṃ sacā̱bhuvā̍
||4||आ न॒ ऊर्जं॑ वहतमश्विना यु॒वं मधु॑मत्या न॒: कश॑या मिमिक्षतम् ।
प्रायु॒स्तारि॑ष्टं॒ नी रपां॑सि मृक्षतं॒ सेध॑तं॒ द्वेषो॒ भव॑तं सचा॒भुवा॑
yu̱vaṃ ha̱ garbha̱ṃ jaga̍tīṣu dhattho yu̱vaṃ viśve̍ṣu̱ bhuva̍neṣva̱ntaḥ |
yu̱vama̱gniṃ ca̍ vṛṣaṇāva̱paśca̱ vana̱spatī̍m̐raśvinā̱vaira̍yethām
||5||यु॒वं ह॒ गर्भं॒ जग॑तीषु धत्थो यु॒वं विश्वे॑षु॒ भुव॑नेष्व॒न्तः ।
यु॒वम॒ग्निं च॑ वृषणाव॒पश्च॒ वन॒स्पतीँ॑रश्विना॒वैर॑येथाम्
yu̱vaṃ ha̍ stho bhi̱ṣajā̍ bheṣa̱jebhi̱ratho̍ ha stho ra̱thyā̱ 3 rāthye̍bhiḥ |
atho̍ ha kṣa̱tramadhi̍ dhattha ugrā̱ yo vā̍ṃ ha̱viṣmā̱n mana̍sā da̱dāśa̍
||6||यु॒वं ह॑ स्थो भि॒षजा॑ भेष॒जेभि॒रथो॑ ह स्थो र॒थ्या॒ ३ राथ्ये॑भिः ।
अथो॑ ह क्ष॒त्रमधि॑ धत्थ उग्रा॒ यो वां॑ ह॒विष्मा॒न् मन॑सा द॒दाश॑