Study
- Anukramaṇī
- Source
15 praskaṇvaḥ kāṇvaḥ| aśvinau| gāyatrī|
e̱ṣo u̱ṣā apū̍rvyā̱ vyu̍cchati pri̱yā di̱vaḥ | stu̱ṣe vā̍maśvinā bṛ̱hat
||1||ए॒षो उ॒षा अपू॑र्व्या॒ व्यु॑च्छति प्रि॒या दि॒वः । स्तु॒षे वा॑मश्विना बृ॒हत्
yā da̱srā sindhu̍mātarā mano̱tarā̍ rayī̱ṇām | dhi̱yā de̱vā va̍su̱vidā̍
||2||या द॒स्रा सिन्धु॑मातरा मनो॒तरा॑ रयी॒णाम् । धि॒या दे॒वा व॑सु॒विदा॑
va̱cyante̍ vāṃ kaku̱hāso̍ jū̱rṇāyā̱madhi̍ vi̱ṣṭapi̍ | yad vā̱ṃ ratho̱ vibhi̱ṣpatā̍t
||3||व॒च्यन्ते॑ वां ककु॒हासो॑ जू॒र्णाया॒मधि॑ वि॒ष्टपि॑ । यद् वां॒ रथो॒ विभि॒ष्पता॑त्
ha̱viṣā̍ jā̱ro a̱pāṃ pipa̍rti̱ papu̍rirnarā | pi̱tā kuṭa̍sya carṣa̱ṇiḥ
||4||ह॒विषा॑ जा॒रो अ॒पां पिप॑र्ति॒ पपु॑रिर्नरा । पि॒ता कुट॑स्य चर्ष॒णिः
ā̱dā̱ro vā̍ṃ matī̱nāṃ nāsa̍tyā matavacasā | pā̱taṃ soma̍sya dhṛṣṇu̱yā
||5||आ॒दा॒रो वां॑ मती॒नां नास॑त्या मतवचसा । पा॒तं सोम॑स्य धृष्णु॒या
yā na̱: pīpa̍radaśvinā̱ jyoti̍ṣmatī̱ tama̍sti̱raḥ | tāma̱sme rā̍sāthā̱miṣa̍m
||6||या न॒: पीप॑रदश्विना॒ ज्योति॑ष्मती॒ तम॑स्ति॒रः । ताम॒स्मे रा॑साथा॒मिष॑म्
ā no̍ nā̱vā ma̍tī̱nāṃ yā̱taṃ pā̱rāya̱ ganta̍ve | yu̱ñjāthā̍maśvinā̱ ratha̍m
||7||आ नो॑ ना॒वा म॑ती॒नां या॒तं पा॒राय॒ गन्त॑वे । यु॒ञ्जाथा॑मश्विना॒ रथ॑म्
a̱ritra̍ṃ vāṃ di̱vaspṛ̱thu tī̱rthe sindhū̍nā̱ṃ ratha̍: | dhi̱yā yu̍yujra̱ inda̍vaḥ
||8||अ॒रित्रं॑ वां दि॒वस्पृ॒थु ती॒र्थे सिन्धू॑नां॒ रथ॑: । धि॒या यु॑युज्र॒ इन्द॑वः
di̱vaska̍ṇvāsa̱ inda̍vo̱ vasu̱ sindhū̍nāṃ pa̱de | svaṃ va̱vriṃ kuha̍ dhitsathaḥ
||9||दि॒वस्क॑ण्वास॒ इन्द॑वो॒ वसु॒ सिन्धू॑नां प॒दे । स्वं व॒व्रिं कुह॑ धित्सथः
abhū̍du̱ bhā u̍ a̱ṃśave̱ hira̍ṇya̱ṃ prati̱ sūrya̍: | vya̍khyajji̱hvayāsi̍taḥ
||10||अभू॑दु॒ भा उ॑ अं॒शवे॒ हिर॑ण्यं॒ प्रति॒ सूर्य॑: । व्य॑ख्यज्जि॒ह्वयासि॑तः
abhū̍du pā̱rameta̍ve̱ panthā̍ ṛ̱tasya̍ sādhu̱yā | ada̍rśi̱ vi sru̱tirdi̱vaḥ
||11||अभू॑दु पा॒रमेत॑वे॒ पन्था॑ ऋ॒तस्य॑ साधु॒या । अद॑र्शि॒ वि स्रु॒तिर्दि॒वः
tatta̱dida̱śvino̱ravo̍ jari̱tā prati̍ bhūṣati | made̱ soma̍sya̱ pipra̍toḥ
||12||तत्त॒दिद॒श्विनो॒रवो॑ जरि॒ता प्रति॑ भूषति । मदे॒ सोम॑स्य॒ पिप्र॑तोः
vā̱va̱sā̱nā vi̱vasva̍ti̱ soma̍sya pī̱tyā gi̱rā | ma̱nu̱ṣvaccha̍mbhū̱ ā ga̍tam
||13||वा॒व॒सा॒ना वि॒वस्व॑ति॒ सोम॑स्य पी॒त्या गि॒रा । म॒नु॒ष्वच्छ॑म्भू॒ आ ग॑तम्
yu̱voru̱ṣā anu̱ śriya̱ṃ pari̍jmanoru̱pāca̍rat | ṛ̱tā va̍natho a̱ktubhi̍:
||14||यु॒वोरु॒षा अनु॒ श्रियं॒ परि॑ज्मनोरु॒पाच॑रत् । ऋ॒ता व॑नथो अ॒क्तुभि॑:
u̱bhā pi̍batamaśvino̱bhā na̱: śarma̍ yacchatam | a̱vi̱dri̱yābhi̍rū̱tibhi̍:
||15||उ॒भा पि॑बतमश्विनो॒भा न॒: शर्म॑ यच्छतम् । अ॒वि॒द्रि॒याभि॑रू॒तिभि॑: