Study
- Anukramaṇī
- Source
9 nodhā gautamaḥ| indraḥ| triṣṭup|
tvaṃ ma̱hām̐ i̍ndra̱ yo ha̱ śuṣmai̱rdyāvā̍ jajñā̱naḥ pṛ̍thi̱vī ame̍ dhāḥ |
yaddha̍ te̱ viśvā̍ gi̱raya̍ści̱dabhvā̍ bhi̱yā dṛ̱hlāsa̍: ki̱raṇā̱ naija̍n
||1||त्वं म॒हाँ इ॑न्द्र॒ यो ह॒ शुष्मै॒र्द्यावा॑ जज्ञा॒नः पृ॑थि॒वी अमे॑ धाः ।
यद्ध॑ ते॒ विश्वा॑ गि॒रय॑श्चि॒दभ्वा॑ भि॒या दृ॒ह्लास॑: कि॒रणा॒ नैज॑न्
ā yaddharī̍ indra̱ vivra̍tā̱ verā te̱ vajra̍ṃ jari̱tā bā̱hvordhā̍t |
yenā̍viharyatakrato a̱mitrā̱n pura̍ i̱ṣṇāsi̍ puruhūta pū̱rvīḥ
||2||आ यद्धरी॑ इन्द्र॒ विव्र॑ता॒ वेरा ते॒ वज्रं॑ जरि॒ता बा॒ह्वोर्धा॑त् ।
येना॑विहर्यतक्रतो अ॒मित्रा॒न् पुर॑ इ॒ष्णासि॑ पुरुहूत पू॒र्वीः
tvaṃ sa̱tya i̍ndra dhṛ̱ṣṇure̱tān tvamṛ̍bhu̱kṣā narya̱stvaṃ ṣāṭ |
tvaṃ śuṣṇa̍ṃ vṛ̱jane̍ pṛ̱kṣa ā̱ṇau yūne̱ kutsā̍ya dyu̱mate̱ sacā̍han
||3||त्वं स॒त्य इ॑न्द्र धृ॒ष्णुरे॒तान् त्वमृ॑भु॒क्षा नर्य॒स्त्वं षाट् ।
त्वं शुष्णं॑ वृ॒जने॑ पृ॒क्ष आ॒णौ यूने॒ कुत्सा॑य द्यु॒मते॒ सचा॑हन्
tvaṃ ha̱ tyadi̍ndra codī̱: sakhā̍ vṛ̱traṃ yad va̍jrin vṛṣakarmannu̱bhnāḥ |
yaddha̍ śūra vṛṣamaṇaḥ parā̱cairvi dasyū̱m̐ryonā̱vakṛ̍to vṛthā̱ṣāṭ
||4||त्वं ह॒ त्यदि॑न्द्र चोदी॒: सखा॑ वृ॒त्रं यद् व॑ज्रिन् वृषकर्मन्नु॒भ्नाः ।
यद्ध॑ शूर वृषमणः परा॒चैर्वि दस्यूँ॒र्योना॒वकृ॑तो वृथा॒षाट्
tvaṃ ha̱ tyadi̱ndrāri̍ṣaṇyan dṛ̱hlasya̍ ci̱nmartā̍nā̱maju̍ṣṭau |
vya 1 smadā kāṣṭhā̱ arva̍te vargha̱neva̍ vajriñchnathihya̱mitrā̍n
||5||त्वं ह॒ त्यदि॒न्द्रारि॑षण्यन् दृ॒ह्लस्य॑ चि॒न्मर्ता॑ना॒मजु॑ष्टौ ।
व्य १ स्मदा काष्ठा॒ अर्व॑ते वर्घ॒नेव॑ वज्रिञ्छ्नथिह्य॒मित्रा॑न्
tvāṃ ha̱ tyadi̱ndrārṇa̍sātau̱ sva̍rmīhle̱ nara̍ ā̱jā ha̍vante |
tava̍ svadhāva i̱yamā sa̍ma̱rya ū̱tirvāje̍ṣvata̱sāyyā̍ bhūt
||6||त्वां ह॒ त्यदि॒न्द्रार्ण॑सातौ॒ स्व॑र्मीह्ले॒ नर॑ आ॒जा ह॑वन्ते ।
तव॑ स्वधाव इ॒यमा स॑म॒र्य ऊ॒तिर्वाजे॑ष्वत॒साय्या॑ भूत्
tvaṃ ha̱ tyadi̍ndra sa̱pta yudhya̱npu puro̍ vajrin puru̱kutsā̍ya dardaḥ |
ba̱rhirna yat su̱dāse̱ vṛthā̱ varga̱ṃho rā̍ja̱n vari̍vaḥ pū̱rave̍ kaḥ
||7||त्वं ह॒ त्यदि॑न्द्र स॒प्त युध्य॒न्पु पुरो॑ वज्रिन् पुरु॒कुत्सा॑य दर्दः ।
ब॒र्हिर्न यत् सु॒दासे॒ वृथा॒ वर्गं॒हो रा॑ज॒न् वरि॑वः पू॒रवे॑ कः
tvaṃ tyāṃ na̍ indra deva ci̱trāmiṣa̱māpo̱ na pī̍paya̱: pari̍jman |
yayā̍ śūra̱ pratya̱smabhya̱ṃ yaṃsi̱ tmana̱mūrja̱ṃ na vi̱śvadha̱ kṣara̍dhyai
||8||त्वं त्यां न॑ इन्द्र देव चि॒त्रामिष॒मापो॒ न पी॑पय॒: परि॑ज्मन् ।
यया॑ शूर॒ प्रत्य॒स्मभ्यं॒ यंसि॒ त्मन॒मूर्जं॒ न वि॒श्वध॒ क्षर॑ध्यै
akā̍ri ta indra̱ gota̍mebhi̱rbrahmā̱ṇyoktā̱ nama̍sā̱ hari̍bhyām |
su̱peśa̍sa̱ṃ vāja̱mā bha̍rā naḥ prā̱tarma̱kṣū dhi̱yāva̍surjagamyāt
||9||अका॑रि त इन्द्र॒ गोत॑मेभि॒र्ब्रह्मा॒ण्योक्ता॒ नम॑सा॒ हरि॑भ्याम् ।
सु॒पेश॑सं॒ वाज॒मा भ॑रा नः प्रा॒तर्म॒क्षू धि॒याव॑सुर्जगम्यात्