Study
- Anukramaṇī
- Source
6 savya āṅgirasaḥ| indraḥ| jagatī|
e̱ṣa pra pū̱rvīrava̱ tasya̍ ca̱mriṣo 'tyo̱ na yoṣā̱muda̍yaṃsta bhu̱rvaṇi̍: |
dakṣa̍ṃ ma̱he pā̍yayate hira̱ṇyaya̱ṃ ratha̍mā̱vṛtyā̱ hari̍yoga̱mṛbhva̍sam
||1||ए॒ष प्र पू॒र्वीरव॒ तस्य॑ च॒म्रिषो ऽत्यो॒ न योषा॒मुद॑यंस्त भु॒र्वणि॑: ।
दक्षं॑ म॒हे पा॑ययते हिर॒ण्ययं॒ रथ॑मा॒वृत्या॒ हरि॑योग॒मृभ्व॑सम्
taṃ gū̱rtayo̍ nema̱nniṣa̱: parī̍ṇasaḥ samu̱draṃ na sa̱ṃcara̍ṇe sani̱ṣyava̍: |
pati̱ṃ dakṣa̍sya vi̱datha̍sya̱ nū saho̍ gi̱riṃ na ve̱nā adhi̍ roha̱ teja̍sā
||2||तं गू॒र्तयो॑ नेम॒न्निष॒: परी॑णसः समु॒द्रं न सं॒चर॑णे सनि॒ष्यव॑: ।
पतिं॒ दक्ष॑स्य वि॒दथ॑स्य॒ नू सहो॑ गि॒रिं न वे॒ना अधि॑ रोह॒ तेज॑सा
sa tu̱rvaṇi̍rma̱hām̐ a̍re̱ṇu pauṃsye̍ gi̱rerbhṛ̱ṣṭirna bhrā̍jate tu̱jā śava̍: |
yena̱ śuṣṇa̍ṃ mā̱yina̍māya̱so made̍ du̱dhra ā̱bhūṣu̍ rā̱maya̱nni dāma̍ni
||3||स तु॒र्वणि॑र्म॒हाँ अ॑रे॒णु पौंस्ये॑ गि॒रेर्भृ॒ष्टिर्न भ्रा॑जते तु॒जा शव॑: ।
येन॒ शुष्णं॑ मा॒यिन॑माय॒सो मदे॑ दु॒ध्र आ॒भूषु॑ रा॒मय॒न्नि दाम॑नि
de̱vī yadi̱ tavi̍ṣī̱ tvāvṛ̍dho̱taya̱ indra̱ṃ siṣa̍ktyu̱ṣasa̱ṃ na sūrya̍: |
yo dhṛ̱ṣṇunā̱ śava̍sā̱ bādha̍te̱ tama̱ iya̍rti re̱ṇuṃ bṛ̱hada̍rhari̱ṣvaṇi̍:
||4||दे॒वी यदि॒ तवि॑षी॒ त्वावृ॑धो॒तय॒ इन्द्रं॒ सिष॑क्त्यु॒षसं॒ न सूर्य॑: ।
यो धृ॒ष्णुना॒ शव॑सा॒ बाध॑ते॒ तम॒ इय॑र्ति रे॒णुं बृ॒हद॑र्हरि॒ष्वणि॑:
vi yat ti̱ro dha̱ruṇa̱macyu̍ta̱ṃ rajo 'ti̍ṣṭhipo di̱va ātā̍su ba̱rhaṇā̍ |
sva̍rmīhle̱ yanmada̍ indra̱ harṣyāha̍n vṛ̱traṃ nira̱pāmau̍bjo arṇa̱vam
||5||वि यत् ति॒रो ध॒रुण॒मच्यु॑तं॒ रजो ऽति॑ष्ठिपो दि॒व आता॑सु ब॒र्हणा॑ ।
स्व॑र्मीह्ले॒ यन्मद॑ इन्द्र॒ हर्ष्याह॑न् वृ॒त्रं निर॒पामौ॑ब्जो अर्ण॒वम्
tvaṃ di̱vo dha̱ruṇa̍ṃ dhiṣa̱ oja̍sā pṛthi̱vyā i̍ndra̱ sada̍neṣu̱ māhi̍naḥ |
tvaṃ su̱tasya̱ made̍ ariṇā a̱po vi vṛ̱trasya̍ sa̱mayā̍ pā̱ṣyā̍rujaḥ
||6||त्वं दि॒वो ध॒रुणं॑ धिष॒ ओज॑सा पृथि॒व्या इ॑न्द्र॒ सद॑नेषु॒ माहि॑नः ।
त्वं सु॒तस्य॒ मदे॑ अरिणा अ॒पो वि वृ॒त्रस्य॑ स॒मया॑ पा॒ष्या॑रुजः