Study
- Anukramaṇī
- Source
9 ājīgartiḥ śunaḥśepa sa kṛtrimo vaiśvāmitro devarātaḥ| 1-4 indraḥ, 5-6 ulū khalaṃ, 7-8 ulūkhala musale, 9 prajāpatirhari ścandraḥ, (adhiṣavaṇa) carma somo vā| 1-6 anuṣṭup, 7-9 gāyatrī|
yatra̱ grāvā̍ pṛ̱thubu̍dhna ū̱rdhvo bhava̍ti̱ sota̍ve | u̱lūkha̍lasutānā̱mavedvi̍ndra jalgulaḥ
||1||यत्र॒ ग्रावा॑ पृ॒थुबु॑ध्न ऊ॒र्ध्वो भव॑ति॒ सोत॑वे । उ॒लूख॑लसुताना॒मवेद्वि॑न्द्र जल्गुलः
yatra̱ dvāvi̍va ja̱ghanā̍dhiṣava̱ṇyā̍ kṛ̱tā | u̱lūkha̍lasutānā̱mavedvi̍ndra jalgulaḥ
||2||यत्र॒ द्वावि॑व ज॒घना॑धिषव॒ण्या॑ कृ॒ता । उ॒लूख॑लसुताना॒मवेद्वि॑न्द्र जल्गुलः
yatra̱ nārya̍pacya̱vamu̍pacya̱vaṃ ca̱ śikṣa̍te | u̱lūkha̍lasutānā̱mavedvi̍ndra jalgulaḥ
||3||यत्र॒ नार्य॑पच्य॒वमु॑पच्य॒वं च॒ शिक्ष॑ते । उ॒लूख॑लसुताना॒मवेद्वि॑न्द्र जल्गुलः
yatra̱ manthā̍ṃ viba̱dhnate̍ ra̱śmīn yami̍ta̱vā i̍va | u̱lūkha̍lasutānā̱mavedvi̍ndra jalgulaḥ
||4||यत्र॒ मन्थां॑ विब॒ध्नते॑ र॒श्मीन् यमि॑त॒वा इ॑व । उ॒लूख॑लसुताना॒मवेद्वि॑न्द्र जल्गुलः
yacci̱ddhi tvaṃ gṛ̱hegṛ̍ha̱ ulū̍khalaka yu̱jyase̍ | i̱ha dyu̱matta̍maṃ vada̱ jaya̍tāmiva dundu̱bhiḥ
||5||यच्चि॒द्धि त्वं गृ॒हेगृ॑ह॒ उलू॑खलक यु॒ज्यसे॑ । इ॒ह द्यु॒मत्त॑मं वद॒ जय॑तामिव दुन्दु॒भिः
u̱ta sma̍ te vanaspate̱ vāto̱ vi vā̱tyagra̱mit | atho̱ indrā̍ya̱ pāta̍ve su̱nu soma̍mulūkhala
||6||उ॒त स्म॑ ते वनस्पते॒ वातो॒ वि वा॒त्यग्र॒मित् । अथो॒ इन्द्रा॑य॒ पात॑वे सु॒नु सोम॑मुलूखल
ā̱ya̱jī vā̍ja̱sāta̍mā̱ tā hyu1ccā vi̍jarbhṛ̱taḥ | harī̍ i̱vāndhā̍ṃsi̱ bapsa̍tā
||7||आ॒य॒जी वा॑ज॒सात॑मा॒ ता ह्यु१च्चा वि॑जर्भृ॒तः । हरी॑ इ॒वान्धां॑सि॒ बप्स॑ता
tā no̍ a̱dya va̍naspatī ṛ̱ṣvāvṛ̱ṣvebhi̍: so̱tṛbhi̍: | indrā̍ya̱ madhu̍matsutam
||8||ता नो॑ अ॒द्य व॑नस्पती ऋ॒ष्वावृ॒ष्वेभि॑: सो॒तृभि॑: । इन्द्रा॑य॒ मधु॑मत्सुतम्
ucchi̱ṣṭaṃ ca̱mvo̍rbhara̱ soma̍ṃ pa̱vitra̱ ā sṛ̍ja | ni dhe̍hi̱ goradhi̍ tva̱ci
||9||उच्छि॒ष्टं च॒म्वो॑र्भर॒ सोमं॑ प॒वित्र॒ आ सृ॑ज । नि धे॑हि॒ गोरधि॑ त्व॒चि