Study
- Anukramaṇī
- Source
(5) 1,3,4 indraḥ, (4agastyo vā,) 2,5 agastyo maitrāvaruṇiḥ | indraḥ| 1bṛhatī, 2-4 anuṣṭup, 5 triṣṭup|
na nū̱namasti̱ no śvaḥ kastad ve̍da̱ yadadbhu̍tam |
a̱nyasya̍ ci̱ttama̱bhi sa̍ṃca̱reṇya̍mu̱tādhī̍ta̱ṃ vi na̍śyati
||1||न नू॒नमस्ति॒ नो श्वः कस्तद् वे॑द॒ यदद्भु॑तम् ।
अ॒न्यस्य॑ चि॒त्तम॒भि सं॑च॒रेण्य॑मु॒ताधी॑तं॒ वि न॑श्यति
kiṃ na̍ indra jighāṃsasi̱ bhrāta̍ro ma̱ruta̱stava̍ |
tebhi̍: kalpasva sādhu̱yā mā na̍: sa̱mara̍ṇe vadhīḥ
||2||किं न॑ इन्द्र जिघांससि॒ भ्रात॑रो म॒रुत॒स्तव॑ ।
तेभि॑: कल्पस्व साधु॒या मा न॑: स॒मर॑णे वधीः
kiṃ no̍ bhrātaragastya̱ sakhā̱ sannati̍ manyase |
vi̱dmā hi te̱ yathā̱ mano̱ 'smabhya̱minna di̍tsasi
||3||किं नो॑ भ्रातरगस्त्य॒ सखा॒ सन्नति॑ मन्यसे ।
वि॒द्मा हि ते॒ यथा॒ मनो॒ ऽस्मभ्य॒मिन्न दि॑त्ससि
ara̍ṃ kṛṇvantu̱ vedi̱ṃ sama̱gnimi̍ndhatāṃ pu̱raḥ |
tatrā̱mṛta̍sya̱ ceta̍naṃ ya̱jñaṃ te̍ tanavāvahai
||4||अरं॑ कृण्वन्तु॒ वेदिं॒ सम॒ग्निमि॑न्धतां पु॒रः ।
तत्रा॒मृत॑स्य॒ चेत॑नं य॒ज्ञं ते॑ तनवावहै
tvamī̍śiṣe vasupate̱ vasū̍nā̱ṃ tvaṃ mi̱trāṇā̍ṃ mitrapate̱ dheṣṭha̍: |
indra̱ tvaṃ ma̱rudbhi̱: saṃ va̍da̱svādha̱ prāśā̍na ṛtu̱thā ha̱vīṃṣi̍
||5||त्वमी॑शिषे वसुपते॒ वसू॑नां॒ त्वं मि॒त्राणां॑ मित्रपते॒ धेष्ठ॑: ।
इन्द्र॒ त्वं म॒रुद्भि॒: सं व॑द॒स्वाध॒ प्राशा॑न ऋतु॒था ह॒वींषि॑