Study
- Anukramaṇī
- Source
10 kakṣīvān dairghatamasa auśijaḥ| aśvinau| jagatī|
ā vā̱ṃ ratha̍ṃ purumā̱yaṃ ma̍no̱juva̍ṃ jī̱rāśva̍ṃ ya̱jñiya̍ṃ jī̱vase̍ huve |
sa̱hasra̍ketuṃ va̱nina̍ṃ śa̱tadva̍suṃ śruṣṭī̱vāna̍ṃ varivo̱dhāma̱bhi praya̍:
||1||आ वां॒ रथं॑ पुरुमा॒यं म॑नो॒जुवं॑ जी॒राश्वं॑ य॒ज्ञियं॑ जी॒वसे॑ हुवे ।
स॒हस्र॑केतुं व॒निनं॑ श॒तद्व॑सुं श्रुष्टी॒वानं॑ वरिवो॒धाम॒भि प्रय॑:
ū̱rdhvā dhī̱tiḥ pratya̍sya̱ prayā̍ma̱nyadhā̍yi̱ śasma̱ntsama̍yanta̱ ā diśa̍: |
svadā̍mi gha̱rmaṃ prati̍ yantyū̱taya̱ ā vā̍mū̱rjānī̱ ratha̍maśvināruhat
||2||ऊ॒र्ध्वा धी॒तिः प्रत्य॑स्य॒ प्रया॑म॒न्यधा॑यि॒ शस्म॒न्त्सम॑यन्त॒ आ दिश॑: ।
स्वदा॑मि घ॒र्मं प्रति॑ यन्त्यू॒तय॒ आ वा॑मू॒र्जानी॒ रथ॑मश्विनारुहत्
saṃ yanmi̱thaḥ pa̍spṛdhā̱nāso̱ agma̍ta śu̱bhe ma̱khā ami̍tā jā̱yavo̱ raṇe̍ |
yu̱voraha̍ prava̱ṇe ce̍kite̱ ratho̱ yada̍śvinā̱ vaha̍thaḥ sū̱rimā vara̍m
||3||सं यन्मि॒थः प॑स्पृधा॒नासो॒ अग्म॑त शु॒भे म॒खा अमि॑ता जा॒यवो॒ रणे॑ ।
यु॒वोरह॑ प्रव॒णे चे॑किते॒ रथो॒ यद॑श्विना॒ वह॑थः सू॒रिमा वर॑म्
yu̱vaṃ bhu̱jyuṃ bhu̱ramā̍ṇa̱ṃ vibhi̍rga̱taṃ svayu̍ktibhirni̱vaha̍ntā pi̱tṛbhya̱ ā |
yā̱si̱ṣṭaṃ va̱rtirvṛ̍ṣaṇā vije̱nyaṃ1 divo̍dāsāya̱ mahi̍ ceti vā̱mava̍:
||4||यु॒वं भु॒ज्युं भु॒रमा॑णं॒ विभि॑र्ग॒तं स्वयु॑क्तिभिर्नि॒वह॑न्ता पि॒तृभ्य॒ आ ।
या॒सि॒ष्टं व॒र्तिर्वृ॑षणा विजे॒न्यं१ दिवो॑दासाय॒ महि॑ चेति वा॒मव॑:
yu̱vora̍śvinā̱ vapu̍ṣe yuvā̱yuja̱ṃ ratha̱ṃ vāṇī̍ yematurasya̱ śardhya̍m |
ā vā̍ṃ pati̱tvaṃ sa̱khyāya̍ ja̱gmuṣī̱ yoṣā̍vṛṇīta̱ jenyā̍ yu̱vāṃ patī̍
||5||यु॒वोर॑श्विना॒ वपु॑षे युवा॒युजं॒ रथं॒ वाणी॑ येमतुरस्य॒ शर्ध्य॑म् ।
आ वां॑ पति॒त्वं स॒ख्याय॑ ज॒ग्मुषी॒ योषा॑वृणीत॒ जेन्या॑ यु॒वां पती॑
yu̱vaṃ re̱bhaṃ pari̍ṣūteruruṣyatho hi̱mena̍ gha̱rmaṃ pari̍tapta̱matra̍ye |
yu̱vaṃ śa̱yora̍va̱saṃ pi̍pyathu̱rgavi̱ pra dī̱rgheṇa̱ vanda̍nastā̱ryāyu̍ṣā
||6||यु॒वं रे॒भं परि॑षूतेरुरुष्यथो हि॒मेन॑ घ॒र्मं परि॑तप्त॒मत्र॑ये ।
यु॒वं श॒योर॑व॒सं पि॑प्यथु॒र्गवि॒ प्र दी॒र्घेण॒ वन्द॑नस्ता॒र्यायु॑षा
yu̱vaṃ vanda̍na̱ṃ nirṛ̍taṃ jara̱ṇyayā̱ ratha̱ṃ na da̍srā kara̱ṇā sami̍nvathaḥ |
kṣetrā̱dā vipra̍ṃ janatho vipa̱nyayā̱ pra vā̱matra̍ vidha̱te da̱ṃsanā̍ bhuvat
||7||यु॒वं वन्द॑नं॒ निर्ऋ॑तं जर॒ण्यया॒ रथं॒ न द॑स्रा कर॒णा समि॑न्वथः ।
क्षेत्रा॒दा विप्रं॑ जनथो विप॒न्यया॒ प्र वा॒मत्र॑ विध॒ते दं॒सना॑ भुवत्
aga̍cchata̱ṃ kṛpa̍māṇaṃ parā̱vati̍ pi̱tuḥ svasya̱ tyaja̍sā̱ nibā̍dhitam |
sva̍rvatīri̱ta ū̱tīryu̱voraha̍ ci̱trā a̱bhīke̍ abhavanna̱bhiṣṭa̍yaḥ
||8||अग॑च्छतं॒ कृप॑माणं परा॒वति॑ पि॒तुः स्वस्य॒ त्यज॑सा॒ निबा॑धितम् ।
स्व॑र्वतीरि॒त ऊ॒तीर्यु॒वोरह॑ चि॒त्रा अ॒भीके॑ अभवन्न॒भिष्ट॑यः
u̱ta syā vā̱ṃ madhu̍ma̱nmakṣi̍kārapa̱nmade̱ soma̍syauśi̱jo hu̍vanyati |
yu̱vaṃ da̍dhī̱co mana̱ ā vi̍vāsa̱tho 'thā̱ śira̱: prati̍ vā̱maśvya̍ṃ vadat
||9||उ॒त स्या वां॒ मधु॑म॒न्मक्षि॑कारप॒न्मदे॒ सोम॑स्यौशि॒जो हु॑वन्यति ।
यु॒वं द॑धी॒चो मन॒ आ वि॑वास॒थो ऽथा॒ शिर॒: प्रति॑ वा॒मश्व्यं॑ वदत्
yu̱vaṃ pe̱dave̍ puru̱vāra̍maśvinā spṛ̱dhāṃ śve̱taṃ ta̍ru̱tāra̍ṃ duvasyathaḥ |
śaryai̍ra̱bhidyu̱ṃ pṛta̍nāsu du̱ṣṭara̍ṃ ca̱rkṛtya̱mindra̍miva carṣaṇī̱saha̍m
||10||यु॒वं पे॒दवे॑ पुरु॒वार॑मश्विना स्पृ॒धां श्वे॒तं त॑रु॒तारं॑ दुवस्यथः ।
शर्यै॑र॒भिद्युं॒ पृत॑नासु दु॒ष्टरं॑ च॒र्कृत्य॒मिन्द्र॑मिव चर्षणी॒सह॑म्