Study
- Anukramaṇī
- Source
7 dīrghatamā aucathyaḥ| mitrāvaruṇau| triṣṭup|
yu̱vaṃ vastrā̍ṇi pīva̱sā va̍sāthe yu̱voracchi̍drā̱ manta̍vo ha̱ sargā̍: |
avā̍tirata̱manṛ̍tāni̱ viśva̍ ṛ̱tena̍ mitrāvaruṇā sacethe
||1||यु॒वं वस्त्रा॑णि पीव॒सा व॑साथे यु॒वोरच्छि॑द्रा॒ मन्त॑वो ह॒ सर्गा॑: ।
अवा॑तिरत॒मनृ॑तानि॒ विश्व॑ ऋ॒तेन॑ मित्रावरुणा सचेथे
e̱tacca̱na tvo̱ vi ci̍ketadeṣāṃ sa̱tyo mantra̍: kaviśa̱sta ṛghā̍vān |
tri̱raśri̍ṃ hanti̱ catu̍raśriru̱gro de̍va̱nido̱ ha pra̍tha̱mā a̍jūryan
||2||ए॒तच्च॒न त्वो॒ वि चि॑केतदेषां स॒त्यो मन्त्र॑: कविश॒स्त ऋघा॑वान् ।
त्रि॒रश्रिं॑ हन्ति॒ चतु॑रश्रिरु॒ग्रो दे॑व॒निदो॒ ह प्र॑थ॒मा अ॑जूर्यन्
a̱pāde̍ti pratha̱mā pa̱dvatī̍nā̱ṃ kastad vā̍ṃ mitrāvaru̱ṇā ci̍keta |
garbho̍ bhā̱raṃ bha̍ra̱tyā ci̍dasya ṛ̱taṃ pipa̱rtyanṛ̍ta̱ṃ ni tā̍rīt
||3||अ॒पादे॑ति प्रथ॒मा प॒द्वती॑नां॒ कस्तद् वां॑ मित्रावरु॒णा चि॑केत ।
गर्भो॑ भा॒रं भ॑र॒त्या चि॑दस्य ऋ॒तं पिप॒र्त्यनृ॑तं॒ नि ता॑रीत्
pra̱yanta̱mit pari̍ jā̱raṃ ka̱nīnā̱ṃ paśyā̍masi̱ nopa̍ni̱padya̍mānam |
ana̍vapṛgṇā̱ vita̍tā̱ vasā̍naṃ pri̱yaṃ mi̱trasya̱ varu̍ṇasya̱ dhāma̍
||4||प्र॒यन्त॒मित् परि॑ जा॒रं क॒नीनां॒ पश्या॑मसि॒ नोप॑नि॒पद्य॑मानम् ।
अन॑वपृग्णा॒ वित॑ता॒ वसा॑नं प्रि॒यं मि॒त्रस्य॒ वरु॑णस्य॒ धाम॑
a̱na̱śvo jā̱to a̍nabhī̱śurarvā̱ kani̍kradat patayadū̱rdhvasā̍nuḥ |
a̱citta̱ṃ brahma̍ jujuṣu̱ryuvā̍na̱: pra mi̱tre dhāma̱ varu̍ṇe gṛ̱ṇanta̍:
||5||अ॒न॒श्वो जा॒तो अ॑नभी॒शुरर्वा॒ कनि॑क्रदत् पतयदू॒र्ध्वसा॑नुः ।
अ॒चित्तं॒ ब्रह्म॑ जुजुषु॒र्युवा॑न॒: प्र मि॒त्रे धाम॒ वरु॑णे गृ॒णन्त॑:
ā dhe̱navo̍ māmate̱yamava̍ntīrbrahma̱priya̍ṃ pīpaya̱n tsasmi̱nnūdha̍n |
pi̱tvo bhi̍kṣeta va̱yunā̍ni vi̱dvānā̱sāvivā̍sa̱nnadi̍timuruṣyet
||6||आ धे॒नवो॑ मामते॒यमव॑न्तीर्ब्रह्म॒प्रियं॑ पीपय॒न् त्सस्मि॒न्नूध॑न् ।
पि॒त्वो भि॑क्षेत व॒युना॑नि वि॒द्वाना॒साविवा॑स॒न्नदि॑तिमुरुष्येत्
ā vā̍ṃ mitrāvaruṇā ha̱vyaju̍ṣṭi̱ṃ nama̍sā devā̱vava̍sā vavṛtyām |
a̱smāka̱ṃ brahma̱ pṛta̍nāsu sahyā a̱smāka̍ṃ vṛ̱ṣṭirdi̱vyā su̍pā̱rā
||7||आ वां॑ मित्रावरुणा ह॒व्यजु॑ष्टिं॒ नम॑सा देवा॒वव॑सा ववृत्याम् ।
अ॒स्माकं॒ ब्रह्म॒ पृत॑नासु सह्या अ॒स्माकं॑ वृ॒ष्टिर्दि॒व्या सु॑पा॒रा